Read Zeme Naga SAMRAMME 11 Bible Online

SAMRAMME 11 - Zeme Naga bible

SAMRAMME 11

¹Chunage Gilead’mpeu Jephthabe â herei ge kuugiereupeu de lei, kane pa â hepumzuateupui na de lei. Gileadbe ze Jephthabe peu de lei.

²Zai Gileadbe nâu ne du pe na ’mpeumi ramme lungkeu de lei; zai pe nâu name ’mpeumi ramme chîngchu dege, penui ne Jephthabe je kelitua ’ndi de lei, zai penui ne pechu, “Nang â anui peu ki ge nguaheuherua ra mak lei; nang â kêdapui na daseu,” ze kacheu de lei.

³Chidadege pe sikiname dagene Jephthabe â tat’mbia di de lei, zai Tob dei ge pa â lung ze bam de lei; zai ziemmena peruânggabe kau ramme ne Jephthabe je buâ ze bam de lei, zai pechu ngua lu ze chumteurua bam de lei.

⁴Bechâng ge mâtiege mak ze Ammonme ne Israelme je herei ze bam de lei.

⁵Zai Ammonme ne Israelme je herei’nggi bei dadege, Gilead ge gechîngme ne Jephthabe je Tobram gene nguawang ra hangge tat te lei;

⁶zai Jephthabe je penui ne, “Wang ze anui gu kanguapeu chang le lau, dezai Ammonme je anui ’nggichi le ra hangge zeu,” ze kacheu de lei.

⁷Kane Jephthabe ne Gilead gu gechîngme je, “Achu ningnui ngaugailak ze a peu ki gene achu kelitua de mak semei? Chunage ningnui hereu dezaine ’ndaitew ze a dage wang lau?” kacheu de lei.

⁸Zai Gilead gu gechîngme ne Jephthabe je, “Chipauziegene chunage ning dage anui wang de lei, chidezai nang du anui dage nguatat ze Ammonme je ’nggichi le ra, zai anui Gilead ge bamme leine peireige nang ne haîpeipeu chang le ra hangge zeu,” ze kacheu de lei.

⁹Jephthabe ne Gilead gu gechîngme je, “Ammonme je ’nggi ra hangge ningnui ne achu a ki lam nguawang gai dai bei, zai penui je Tingwang ne a ba ge bala gai dai bei zai â, I ne ningnui gu haîpeipeu chang ra de lei,” ze kacheu de lei.

¹⁰Zai Gilead gu gechîngme ne Jephthabe je, “Tingwang ne anui kakge sakki chang ra de lei; nang ne rangbe luigum ze anui tewhimchang gu lei,” ze kacheu de lei.

¹¹Chidadege Gilead gu gechîngme je ngua lu ze Jephthabe tat ti de lei, zai baudime ne pechu penui peireige haîpeipeu benai kanguapeu hangge tew gai bei de lei; zai Mizpa ge Tingwang masua gene pe sam ramme leine Jephthabe salia gai de lei.

¹²Chidadege Jephthabe ne hepâupaume je Ammonme gu heguang dage lang gai ze, “Aram je ’nggi ra a dage nang wang ra hangge, a peireige nang ’ndaikau gene tingkangrabe la lau?” kacheu de lei.

¹³Zai Ammonme gu heguang ne Jephthabe gu hepâupaume je kak ze, “Ijipram gene wangbe luage Israelme ne Aram ze, Armon geuki gene Jabbok geuki zai Jordan geuki riâ chang ze sut-tat ti de lei; chidaze chunage chize yine ze pei gai dai zu lau,” ze kacheu de lei.

¹⁴Zai Jephthabe ne Ammonme gu heguang dage hepâupaume je lang gai kadai de lei,

¹⁵zai pechu, “Jephthabe ne aigum ze sa de lei: Israelme ne Moabme dei mei nune Ammonme dei mei ze du sut-tat me lei,

¹⁶kane Ijip gene penui hangbe luage Israelme tingkangram tatpelapat ze Sungkling Kegiebe tat kai ze Kades ge wangchang de lei.

¹⁷Chipau ting ge Israelme ne Edom gu heguang dage hepâupaume je lang gai ze, acheu sa ze, ‘Ning ram tatpela ra anui je pei lau,’ ze kacheu de lei; kane Edom gu heguang ne ’ngking mak tai de lei. Zai Moab gu heguang dage du penui lang gai de lei, kane pa ne hezuâ gai mak tai de lei. Chipauziegene Kades ge Israelme ’nnai ze bam de lei.

¹⁸Chidadege tingkangram penui tatpela ze Edomram benai Moabram tatguâ ze tat te lei, zai Moabram gene naimik pat ’mbia ge wangchang de lei, zai Arnon geuki ze wîgiam ge sieki tew gai de lei; kane Moab gu heramrai lungge penui â gut kai mak te lei, Arnon ze Moab gu heramrai geuki daseu.

¹⁹Chipau ting ge Israelme ne Heshbon ge Amorme gu heguang Sihonbe dage hepâupaume je lang gai de lei; zai Israelme ne pechu, ‘Ning ram tatpela ze anui ram ’mbe tat ra pei lau,’ kacheu de lei.

²⁰Kane pe gu heram tatpelarabe hangge Sihonbe ne Israelme je ’nnum’mmi mak tai de lei; chidadege Sihonbe ne pe gu ziemmename je gekumwang’ndui lu, Jahaz ge sieki tew lu ze Israelme je ka’nggi de lei.

