Read Zeme Naga SAMRAMME 15 Bible Online

SAMRAMME 15 - Zeme Naga bible

SAMRAMME 15

¹Chipau châng mâtiegemakse dekuîmeu gatbe ting ge kemeipoine tei lu pe nâu je ’ngkiâmie ra tat te lei; zai pa ne, “A nâu tailam hekisiâm ge I gut ku lei,” kacheu de lei. Kane ’mpuimi peu ne pa gut ra lun mak te lei.

²Zai pe peu ne “Pechu nang ngaugailak-kadesangbe hangge I ’nning sing gai ’ndi de lei; chipauziegene pechu nang meripeu dage pei gai bei de lei. Pe kinapui â pa sua â heleuyibi mak semei? Pa kelei hangge pechu lu le lau,” ze kacheu de lei.

³Zai Samsonbe ne penui je, “Chunage â Philistinme je I ne mâ-tâkesiabe tew gai dezai a mâu ga du de lei,” ze kacheu de lei.

⁴Dadege Samsonbe tat ze munserung haî chum je nîm lu, zai keleu ramme tei lu, zai penui mi ramme gene chakheruawang lu, zai penui mi kena-na piheruagaibe ge keleu ret kai bei de lei.

⁵Zai keleu ramme ge pa ne hemi’ntau gai lu dege, Philistinme gu hemeu sapria bambe ge munserung ramme je ’mpat kai bei de lei, zai megau (mekummui) ramme benai hemeubang sapbe, zai olib merie ramme ’nsangdu rû kam ’ndi de lei.

⁶Chidadege Philistinme ne, “Châu ne aize tew gai lau?” kacheu de lei. Zai penui ne, “Samsonbe Timnah’mpeu chapeu tâ de lei, pe pau ne pe nâu je lupat lu pa-meripeu dage peigaidai’ndibe ziegene de lei,” ze kacheu de lei. Zai Philistinme ne wang lu ze ’mpuimi benai pe peu je hemi ne rû ’ndi de lei.

⁷Zai Samsonbe ne penui je, “Ningnui ne aigumbe tatew zai â ningnui peireige I hekûm lu gu lei, zai chipau châng dezai I sam sa ra de lei,” kacheu de lei.

⁸Pe râtapat ze penui je ’nggi ze misonggame je tewchat ’ndi de lei. Chidadege pa tat ze Etam ge hekâutelang ge tingchutegup ge bam di de lei.

⁹Chidadege Philistinme ze hang ze Juda ge tejeîki tew gai lu bam di de lei, zai Lehi namdi je chum de lei.

¹⁰Zai Juda gu ziemename ne, “’Ndaitew ze anui je ’nggi ra ningnui hang lau?” acheu bei de lei. Penui ne, “Anui â Samsonbe je pi ra hang lei, pa ne anui je tew gai gum ze pechu du tew gai ra hangge zeu,” ze kacheu de lei.

¹¹Judaram gu ziemmena chang chum Etam gu tingchukâu ’mbe wangkeu lu, zai Samsonbe je, “Philistinme â anui peireige rezieteime bau lei be nang â chî mak mei? Anui peireige ’ndaikau tâ nang tew gai se lau?” ze kacheu de lei. Zai pa ne penui je, “Achu penui ne tew gai gum ze I du penui je tew gai bei de lei,” ze kacheu de lei.

¹²Zai penui ne pechu, “Ningchu pi ra hangge anui wangkeu de lei, dezai Philistinme ba ge ningchu anui pei gai le ra hangge zeu,” ze kacheu de lei. Zai Samsonbe ne penui je, “Ningnui ne achu tewchat kai ra mak lei be a dage deseu gai lau,” ze kacheu de lei.

¹³Penui ne pechu, “Acheu me lei; anui â ningchu pi sâng pi gai lu, penui ba ge ningchu pei gai bu lei; anui â ningchu tewchat ra mak lei,” ze acheu bei de lei. Chidadege heria karchibe kena ne penui ne pechu pi lu, tingchukâu gene pechu nguahang de lei.

¹⁴Lehi ge pa wangchang dege, pechu hedau ra hangge Philistinme ’nrung ze zuapat te lei; zai Tingwang gu Herui peranchi-desang ze pe peireige wangkeu de lei, zai heria ramme pe ba ge bambe ramme ze hemi ne rûtap’ndibe gum ze kêu-pratat ti de lei, zai pechu pibe ramme ze pe ba gene ’ngngaîhuaktat ti de lei.

¹⁵Zai hekunmerângne kezara rechidabe pa ngau de lei, zai chize ne ziemmena chang-katme je kekuchat ’ndi de lei.

¹⁶Zai Samsonbe ne, “Hekunmerângne kezara ne, betum ramme ne betum ramme, hekunmerângne kezara ne ziemmena chang kat je I gî lu de lei,” kacheu de lei.

¹⁷Pa chize sa kam gai lu dege â, pe ba gene hekunmerângne kezara tuâ ’ndi de lei; zai chipau bâm ji â Rammath-lehi ze ku de lei.

¹⁸Zai herei-desang di de lei, zai Tingwang je pa kû ze acheu sa ze, “Ning guâ ka’ngguapeu ba gene aigumbe ripatbe kedibe nang ne pei gai bei de lei; zai chunage I (hedui) hereidibe ziegene chai de ra de mei, zai rumgetenmakme ba ge kau gai de ra de mei?” ze kacheu de lei.

¹⁹Zai Hera ne Lehi ge bambe bekuîki bâm latbak kai bei de lei; zai chigene hedui pat te lei; zai pa sak kai dege, pe ranchiwang kadai de lei, chipauziegene aipau bâm ji ze En-hakkore ze ku de lei; chuna ting chang ze aize Lehi ge lamui rei lei.

²⁰Zai Philistinme ting ge Israelme je pa ne kum ’ngkai samram de lei.