Read Zeme Naga SAMRAMME 16 Bible Online

SAMRAMME 16 - Zeme Naga bible

SAMRAMME 16

¹Gaza ’mbe Samsonbe tat ti de lei, zai chige hepumzuateupui je pa ngau de lei; zai pa pechu ’nna gai ’ndi de lei.

²Gazame je, “Aige Samsonbe wang gai la de lei,” ze pau gai bei de lei, zai chipau bâm ze penui ne reîguâ lu namdi keriekemui ge tingmuî tâluî pechu lîmkua ze bam de lei. Kemuibe ting tâluî penui kuâneu mak ze, “Hechua bapat mak tâne kuâ kei lei, dezai pechu anui tewchat ra de lei,” ze kacheu de lei.

³Kane Samsonbe â muisum riâ jei gai lu, zai muisum dege pa chu lu namdi keriekemui gu ’ngkam ramme tei lu pe chia kena ze du tei lu, zai ’ngkamchâp ramme, zai pelane tukpat lu pe keîtoa ge kai lu Hebron suabe-loa’ntûm ’mbe pa ne chiramme puatat ti de lei.

⁴Aipau chângge Sorek kâm ge ’mpuimi hangkat Delilale je pa ka’nrai de lei.

⁵Zai Philistinme wangpeu ramme chipau pui dage wang lu pechu, “Pechu ’ngngai le lau, zai ’ndaibe ’nchui ge pa pe ranchibe la mei be pie le lau, zai ’ndaigumbe lam gene pechu anui nîm le ra mei be, zai pe ran tew’ngga gai ra, pechu pichi le ra mei be hangge pe gu ’mpuî peu le lau; dezai anui ’nteumena mi hangkat ge gepût chang kat ze haî kat ningchu pei gu lei,” ze kacheu de lei.

⁶Zai Delilale ne Samsonbe je, “Ning ranchi-kadesangbe ’nchui ’ndai gene mei, zai ning ran tew’ngga ra hangge ’ndaigum ze ningchu pi ra mei be ka’nggia ze achu rang gai lau,” ze kacheu de lei.

⁷Zai Samsonbe ne pechu, “Tewkîgaimakbe bai’mpireu ramme sena ne penui ne achu pi dizai â, I a ran-ga du da, zai I du kêdabe kau ramme gum du de lei,” ze rang gai bei de lei.

⁸Chidadege â Philistinme wangpeu ramme ne bai’mpireu ramme sena tewkîgaimakbe kau teiwang de lei, zai chize ne pa ne pechu pi ’ndi de lei.

⁹Chunage chipaupui zene ’mpeumi ramme je helungbe kisîam ge lîmkua ra kai lu ze bam de lei. Zai pa ne Samsonbe je, “Philistinme wang mui de lei, Samsonbai!” kacheu de lei. Kane bai’mpireu ramme ze pa ne kelangria ge hemi deîtau gai bei ze taptibe gum ze tewtap ’ndi de lei, chidadege pa peranchibe tei’mbia’ndibe chî mak te lei.

¹⁰Zai Delilale ne Samsonbe je, “Pie le lau, nang ne achu teihenuitew gai bei de lei, zai karasa ne achu sa gai bei de lei, ’ndaigum ze ningchu pichi le duî mei be ka’nggia ze achu rang lau,” ze kacheu de lei.

¹¹Zai pa ne pechu, “Mâdau de pigaimakbe heria karchibe ne penui ne achu pi gai dizai â I a ran-ga du de lei, zai I du miramme kêdame gum gai du de lei,” ze acheu bei de lei.

¹²Chidadege â Delilale ne heria karchibe tei lu chize ne pechu pi gai de lei, zai pechu, “Philistinme wang mui de lei, Samsonbai!” kacheu de lei. Zai ’mpeumi ramme lîmkua ze bamme ze â helungbe kisîam ge bam de lei. Kane kelangria ramme je gum ze pe ba ge heria bambe ramme pa ne ’ndietap kam ’ndi de lei.

¹³Zai Delilale ne Samsonbe je, “Chuna riâ chang ze nang â achu teihenuitew ze lamui rei lei, zai karasa ne achu salia ze larei lei; ’ndaigum dezai ningchu pigim le duî mei be achu rang lau,” kacheu de lei. Dadege pa ne pechu, “Nang ne a peîtam-kît sena ze paîdakbe-ra ge dak’mpam gai zai hetu ne chia’ntiprip kai ’ndizai â, miramme kêdabe kau gum ze I du a ran-ga du de lei,” kacheu de lei.

¹⁴Chidadege â pa jeidibe luagene Delilale ne Samsonbe peîtam-kît sena ze tei lu paîdakbe ra ge dak’mpam gai bei de lei, zai chize pa ne hetu ne chia’ntip kai bei de lei, zai Samsonbe je, “Philistinme wang mui de lei, Samsonbai!” ze kacheu de lei. Kane pa jeibe gene ’nrakchu lu chiagaibe hetupie, zai perâ ramme chaktua ’ndi de lei.

¹⁵Zai Delilahle ne pechu, “A dage ning lung kai mak ze ’ndaigum ze nang, ‘Ningchu I hung lei’ ze acheuchi ra lau? Aipau luachum sing ze nang ne achu teihenuitew gai bei de lei, zai ’ndaibe ge ning ranchi ’ntâk ze la mei be nang â achu rang gai mak te lei,” ze kacheu de lei.

