Read Zeme Naga SAMRAMME 19 Bible Online

SAMRAMME 19 - Zeme Naga bible

SAMRAMME 19

¹Chipau ting ge Israelram ge heguang ga ze lungbe ting ge Ephraim gu peloaram gu hênam gechit ge Lebi’mpeu hangkat lung ze bam lei, Judaram Bethlehem gene pe nâu, nausîpui hangge pa lu de lei.

²Zai nausîpui ze pe peireige pe lumpum ze, zai pe dagene pa tatrimna ze pe peu ki lam Judaram Bethlehem ’mbe tat ti de lei, zai chige kêu medai bam gai di de lei.

³Chidadege â pe napeu chu lu ze pe chai suitat ti de lei, pechu kiâm gai ra, zai nguawangdairabe hangge zeu. Pa â pe dage pe guâ ka’ngguapeu hangkat zai hekunmerângne kena bam de lei, zai pa pe peu ki ge wangchang de lei; zai ’mpuimi peu zene pechu ngaugap lu dege â, pa pe suiyi ze pechu suidaupat te lei.

⁴Zai pe pau, ’mpuimi peu ne pechu gang bei de lei, zai penui dage pa hezie kechumne ’nnai gai de lei; chigum ze penui teu ze sak ze chige rêu ze bam de lei.

⁵Zai pamedaibe mai dege hechuasûn ze penui chu lu, zai pa tat ra hangge kakedâ de lei, kane ’mpuimi peu zene pe chapeu je, “Tingkuliâp kecheîne leusedu ning lungran hang teu gai le lau, zai chipau châng dezai nang tat lau,” ze kacheu de lei.

⁶Chidadege penai hangna ’ntau lu teu ze sakherua ze bam de lei; zai ’mpuimi peu zene chipaupeu je, “Ning suiyi ze tingmuî ’nnai gai rî lau, zai peize ning lung’ntaza ze bam lau,” ze kacheu de lei.

⁷Zai chipaupeu ze tat te ra zuachu dege pe pau zene pa ’nnai gai dai mak tâne kiâm bam de lei.

⁸Zai pamengeube mai ge â tat te ra hechusûn ge pa chu de lei; zai ’mpuimi peu zene, “Ning lungran tew’nchi le lau, zai naimik hegî gai mak tâne bam gai rî lau,” ze kacheu de lei. Chidadege â penai hangna mâ-teu de lei.

⁹Zai chipaupeu benai pe nâu nausîpui zai pe guâ ka’ngguame tatrimna de ra zuachu dadege, pe pau ’mpuimi peu zene pechu, “Pie le lau, naimik hegîwang de lei; nemai muî tâluî â ’nnai gai rî lau, pie le lau, ’nrîmbeting kam gai de ra gum de lei; aige rêu le lau, zai peize ning lungsui’ntaza ze bam lau; zai ’nchuamai hechuasûn nang tebeîtewtatrabe hangge hechuasûn chu lu ning ki lam tat ra de lei,” kacheu de lei.

¹⁰Kane chipau peu ze muî ’nnaikeu gai dai meu tai de lei; pa chu lu tatrimna di de lei, zai Jebus je teidabe ge chang de lei. (Chize Jerusalem de lei). Pe dage hekunmerângne kena bam lei, zai pe nâu nausîpui ze du pe dage bam de lei.

¹¹Jebus hiage penui wang dadege, naimik hegîgai di de lei, chidadege â ka’ngguapeu ne pe pau je, “Kei lei, Jebusme gu namdi ge gut kai lu chige tingmuî â rêu de kei lei,” ze kacheu de lei.

¹²Zai pe pau ne, “Hesangme gu namdi ge anui gut kai ra mak lei, Israelme zat makme dage ai; kane Gibea ’mbe anui tat’nduâtat te ra de lei,” kacheu de lei.

¹³Zai pa ne pe guâ ka’ngguapeu je, “Kei lei aipau bâm kena ruage bâm kat ge â wang’nna lu tingmuî ge Gibea ge mei nune Rama ge mei ze rêu kei lei,” kacheu de lei.

¹⁴Chidadege â chipau bâm tatpela ze tebeîtew-’nduâtat ti de lei, zai Benjamin gu Gibea taihia gene naimik keu gai di de lei;

¹⁵zai chige gut lu tingmuî ge Gibea ge rêu de lei. Zai chige pa gut lu namdi gu keloa’ndi ge ’ntau bam de lei; mî ne de pe ki ge tingmuî ge rêu ra kû gai mak tâdegeu.

