Read Zeme Naga SAMRAMME 12 Bible Online

SAMRAMME 12 - Zeme Naga bible

SAMRAMME 12

¹Herei ra hang Ephraimme je kelau gai de lei, zai Zaphon ’mbe penui kapat lu Jephthabe je, “’Ndaitew ze Ammonme je ’nggi ra nang tatkapat lu, zai anui je ning pamtew tat ra kû gai mak lau? Anui ne ning peireige ning ki hemi ne tua gu de lei,” kacheu de lei.

²Zai Jephthabe ne penui je, “I benai a gu ziemmename ne Ammonme je ’nggi-kadesang de lei; zai ningnui je I kû gai dege, penui ba gene ningnui ne achu ’nripat kai mak te lei.

³Zai ningnui ne achu ripat kai ra mak te lei be I chî di dadege, I ne a keringbe a ba ge tei lu, Ammonme je ’nggi ra kapat te lei, zai Tingwang ne penui je a ba ge pei gai bei de lei; chidaze ’ndaitew ze achu ’nggi ra hangge nemai ge a dage ningnui wang lau,” ze acheu bei de lei.

⁴Chidadege Jephthabe ne Gilead gu ziemmena je ngua lu Ephraim je ka’nggi de lei; zai Gilead gu ziemmename ne Ephraim je ngam lu de lei, Ephraimme ne, “Ningnui Gileadme gau, Ephraim benai Manasse ruagene ningnui â Ephraim gene paktime bau lei,” ze acheu bei be ziegeneu.

⁵Zai Gileadme ne Ephraimme dagene Jordan geuki gu depiau ramme sut lu de lei. Zai Ephraimme herei gene pakme mige ne, “Tatka ra achu pei lau,” ze acheu bei tâne, Gileadme ne pechu, “Nang Ephraim’mpeu mei?” kacheu de lei. Pa ne, “Mak lei,” ze acheu bei dege,

⁶penui ne pechu, “Acheuzaine Sibboleth, acheu gai lau,” kacheu de lei, zai pa ne, “Shibboleth,” kacheu de lei, pa â chize kûchi lak dadegeu; dadege â pechu penui ne nîm lu Jordan geuki depiau ramme ge bichat kai bei de lei. Zai chipau ting ge Ephraimme chipau bâm ge chang hedai ze kena hepum kau gai di de lei.

⁷Jephthabe ne Israelme je kum seruk samram de lei. Chidadege Gilead’mpeu Jephthabe chai di de lei, zai Gilead ge pe gu namdi ge bai gai bei de lei.

⁸Jephthabe chângge Bethlehem’mpeu Ibzanbe ne Israelme je samram de lei.

⁹Pe na ’mpeumi himreu bam de lei; zai pe na ’mpuimi himreume je pe ki zat gene hela ’mbe tew’mmei gai de lei, zai pe na ’mpeumi ramme hangge hela ’mbene pa nguawang gai de lei.

¹⁰Chidadege Ibzanbe chai di de lei, zai Bethlehem ge bai gai de lei.

¹¹Ibzanbe chângge Zebulun’mpeu Elonbe ne Israelme je samram de lei; zai pa ne Israelme je kum kereu samram de lei.

¹²Chidadege Zebulun’mpeu Elonbe chai di de lei, zai Zebulun dei lungge Aijalon ge bai gai de lei.

¹³Elonbe chângge Pirathon’mpeu Hillelbe na Abdonbe ne Israelme je samram de lei.

¹⁴Pa â pe name ’mpeumi hedai zai pe chame ’mpeumi himreu hekunmerângne riaksena chingchuame bam de lei. Zai pa ne Israelme je kum desat samram de lei.

¹⁵Chidadege Pirathon’mpeu Hillelbe na Abdonbe chai di de lei, zai Ephraim dei Pirathon ge, Amalekme gu peloaram ge bai gai de lei.