¹⁶Zai pa ne pe sam ramme ne Samsonbe je patingnaigepat kiâm ze ngit-desang bei dadege â pa lei-desang di de lei.

¹⁷Zai pa ne pechu pe lung leine salia bei de lei, zai pechu, “’Nseîne mâdau de a peî ge kai mak lei; a pui nebâm gene I â Hera hangge Nazir kau hangkat chang di daseu. A peîtam gut kai dezai â, a ranchi ne achu sâu gai ’ndu de lei; zai miramme kêdame gum ze a ran-ga du de lei,” ze acheu bei de lei.

¹⁸Pe lung leine pechu salia ’ndi de lei be Delilale ngau lu dege â, pa ne ziemmena lang gai ze Philistinme wangpeu ramme je kû gai de lei, acheu sa ze, “Chuna lua runne leusede wang dai lau, pe lung leine ze pa achu salia kam ’ndi daseu,” ze kacheu de lei. Chidadege â Philistinme wangpeu ramme pe dage wang gai de lei, zai penui ba ge rangkâng tei lu wang de lei.

¹⁹Pa ne pe nie gene pechu tew’ntim gai de lei, zai pa ne ziemmena je ku lu, zai pe peîtam-kît sena bambe ze guttua ’ndi de lei; chidadege â pa ne pechu tewsâchu di de lei, zai pe ranchibe ze pechu put kai ’ndi de lei.

²⁰Zai Delilahle ne, “Philistinme wang mui de lei, Samsonbai!” ze kacheu de lei. Zai pa kejeibe gene ’nrakchu de lei, zai acheu sa ze, “Kêdabe hî ramme ge gum ze I pat tu lei, zai a runne achu heipat ku lei,” ze kacheu de lei. Zai Tingwang ne pechu put kai ’ndi de lei be pa â chî mak te lei.

²¹Zai Philistinme ne pechu nîm lu pemik lettua ’ndi de lei, zai Gaza ’mbe pechu nguakeu de lei, zai hegeî riâ (bronze-ria) ne pechu ret ’ndi de lei; zai kebangki ge pa â chêu niak ze bam de lei.

²²Kane pe peîtam gut’ndibe chângge buachu dai ze bam de lei.

²³Chunage Philistinme wangpeu ramme penui rapeu Dagon dage herâtewbe kedibe pei gai ra, zai hengî ra wangka’ndui de lei; penui ne, “Anui rapeu ne anui teureipeu Samson je anui ba ge pei gai bei de lei,” ze kacheu dadegeu.

²⁴Zai baudime pechu ngau lu dege, penui rapeu je penui toa de lei; penui ne sa ze, “Anui rapeu ne anui teureipeu, anui ram tewka’nsiapeu, anui ruage misonggame je tewchatkam’ndipeu je anui ba ge pei gai bei de lei,” kacheu daseu.

²⁵Zai penui lung’ntakediâu ze bambe luage, penui ne, “Samsonbe je kû gai lau, dezai pa ne anui hangge heta tewlia ra hangge zeu,” ze kacheu de lei. Dadege Samsonbe je kebangki gene penui ne nguapat te lei; zai pechu penui ne teihenuitew de lei. Penui ne kechia kena kakge sap ra tew gai bei de lei;

²⁶zai Samsonbe ne rehang’mpeu pe ba zu lu patpeu je, “Heki tûngka’nsapbe chia ramme I deîtau gai ra pei lau, dezai chige I ’ngngêu gai ra hangge zeu,” kacheu de lei.

²⁷Chunage heki ge ’mpeumi ramme benai ’mpuimi ramme ne puigit ze bam de lei; Philistinme wangpeu leine â, chige bam de lei, zai ’mpûm ge ’mpeumi benai ’mpuimi ramme Samsonbe je teihenuitewbe pieme ziemmena chang chum gum ze bam de lei.

²⁸Chidadege â Tingwang je Samsonbe ne kû gai ze, acheu sa ze, “Tingwang Hera gau, achu ’ngngaî se lau. Ning dage I kie lei, zai a ran tew’nchi gai lau, chuna runne hangge I kie de lei, Hei Hera gau, chidezai a mik kena ge mik kat gu â Philistinme peireige hekûm I tew gai le ra hangge zeu,” ze kacheu de lei.

²⁹Zai Samsonbe ne heki tûngka’nsapbe kechia’ndi sûngngang ge bambe kena ge pe ba ne nîm lu, zai pe pumzie rît ze chiramme ge ’ngngêu gai lu, hezat’mbia ba ne chia kat ge, zai heku’mbia ba ne kêdabe chia ge nîm de lei.

³⁰Zai Samsonbe ne sa ze, “Philistinme ruage I chai’mpam gai ra pei lau,” kacheu de lei. Chidadege pe laîkai ze kei’ngkumkeu de lei; zai chi heki ze chige bamme saibe ramme benai baudime leine peireige kâukeu gai de lei, chidadege â pa chaibe mai ge pa ne tewchatbe ze â pe keringbe ting ge pa ne tewchatbe suane â kie’ngkeu di de lei.

³¹Chidadege â pe sikiname ’mpeumi ramme benai pe kiduîme leine wangkeu ze pechu tei lu hang ze Zora benai Eshtaol kakge pe peu Monoahbe gu heraw ge bai gai bei de lei. Pa ne Israelme je kum ’ngkai samram de lei.