¹⁶Zai pie le lau, hegî ge gechipau hangkat pe lu ge tâtew lu wang kadai de lei; chipaupeu ze â Ephraim gu peloaram gu ziemmena de lei, zai pa ze â Gibea ge lung ze bam de lei; chipau bâm gu ziemmena ze â Benjamin zatme de lei.

¹⁷Zai pa ’ngngangrakchu de lei, zai namdi gu keloaning ge tebeîtewpeu ’ntau bam de lei; chidadege â gechipau zene, “Nang ’ndai ’mbe tat ra lau? Zai nang ’ndai ’mbene wang lau?” kacheu de lei.

¹⁸Zai pa ne pechu, “Anui â Judaram ge Bethlehem gene tatpelapatme Ephraim gu peloaram ’mbe hênamram gechit ’mbe tat ra lei, chi gene I â zuapatbe kau de lei. Judaram Bethlehem ’mbe I tat te lei; zai I â a ki lam’mbe tat ra de lei; zai mî ne de pe ki ge nguagut kai mak tai lei.

¹⁹Anui dage anui gu hekunmerângne hangge megau benai hetak la lei, anui dage tingku benai wain I benai ning guâ ka’ngguapeu zai rehang’mpeu benai ning guâ ka’ngguapeu ramme hangge la lei, pelane la kam lei,” ze acheu bei de lei.

²⁰Zai gechipau ne sa ze, “Ning dage desieyibe peize bam lau; nang ka’nnangbe leine I ne ’nningtinggeu gu lei; sede keloaning gene bam tingba gai se lau,” ze kacheu de lei.

²¹Chidadege â pe ki ge pa ne nguagut kai de lei, zai hekunmerângne ramme hangge betak guî gai de lei; zai penui ne penui pî hui de lei, zai teu ze sak te lei.

²²Penui lung suiyirabe penui tew lage, pie le lau, namdi gu ziemmename, telungsiabe kau ramme zene heki ze tuaguâ ’ndi, zai ’ngkam gekeu-kagetie de lei; zai penui ne gechipau, heki’mpaupeu je, “Ning ki ge rêupeu je nguapat lau, dezai anui pechu ’nna gai ra hangge zeu,” kacheu de lei.

²³Zai chipaupeu, heki’mpaupeu penui lam zuapat lu, penui je, “Acheu me lei, a puiname gau, sia-kadesangbe tâ tew gai se lau; aipaupeu ze a ki ge guttibe ngaulube ziegene aigumbe mi ka’ngngambe tâ tew gai se lau.

²⁴Pie le lau, aige a na leusangka’nchipui benai chipaupeu gu nausîpui lamui lei; chunage penai je nguapat kai bu de lei. Penai dagene ningnui lungwângchang le lau, zai penai je ningnui ne tew nei-neibe tew zu lau; kane aipaupeu dage â mi ’ngngam-kadesangbe tâ tew gai se lau,” ze kacheu de lei.

²⁵Kane ziemmename zene pe kuâ ’ngking mak tai de lei. Chidadege chipaupeu zene pe nâu nausîpui je herak lu ze hela ’mbe penui tailam chuipat kai bei de lei, zai pechu penui ne ’nna gai ze, zai tingbapat mak tâne kemuîbe ting tâluî penui ne pechu tewkakeleu de lei. Zai tingbapat dege â penui ne pechu ’mpat kai bei de lei.

²⁶Zai hechua barapat dege â ’mpuimi ze wang lu, zai pe pau rêubeki chipaupeu ki kemui ge kâukeu gai di ze, bapat’nchichiak mak tâne bam de lei.

²⁷Zai pe pau ze hechua ge chu di de lei, zai pa ’ngkam ramme latpat dege, zai pe gu ’mpuî ra ’mbe tat te ra zuapat dadege, pie le lau, chige pe gu nausîpui pe ki kemui ge tuâ laleu de lei, pe ba ne kemuikung ge ’nggui lu zeu.

²⁸Pa ne pechu, “Chu lau, tatchu kei lei,” ze kacheu de lei, kane samkak mak tai de lei. Chidadege pa ne pechu hekunmerângne ching ge teichu gai de lei; zai chipaupeu ze zuachu lu ze pe ki lam’mbe tat ti de lei.

²⁹Zai pa pe ki gutchang dege, pa ne têgareîne tei lu, zai pe gu nausîpui je tei lu, pa ne dau kereu ze kena rumpâng gai lu, pe pum ji ramme ze Israelme gu heram leine ge lang gai bei de lei.

³⁰Zai chize ngaume leine ne, “Aigumbe â mâ dau de wangchang me rei lei, zai Ijip gene Israelme hangbe mai gene nemai riâ chang ze ngau me rei lei; ’nning gai ni lau, hekî’mmi zun lu ze sa lau,” kacheu de lei.