Read Zeme Naga 1JOHAN 4 Bible Online

1JOHAN 4 - Zeme Naga bible

1JOHAN 4

¹Kehungme gau, herui leine je ningnui ’nnum’mmi se lau, kane herui ramme ze Hera gu mei be ningnui kedakchi le lau; kemeume karasame misongga kedeirei ge zuapat ti daseu.

²Aigezene Hera gu Herui bambe tak ze chî le lau: chi Isua Krista ze hemeipum ge zuagut kai di de lei be paube herui ze â Hera gu de lei,

³zai Isua rasam pauliâmakbe herui ze â Hera gu mak lei. Aize â Krista je ka’nggibe herui lei, chize wangzi gu de lei be ningnui ne seube chunage wangchang ze bamkuâdibe zeu.

⁴Hename napoine ramme gau, ningnui â Hera gume de lei, zai ningnui ne penui (karasa ne geteiliame) je ngam lu de lei; pa ningnui ge bambepeu â kedeirei ge bambepeu suadu di dadegeu.

⁵Penui â kedeireime gu chang lei, chipauziegene penui sabe ze â kedeirei gu chang lei, zai kedeirei ne penui kuâ ka’ngking lei.

⁶Anui â Hera gume chang lei. Mi-mige Hera je gechîme leine ze anui kuâ ka’ngking lei, zai Hera gu changmakbe kau ze anui kuâ ’ngking mak lei. Aige zene samsang gu herui benai samsangmakbe gu herui bambe tak ze anui chî de lei.

⁷Kehungme gau, anui kat-kat je hung ze bam kei lei; kehungbe â Hera gu chang di daseu, zai kehungbe je ka’nchâbe kau â, Hera dagene lungkeube chang lei, zai Hera je pa chî lei.

⁸Kehungbe je ’nchâmakbe kau â, Hera je ’nchâmakbe chang lei; Hera â kehungpeu dadegeu.

⁹Aigene Hera kehungbe ze anui ruage teilia bei de lei, chi Hera ne pe Na hangkatgap bambepeu je kedeirei ge langgaibeibe zeu, chidezai pa gezene anui ring le ra hangge zeu.

¹⁰Aigeze kehungbe bam de lei, anui ne Hera je hungbeibe ne mak ze kane pa ne anui je hung ze anui gu hemui ramme sa’nzeigairabe hangge pe Na je langgaibeibe geneu.

¹¹Kehungme gau, Hera ne anui je hung-desang ze bam dizai â anui du kat-kat je hungchi ze bam ra yi lei.

¹²Mî de Hera je mâdau ngau merei lei; anui ne kat-kat je hung ze bam dizai â Hera anui ge bam bam lei, zai pa kehungbe ze anui ge tew’nsang gai de lei.

¹³Aige zene, anui pa ge bam, zai pa anui ge bam lei be anui chî de lei, pa ne pe gu Herui singbe ze anui je peigaibeibe ziegeneu.

¹⁴Bepeu ne pe Na je kedeirei je Ripatpeu hangge langgaibeibe anui ne ngau lu sakkitew ze pau ze bam de lei.

¹⁵Mi-mige Isua â Hera Na lei ze paube kau â Hera pa ge bam lei, zai pa Hera ge bam lei.

¹⁶Chigum ze Hera dage kehungbe anui hangge bambe anui ne chî lu ’nnum’mmi ze bam lei. Hera â kehungpeu lei. Zai kehungbe bam-bambe kau â, Hera ge bam bam lei, zai Hera pa ge bam bam lei.

¹⁷Aige kehungbe bambe zene anui je tew’nsang gai bei de lei, chidezai samrambe mai hangge anui lung lumbup bam de ra hangge zeu, pa gum ze kedeirei ge anui bambe ziegeneu.

¹⁸Kehungbe ge â kehingbe ga lei, kehungbe yika’nsangbe zene kehingbe je â kumtua nan zeu. Kehingbe bambe â tewsârabe hanggene (hingbe) bam daseu, zai kehingbe kau â, kehungbe lam ge ’nsang mak lei.

¹⁹Pa ne anui je hunggairaibeibe ziegene anui hung ze bam lei.

²⁰Mige hangkat ne, “I Hera je hung lei,” acheu lu, pe sikina je ngaugailak tizai â, pa ze karasasabe kau chang lei; pa ne ngaubambe, chi pe sikina je hungchi mak dadege pa ngaumakbe, chi Hera je hungchi lak ra chang lei.

²¹Zai chi Hera je hungbe kau ze pe sikina je du pa hung ra lei, kacheube aipau hingde ze pe dagene anui ngau de lei.