²¹Zai Tingwang, Israelme Rapeu ne Sihonbe benai pe gu ziemmename leine je Israelme ba ge pei gai bei de lei, zai penui je Israelme ne ngam lu de lei; chidadege chipau heram ge lungme Amorme dei leine Israelme ne lu ’ndi de lei.

²²Zai Amorme gu heram leine Arnon gene Jabbok geuki riâ zai tingkangram gene Jordan geuki riâ penui ne lu kam ’ndi de lei.

²³Chidaze Tingwang, Israelme Rapeu ne pe gu ziemmename Israelme suagene Amorme gu sut kam ’ndi de lei; zai chiramme ze nang lu dai ra tew de semei?

²⁴Ningnui hangge ningnui rapeu Kemos ne peibe ze ningnui tei mak ra semei? Zai anui suage Tingwang anui Rapeu ne sutkai’ndibe ze â anui ne tei gu lei.

²⁵Chunage Moab gu heguangpeu, Zipporbe na Balakbe suadu nang â yibi semei? Mâdauge Israelme je pa kahekang semei, nune mâdauge penui je pa herei ka’nggi semei?

²⁶Israelme ne kum haî chum Heshbon ge benai pehuâzie keloa ramme ge bambe lua, zai Aroer benai pehuâzie keloa ramme ge bambe lua, zai Arnon geukung ge namdi ramme leine ge bamdibe ting ge, ’ndaitew ze nang chipau ting kakge lu dai le mak lau?

²⁷Chidaze I â ning peireige hemui gai me lei, zai achu nang kahereibe ziegene a peireige nang tewmau de lei; Tingwang, samrampeu zene Israelme benai Ammonme kakge peize râm’nzei gai be lau,” acheu bei de lei.

²⁸Kane Ammonme gu heguang â, Jephthabe ne pe dage langgaibe sam ze mâ-hangge du ’nning gai mak tai lei.

²⁹Chidadege Tingwang gu Herui ze Jephthabe peireige wangchang de lei, zai pa â Gilead benai Manasseram tatpelapat ze, Gileadram ge Mizpa ’mbe tat’nduâpat te lei, zai Gileadram Mizpa gene pa â Ammonme lam’mbe tat’nduâ tat ti de lei.

³⁰Zai Jephthabe ne Tingwang dage deseu gai ze, zai acheu sa ze, “Nang ne Ammonme je a ba ge pei gai zai â,

³¹Ammonme dagene hereingam lu I wang dai dezai, achu hedau ra a ki kemui gene zuapat-patbe kau ze Tingwang hang de lei, zai pechu ze rûkambe-râtewbe hangge I peipat kai gu lei,” ze kacheu de lei.

³²Chigum ze Jephthabe â Ammonme lam’mbe penui je ’nggi ra hangge kapat ti de lei; zai Tingwang ne pe ba ge penui je pei gai bei de lei.

³³Zai pa ne Aroer gene Minnith huâzie riâ namdi ’ngkai tew’nsia ’ndi de lei, zai Abel-keramim riâ chang ze Israelme masuage Ammonme je tewhelêu gai bei de lei.

³⁴Chidadege Jephthabe Mizpa ge pe ki lam’mbe wangchang de lei; zai pie le lau, pechu hedau ra hangge pe na ’mpuimi ’ntoî tei lu lim ze zuapat te lei; pe na chi runne bambepui zeu; chipaupui je sâu ze pe na ’mpeumi du zai ’mpuimi du ga de lei.

³⁵Zai pechu pa ngaugap dege, pa pe paî ramme hit ze, zai acheu sa ze, “Hei, a na ’mpuimi gau! nang ne achu tewhelêu-desang de lei, zai nang zene a hangge hereu-desangrabe deu hangge tew gai ’nde lei; Tingwang dage a mui ’ngkakpat kai ’ndi daze, I deseutewgai’ndibe ze teiheliwangdaichi lak te lei,” ze kacheu de lei.

³⁶Dadege pa ne pe peu je, “A peu gau, Tingwang dage nang ne ning mui latpat kai ’ndizai â ning mui gene zuapattibe luigum ze a peireige tew gai zu lau, chunage â Tingwang ne Ammonme ning teureime peireige hekûm ning hangge tew gai ’ndi daseu,” ze kacheu de lei.

³⁷Zai pa ne pe peu je, “A hangge aize tew gai lau; kêu na hangge a runne bam ra achu sâu gai lau, dezai I tat ze deiloa ramme ge tatrua ze, I benai a kangme ne a pum pumsanggeî je desui gai le ra hangge zeu,” ze kacheu de lei.

³⁸Zai Pa ne, “Tat chu lau,” acheu bei de lei. Zai pa ne pechu kêu na hangge langpat kai bei de lei; zai pa benai pe kangme tat ti de lei, zai deiloa ramme ge pe gu pumsanggeî je desui ze bam de lei.

³⁹Zai kêu na bamtud kai lu dege, pe peu tailam pa helatwang kadai de lei, zai pa ne pa deseugailube luigum ze pe dage tew gai bei de lei. Pa â ’mpeumi je mâdau de chigaimakbe kau de lei, zai aize Israelram ge tewbe sie chang di de lei.

⁴⁰Chize â Israelme heleume patingkum ’nsangne Gilead’mpeu Jephthabe na ’mpuimi je desui ra kum kat ge hezie medai tatka’nsui de lei.