Read Zeme Naga SAMRAMME 13 Bible Online

SAMRAMME 13 - Zeme Naga bible

SAMRAMME 13

¹Zai Tingwang mikngau ge tâ-kesiabe Israelme ne tew kadai de lei; zai Tingwang ne Philistinme ba ge kum hedai penui je pei gai ’ndi de lei.

²Zai chipau ting ge Zora ge bambe kau, Danme zat kau, pe ji Manoabe kacheupeu bam de lei; zai pe nâu a nakampui chang ze pe na bam mak lei.

³Zai Tingwang gu tinggîm angel’mpeu ne chipaupui je liâ ze pechu, “Pie le lau, nang â nakampui chang ze ning na bam mak te lei, kane nang ’mpung gu, zai ’mpeumi lungkeu gu lei.

⁴Chidaze ’ntîng le lau, zai wain mei nune peranchibe zau mei be sak se lau, zai ’nchimakbe â mâ de teu se lau,

⁵pie le lau, nang ’mpung gu zai ’mpeumi napoine lungkeu gu daseu, pe peî ge ’nseîne kaizet du mak ra lei, chi ’mpeumi napoine ze lungkeube gene Hera dage Nazir kau hangkat chang gu daseu; zai pa ne Philistinme ba gene Israelme je ripatrabe tâ tewchu gu de lei,” ze kacheu de lei.

⁶Chidadege ’mpuimi ne wang lu pe napeu je, “Hera gu ziemmena a dage wang de lei, zai pe ju ze â Hera gu tinggîm angel’mpeu ju gum de lei, mi hing-desang lei; pa ’ndai gene wang mei be I â pechu ’nneu gai mak te lei, zai pe ji ze achu pa ranglia mak te lei;

⁷kane achu pa ne, ‘Pie le lau, nang ’mpung gu zai ’mpeumi napoine lungkeu gu lei; chidaze wain benai hezau peranchibe sak se lau, zai ’nchimakbe â mâ de teu se lau, lungkeube gene pa chaibe mai riâ chang ze chi ’mpeumi napoine ze â Hera dage Nazir kau hangkat chang gu daseu,’ kacheu de lei,” ze acheu rang gai bei de lei.

⁸Chidadege Manoabe ne Tingwang je kiam de lei, zai acheu sa ze, “Tingwang gau, ningchu I kiam lei, Hera gu ziemmena nang ne langgaipeu je peize anui dage wang dai lau, zai lungkeurabe ’mpeumi napoine dage anui ’ndaikau tâ tew gai ra mei be geteilia lau,” ze kacheu de lei.

⁹Zai Hera ne Manoabe kuâ ’ngking bei de lei, zai helu ge ’mpuimi ze ’ntau ze bambe luage Hera gu tinggîm angel’mpeu wang kadai de lei; kane pe napeu Manoabe â pe dage bamdau mak lei.

¹⁰Chidadege ’mpuimi ne kelua ze paktat ze pe napeu je salia bei de lei, “Pie le lau, mai kat a dage wangbepeu ze achu lia de lei,” ze acheu bei de lei.

¹¹Zai Manoabe zuachu ze pe nâu chai suitat ti de lei, zai chipaupeu dage wangchang lu, pechu, “Aipaupui je ka’mpaupeu ze nang de mei?” kacheu de lei. Zai pa ne, “I de lei,” kacheu de lei.

¹²Zai Manoabe ne, “Chunage ning sam ramme wangchang dezai chi ’mpeumi napoine telungtak ze ’ndaigum bam ra, zai pa ’ndaikau tew ra lau?” kacheu de lei.

¹³Zai Tingwang gu tinggîm angel’mpeu ne Manoabe je, “’Mpuimi je I ranggaibe leine gene peize pechu ’ntîngteî ze bam lau.

¹⁴Grepchî hiâm gene patbe zat leine â ’mpuimi ze teu mak ra lei, peize pechu wain benai peranchibe ramme sak se lau, zai ’nchimakbe leine â mâ de teu mak ra lei; I ne pechu diegaibe leine ze peize pa rei ra de lei,” ze kacheu de lei.

¹⁵Manoabe ne Tingwang gu tinggîm angel’mpeu je, “Ka’nggia ze anai dage bam gai ze, anai ne ning hangge kemei poine teleu gai ra pheu gai lau,” ze kacheu de lei.

¹⁶Zai Tingwang gu tinggîm angel’mpeu ne Manoabe je, “Nang ne achu gang gai leusede ning gu hetak ze I teu ra mak lei; kane rûkambe-râtewbe nang ne kedâ lu zai â Tingwang dage chize peipat kai be lau,” ze kacheu de lei. (Manoabe â chipaupeu je Tingwang gu tinggîm angel’mpeu lei be chî mak te lei.)

¹⁷Zai Manoabe ne Tingwang gu tinggîm angel’mpeu je, “Ning sam ramme wangchang sing dezai ningchu hengêutewchi le ra hangge, ning ji ’ndaikau lau?” kacheu de lei.

¹⁸Dadege Tingwang gu tinggîm kenie’mpeu ne pechu, “Ningdaulakbe kau de lei be ngau lu ze, ’ndaitew ze a ji nang ka’nneu lau?” kacheu de lei.

¹⁹Chidadege Manoabe ne kemeipoine benai chêu peipatbe tei lu, zai ningdaulakbe tâ ramme tewpeu Tingwang dage tingchutum peireige peipat kai de lei.

²⁰Zai herâtewbe-kaira gene tinggîm ’mbia hemimelei tauchu dadege Manoabe benai pe nâu pie ze bambe luage herâtewbe-kaira gu melei gene Tingwang gu tinggîm kenie’mpeu wangkeu de lei, zai penai ju ze kedei ’mbe ’ngkumkeu di de lei.

²¹Tingwang gu tinggîm kenie’mpeu ze Manoabe benai pe nâu je liâ dai ta di de lei. Chidadege pa ze Tingwang gu tinggîm kenie’mpeu de lei be Manoabe chî di de lei.

²²Zai Manoabe ne pe nâu je, “Hera je anai ngau lu daze, anai â chai himchang gu de lei,” ze kacheu de lei.

²³Kane pe nâu ne pechu, “Tingwang ne anai je tewchat ra nung laîzai â anai ba gene rûkambe-râtewbe benai chêu peipatbe ze pa lu mak leu gu de lei, zai airamme leine teilia ze aigumbe ramme ze anai dage rangba gai mak leu gu de lei,” kacheu de lei.

²⁴Chidadege chi ’mpuimi ne ’mpeumi napoine lungkeu de lei, zai pe ji Samson ze ku de lei; zai chi ’mpeumi napoine ze chîngchu de lei, zai Tingwang ne pechu ’nnam gai bei de lei.

²⁵Zai Tingwang gu Herui ne pechu Zora benai Eshtaol kakge Mahaneh-dan gene tew’nrak kai bei de lei.