Read Zeme Naga SAMRAMME 18 Bible Online

SAMRAMME 18 - Zeme Naga bible

SAMRAMME 18

¹Chipau ting ge â Israelme ram ge heguang ga lei. Zai chipau ting ge Dan zat â pa lungrabe heram hangge peurua bam de lei; chipau ting suage â Israelme heurâ ze penui peireige kêu gai mak daseu.

²Chidadege Danme ne hepumsakyime hangmengeu penui zatme leine gene Zora gene zai Eshta-ol gene, heram ze rik ra, zai ’nchet ra lang gai de lei; zai penui ne chime je, “Tat ze heram pie le lau,” ze acheu bei de lei. Zai Ephraim gu peloaram ge Mikabe ki ge penui wang gai de lei, zai chige rêu gai de lei.

³Mikabe ki hiage penui wangchang dadege Lebime rehang’mpeu kuâ ’nchetpat ti de lei; zai penui gut lu pechu, “Châu ne ningchu aige nguawang gai lau? Aipau bâm ge nang ’ndaikau tâ tew ze bam lau?” kacheu de lei.

⁴Zai pa ne penui je, “Aigum, aigum ze Mikabe ne a peireige tew gai de lei; pa ne achu puî ’ndi de lei, zai I ne pe gu tingkupeu chang di de lei,” kacheu lei.

⁵Zai penui ne pechu, “Anui tebeî tewtatbe ze tewkuak le duî mei be Hera dagene ’mmêt kai ra ningchu anui kiam de lei,” ze kacheu de lei.

⁶Zai tingkupeu ne penui je, “Temichai ze tatchu lau. Ningnui tebeîtewbe ’mpuî ze â Tingwang mikngau ge lamui lei,” kacheu de lei.

⁷Chidadege ziemmena hangmengeume bau ze tatrimna di de lei, zai Lais ge wangchang de lei, zai chige bamme ’ndaigum ze Sidonme luilung gum ze kehingbe ga ze lung mei, penui lad châm zai ’nningkategeibe ga, kedeirei heu leine ne mâ de ka’nnangga, penui heurâ bam, zai ’ndaizeuge penui â Sidonme gene deu di mei zai mî je de helak mak ze bambe tak ze ngau lu de lei.

⁸Zai penui puiname dage Zora benai Eshtaol ge penui wangchang dege, penui puiname ne penui je, “Ningnui ’ndaikau pau gai ra la lau?” kacheu de lei.

⁹Penui ne, “Chu lau, zai penui je ’nggi kei lei; heram ze anui ngau lu de lei, zai pie le lau, chige â kedei yi-desang lei. Zai ningnui â mâ de tew gai mak ra mei? Chige tat ze, zai pelung gut ze heram ze ’nram le ra hangge gîng bam ta lau.

¹⁰Ningnui tat dezai ’nningtegeimakbe kau ramme dage ningnui wang gai gu de lei; heram dit â di lei; eu lei, Hera ne chize ningnui ba ge pei gai ’nde lei, kedeirei ge mâ de ka’nnanggabe bâm zeu,” kacheu de lei.

¹¹Zai Dan zat ziemmena haî seruk hereimerua tei lu ze, Zora benai Eshtaol gene tatchu de lei,

¹²zai hang ze Juda ge Kiriath-jearim ge tejeîki tew lu bam de lei. Aipau deu gene chipau bâm ji â Mahaneh-dan ze chuna ting riâ chang ze ku de lei; pie le lau, chize â, Kiriath-jearim gene naimik kêu ’mbia de lei.

¹³Zai chigene penui tat’nduâ ze Ephraim gu peloaram ’mbe tat kai de lei, zai Mikabe ki ge wangchang de lei.

¹⁴Chidadege ziemmena hangmengeume bau Lais heram ’ngkimpie ra tatme bau zene penui puiname je, “Aipau ki ramme ge ephod, teraphim, hekilube heraluî, zai heraluî hang tewlualube la lei be ningnui chî mei? Chidaze chunage ningnui ’ndaikau tew ra mei be ’nning zun le lau,” ze kacheu de lei.

¹⁵Zai chigene tat gut ze Mikabe ki ge Lebi’mpeu bambe ki ge gut te lei, zai pa ’ndaigum bam mei be rasam ’nneu gai de lei.

