Read Zeme Naga SAMRAMME 10 Bible Online

SAMRAMME 10 - Zeme Naga bible

SAMRAMME 10

¹Abimelekbe chângge Israelme je ripat ra hangge Issakar’mpeu Dodobe na, Puabe na Tolabe zuachu kadai de lei; zai pa â Ephraim gu peloaram ge Shamir ge bam de lei.

²Zai Pa ne Israelme je kum ’ngkai ze kechum samram de lei. Chipau kum ’ngkai chang dege pa chai di de lei, zai Shamir ge pechu bai gai de lei.

³Tolabe chângge Gilead’mpeu Jairbe chu dai ze pa ne Israelme je kum ’ngkai ze kena samram de lei.

⁴Zai pe na ’mpeumi himreu hekunmerângne himreu peireige chuabe kau ramme bam de lei; zai Gilead dei ge penui gu namdi himreu, chuna ting riâ chang ze Habboth-jair kacheube bam de lei.

⁵Zai Jairbe chai di, pechu Kamon ge bai gai de lei.

⁶Zai Tingwang mikngau ge tâ-kesiabe Israelme ne tew kadai de lei, zai Baal-râ ramme benai Ashtaroth, Siriame rapeu ramme, Moabme rapeu ramme, Ammonme rapeu ramme, zai Philistinme rapeu ramme guâ ’nggua kadai de lei; Zai Tingwang je penui sâu ’ndi de lei, zai pe guâ ’nggua mak tai de lei.

⁷Zai Israelme peireige Tingwang pe râta-desang di de lei, zai pa ne penui je Philistinme ba ge benai Ammonme ba ge zua gai ’ndi de lei,

⁸zai chipau tingkum ge â penui ne Israelme je chaîkeniak ze tewsâ de lei. Gileadram ge Ammonme dei Jordan ze wîgiam ge bamme Israelme leine je penui ne kum kereu ze desat tewsâ ze bam de lei.

⁹Zai Ammonme ne du Juda benai Benjamin zai Ephraim zat je herei ra Jordan geuki kapat te lei; chipauziegene Israelme â hereu-desang ze bam de lei.

¹⁰Zai Israelme ne Tingwang dage hap’nrung gai de lei, penui ne, “Anui Rapeu je sâu ’ndi ze Baal ramme je anui ’ngguadibe ziegene, ning dage anui hemui gai ’ndi de lei,” ze kacheu de lei.

¹¹Zai Tingwang ne Israelme je, “I ne ningnui je Ijipme dagene benai Amorme dagene, Ammonme benai Philistinme dagene ’nripat kai mak semei?

¹²Sidonme zai Amalekme, zai Maonme ne du ningnui je tewsa de lei; zai ningnui a dage hap kai de lei; zai penui ba gene I ne ningnui je ’nripat kai bei de lei.

¹³Acheusede achu ningnui sâu ’ndi, zai kêdabe rapeu ramme je ’nggua di de lei; chidadege ningnui je I ’nripat kai dai ra mak lei.

¹⁴Tat ze ningnui ne kelânglube rapeu ramme dage hap’nrung gai be lau; ningnui kahereube luage peize penui ne ningnui je ’nripat kai be lau,” kacheu de lei.

¹⁵Zai Israelme ne Tingwang dage rang gai ze, “Anui ne hemui gai ’ndi de lei, nang ne tew ra yi-yibe tak anui peireige tew gai be lau; nemai ge anui je ’nripat kai ra runne ning dage anui kie de lei,” ze kacheu de lei.

¹⁶Chidadege penui ruagene hesangme rapeu ramme penui ne gechaîtua lu Tingwang guâ ka’nggua de lei; zai Israelme lungkahereube deu ze pa pe lunggailak ti de lei.

¹⁷Chidadege Ammonme herei’mpung ze Gilead ge penui wang’ndui gai de lei; zai Israelme wangherua ze, Mizpa ge penui wang’ndui gai de lei.

¹⁸Zai baudime benai Gileadme gu besuitewme penui karai ge sa ze, “Châu ne Ammonme je ’nggichu raî ra lau? Pa zene Gilead ge lungme leine peireige haîpeipeu chang ra de lei,” kacheu de lei.