Read Zeme Naga SAMRAMME 14 Bible Online

SAMRAMME 14 - Zeme Naga bible

SAMRAMME 14

¹Timnah ’mbe Samsonbe wangkeu de lei, zai Timnah ge Philistinme na heleu’mpui hangkat je pa ngau de lei.

²Chidadege pa hang dai lu, pe peu benai pe pui je salia de lei, “Timnah ge Philistinme na heleu’mpui hangkat je I ngau de lei; a nâu chang ra pechu a hangge lu le lau,” kacheu de lei.

³Kane pe peu benai pe pui ne pechu, “Rumgetanmakme Philistinme dagene henâu hang lu ra nang tat himchangrabe hangge ning kiduîme na heleume ruage benai anui zatme leine ruage ’mpuimi katte ga di de mei?” kacheu de lei. Kane Samsonbe ne pe peu je, “A nâu hangge lu le lau; pa â a suitew’mmi-kadesang daseu,” kacheu de lei.

⁴Pe peu benai pe pui â chize Tingwang dagene pat lei be chî mak te lei; pa â Philistinme je ’nggi ra hejeupeu ze bam daseu. Chipau ting ge Israelme peireige Philistinme ne rezietei ze bam de lei.

⁵Chidadege pe peu benai pe pui je ngua lu Timnah ’mbe Samsonbe wangkeu di de lei, zai Timnah ge grepchî merie ramme ge pa wangchang di de lei. Zai pie le lau, duiluipoine ne pechu ’nrakehuâknam de lei;

⁶zai Tingwang gu Herui pe peireige peranchi-desang ze wang gai de lei, zai mige ne kemeipoine je tewpâng gum ze pa ne duilui je kuipedak kai bei de lei, zai pa â pe ba ge mâ de tei mak lei. Kane pa ne ’ndaikau tew gai mei be pe peu benai pe pui je pa â rang mak te lei.

⁷Chidadege pa wangkeu lu ’mpuimi je ka’mpau de lei; zai pa ne Samsonbe suitew’mmi-desang gai bei de lei.

⁸Zai bechâng mâtiegemakse pechu ngua ra Samsonbe wang kadai de lei; zai duilui gu herum pie gai ra pa tatgut te lei, zai pie le lau, duilui pum ge ’ngkuidung benai ’ngkuidui bam de lei.

⁹Chize pe ba ge kuipat kai lu teuzutza ze tat ti de lei; zai pe pui benai pe peu dage pa wangchang dege penai je gêsa â pei bei de lei, zai penai teu de lei. Kane duilui herum gene chipau ’ngkuidui lu lei be penai je pa â rang mak tai de lei.

¹⁰Zai pe peu ze ’mpuimi tailam wangkeu de lei, zai Samsonbe ne chige luube-bâm tew gai de lei; rehangme ne tewka’nziebe luigum zeu.

¹¹Zai pechu baudime ngau lu dege penui ne pechu ngua pe pamtewrame ziemmena himreu nguawang gai de lei.

¹²Zai Samsonbe ne penui je, “Chunage I ne hekî-kirabe ningnui dage kai che lei; ningnui ne hezie sena ne luube kakge chize ’ndaikau mei be rangchi lu, zai peupat lu zai â, I ne ningnui je banutpaî himreu benai hepuâkelei himreu pei gu lei;

¹³kane chize ’ndaikau mei be ningnui ne rangchi lak tizai â, achu ningnui ne banutpaî himreu benai kaikaheleibepuâ himreu pei ra de lei,” ze kacheu de lei. Zai penui ne pechu, “Ning gu hekî-kibe sam ze kai zu lau, anui seu le ra hangge zeu,” ze kacheu de lei.

¹⁴Zai penui je pa ne rang ze, “Teupeu dagene mâge teurabe pat lei. Peranchibe gene mâge gekumbe pat lei,” ze kacheu de lei. Zai hezie kechumne lungge chipau rimba ze ’ndaikau mei be, penui rangchi lak tai lei.

¹⁵Pamedaibe mai ge Samsonbe nâu je penui ne, “Hekî-kibe sam rimba ze ’ndaikau mei be anui je rang gai ra hangge ning napeu je kiâm le lau, ningchu benai ning peu ki ze anui ne hemi ne rû mak ra hangge zeu. Anui je tewgekum gai ra hangge anui je aige ningnui ’nnâ gai mei?” ze kacheu de lei.

¹⁶Zai Samsonbe je pe nâu ne hap ze, “Nang achu ngaugailak sing de lei, achu nang hung mak lei; a ramdeiname dage hekî-kibe sam nang ne kai de lei, zai chize ’ndaikau mei be achu nang rang mak te lei,” ze kacheu de lei. Zai pa ne pechu, “Pie le lau, A peu je du zai a pui je du I ranglia mak ze, ningchu I ranglia ra semei?” ze acheu bei de lei.

¹⁷Hezie sena luube bambe ting tâluî Samsonbe suagene pa hap bam de lei; zai pasenabe mai dege â, pe nâu ne pechu kiâm-desangbeibe ziegene pa ne rang gai bei de lei. Chidadege â pa ne hekî-kibe sam rimba ze pe ramdeiname je rang gai bei de lei.

¹⁸Zai chipau namdi gu ziemmename ne pasenabe mai gu tingnaimik kêu makge pechu rang gai ze, “ ’Ngkuidui sua kumbe ’ndaikau la lau? Duilui sua peranchibe ’ndaikau la lau?” kacheu de lei. Zai pa ne penui je, “A gu getum je ningnui helu nguapu mak nung laîzai â, A gu hekî-kibe ze ningnui peupatlak ku de lei,” acheu bei de lei.

¹⁹Zai Tingwang gu herui peranchi-desang ze pe peireige wang de lei, zai Ashkelon ’mbe pa wangkeu ze namdi gu ziemmena himreu je tewchat ’ndi de lei, zai penui gu hereichâ lu lu ze hekî-kibe sam rangkeligaibeime je hepuâkelei ramme pei bei de lei. Pe râta-desang ze pe peu ki lam’mbe helatwang dai di de lei.

²⁰Zai Samsonbe nâu je â pe gu hegiakangpeu, pa-meripeu dage pei gai dai ’ndi de lei.