¹⁶Chunage Danme gu ziemmena haî serukme penui gu hereimerua tei lu ze keriekemui hiage sap te lei;

¹⁷zai ziemmena hangmengeume bau heram ’ngkimpie ra tatme hang de lei, zai gut ze hekilube heraluî, ephod, teraphim, zai heraluî hang lualube lu ’ndi de lei, tingkupeu â sipaime haî serukme hereimerua ramme teime bau je ngua lu keriekemui hiage sap bam de lei.

¹⁸Zai aime bau ne Mikabe ki ge gut lu ze, heraluî hekilube, ephod, teraphim, zai heraluî hang lualube tei ’ndi dadege, tingkupeu ne penui je, “Ningnui ’ndaikau tew lau?” kacheu de lei.

¹⁹Zai penui ne pechu, “Ning kuâneu se lau, ning mui ning ba ne keba ne lau, zai anui chai sui le lau, zai anui hangge anui peu benai anui gu tingku hang chang le lau. Ziemmena hangkatpeu ki gu tingku tâ tewbe yi mei, nune Israelram ge pezat gu benai pe kibau gu tingku changbe yi lau?” ze acheu bei de lei.

²⁰Zai tingkupeu pe lung suiyi’nta di de lei; pa ne ephod, teraphim, zai heraluî hekilube tei ’ndi de lei, zai Israelme ruage tat ti de lei.

²¹Chidadege penui ’nreiwang dai ze napoine ramme, zai kaurui ramme, zai merua ramme penui suage kai lu ze tatrimna di de lei.

²²Mikabe ki gene tatkenak kai dege Mikabe ki hiage bamme je Mikabe ne kû lu, zai Danme je penui ’nsatat te lei.

²³Zai Danme je penui kûsa de lei, zai penui ’nreiwang lu, Mikabe je, “’Ndaikau ne ningchu tewhereu bei ze ning kumme aikieme je ngua lu wang lau?” ze acheu bei de lei.

²⁴Zai pa ne, “I ne tewbe hera ramme tei lu zai tingkupeu je ningnui ne ngua lu tat ti de lei, zai a dage ’ndaikau larei se lau? Chidaze ’ndaigum ze nang ne achu, ‘’Ndaikau ne ningchu tewkahereu lau’ ze kacheu lau?” ze kacheu de lei.

²⁵Zai Danme ne pechu, “Anui ruage ning kuâ peize seu ta lau, pe râtabe kau ramme ne ningchu bi bei ze, nang keringbe benai ning kiduîme keringbe ga’mpam gai mak ra hangge zeu,” ze acheu bei de lei.

²⁶Chidadege Danme â penui ’mpuî ra ’mbe tat ti de lei, zai penui ze â pe hangge pe ran chiran di de lei be Mikabe ngau lu dege, pa ’nreiwang dai ze pe ki lam wang dai di de lei.

²⁷Zai Mikabe ne tewgaibe je benai pe gu tingkupeu je ngau lu Danme Lais ge, chi penui lad châmbe kau benai ’nningkategeibe gabe kau ziemmena zat dage wangchang de lei, zai penui je hiazutkie mui ne gechim’nsia, zai penui gu namdi hemitua gai bei de lei.

²⁸Zai Sidon ze â deurandibe ziegene mî ne de penui je mêugai-hârabe kau ga di de lei, zai penui je â mige du helak mak te lei. Chize Beth-rehob gu teziekining ge gut te lei. Zai penui ne namdi ze tewrechichu dai ze chige penui lung de lei.

²⁹Zai penui paume Israelme dagene lungkeubepeu Danbe ji gene penui gu namdi ji Dan ze ku de lei, kane besua’ngka â chipau namdi ji ze Lais de lei.

³⁰Zai Danme ne heraluî tewlube penui hangge teichu gai de lei; zai Jonathanbe, Gershombe na, Mosabe na, zai pe na kena â heram kebang hang nîmtattibe mai riâ chang ze tingku chang ze bam de lei.

³¹Chipauziegene Mikabe gu heraluî tewlube ze Shilo ge Hera ki bam tânege teichu gai ze bam de lei.