Read Zeme Naga 1JOHAN 5 Bible Online

1JOHAN 5 - Zeme Naga bible

1JOHAN 5

¹Mi-mige Isua â Krista lei be ’nnumka’mmibe kau leine ne Hera na chang lei, zai mi-mige bepeu je hungbe kau leine ne pe na je hung lei.

²Anui ne Hera je hung ze pe gu hingde kuâpheube luage, anui ne Hera name je hungbe chang lei be aigene anui chî de lei.

³Anui ne pe gu hingde ramme tei’mmirabe aize Hera ne ka’nchâbe chang daseu. Zai pe gu hingde ramme ze â pungtatlakbe keritbe kau mak lei.

⁴Hera dagene lungkeume leine â kedeirei je duîtat bam lei; zai aize kedeirei je duîtat bambe de lei, anui keneibe zeu.

⁵Kedeirei je duîtat-bambe ze châu ra lau, Isua â Hera Na lei ze ’nnumka’mmibe kau ne lei makchai neu?

⁶Aize Isua Krista, (pechu baptistewbe) hedui benai (pa kechaibe) hejai gene wangkeupeu de lei, hedui gene runne makse, kane hedui benai hejai chi kena gene wangkeupeu zeu.

⁷Sakkitewbe ze Herui de lei, Herui ze â samsang changbe ziegeneu.

⁸Sakki kechum la lei, chi Herui, chi hedui zai chi hejai zeu; zai airamme kechum ze nguahezuâ kam gai lei.

⁹Ziemmename ne sakkitewbe ze anui ne ’nchâ dizai â Hera ne sakkitewbe â di’nteu ze la lei; aize â, Hera ne sakkitewbe chang di daseu, chi pa ne pe Na rasam sakkitewgaibe zeu.

¹⁰Hera Na je ’nnumka’mmibe kau dage ai sakkitewgaibe ze bam lei. Hera je ’nnum’mmimakbe kau ne pechu (Hera je) karasa kau hang tew gai bei de lei, Hera ne pe Na deu ge sakkitewgaibe ge pa ne ’nnum’mmimakbe ziegeneu.

¹¹Aize Hera ne sakkitewgaibe de lei, chi Hera ne ringbetunmakbe peigaibeibe zeu, zai aipau keringbe ze pe Na ge bam lei.

¹²Pe Na je kanguabe kau dage keringbe bam lei; Hera Na je nguamakbe kau dage keringbe bam mak lei.

¹³Ningnui Hera Na ji ge ’nnum’mmi ze bamme dage I ne aize raw gai lei, chidezai ningnui dage keringbe betunmak bambe ningnui chî ra hangge zeu.

¹⁴Pa ge anui ’nnumka’mmibe ze â aize de lei, chi pe gu ’nning luigumbe gene anui ne mâ-mâ kie dizai â, pa ne anui kuâ ’ngkinggairabe zeu.

¹⁵Zai anui mâ-mâkiebe leine ge pa ne anui kuâ ’ngking ze bam lei be anui ne chi tânege pe dage anui kiambe zat ramme anui ngau lu lu lei be anui chî lei.

¹⁶Nguachai ra changmakbe hemui zat ze besikina ne tew ze bambe mi hangkat ne ngau ze bam dizai â, (Hera dage) pa kie ra lei, dezai pungchaimakrabe hemuipungme hangge Hera ne pechu keringbe pei gai gu lei. Nguachai ra changbe hemui zat lamui lei; hangkat ne chipau zat hangge kie ze kellum ra lei, ze I ne kacheube mak lei.

¹⁷Kemaube tâ tewbe leine ze hemui kam de lei, kane nguachai ra changmakbe hemui zat lamui lei.

¹⁸Mi-mige Hera gene lungkeu’ndibe kau â hemui gai mak lei, kane mige Hera gene lungkeu’ndibe kau â pechu reîchi ze bam lei, zai kesiabe ne pechu deîtau mak ze bam lei be anui ne chî lei.

¹⁹Anui â Hera gume de lei be, zai kedeirei pelane ze â kesiapeu gu rezie ge bam lei be anui chî lei.

²⁰Zai anui ne kapelingpeu (Hera) je chî ra Hera Na ne (Isua) wangkeu ze anui je mâ-gechîbe pei gai bei de lei be anui chî lei; zai pe Na Isua Krista gene pa kapelingpeu (Hera) ge anui bam de lei. Aipaupeu ze kapelingbe Hera benai ringbetunmakpeu de lei.

²¹Hename napoine ramme gau, Heraluîtewbe ramme gene ningnui runne ’mbia de lau.