Read Zeme Naga SAMRAMME 2 Bible Online

SAMRAMME 2 - Zeme Naga bible

SAMRAMME 2

¹Chunage Tingwang gu tinggîm angel’mpeu Gilgal gene Bokim ge hang de lei, zai pa ne sa ze, “I ne ningnui je Ijip gene nguahang ze, ningnui peume dage I pei ra hatkaibe heram lungge ningnui je nguagut kai bei de lei, I ne, ‘Ningnui dage I samhatkaibe ze mâtew-tewsedu I tewpâng ra mak lei,

²zai aipau dei ge lungme dage ningnui samhat kai mak ra lei; penui gu herâtewbe-kaira ramme ningnui tew’nsia ra lei,’ ze rang gai de lei. Kane ningnui ne a gu samdiegaibe pheu mak te lei. ’Ndaitew ze ningnui aigumbe tew gai lau?

³Chidadege chunage I ne rang lei, ningnui suage penui je I guatua ra mak lei; kane penui zene ningnui hangge heteureime chang gu lei, zai penui rapeu ramme zene ningnui hangge ’mpia chang gu lei,” ze kacheu de lei.

⁴Israelme leine je Tingwang gu tinggîm angel’mpeu ne aipau sam ramme salia gai bei dege, baudime hapka’nrung de lei.

⁵Zai chipau bâm ji ze penui ne Bokim ze ’ntak kai de lei; zai chige penui ne Tingwang dage herâtewbe pei gai de lei

⁶Joshuabe ne baudime je langtua gai dege â, Israelme penui hang-hangge heram ’nram le ra hang tat ti de lei.

⁷Zai Joshuabe ringting tâluî, zai Joshuabe suadu ringkahekapme gechîngme, Israelme hangge Tingwang ne tâkedibe tewgaibe leine ngaulume ring ze bambe ting tâluî baudime ne Tingwang guâ ’nggua ze bam de lei.

⁸Zai Nunbe na Joshuabe, Tingwang guâ ka’ngguapeu ze pe tingkum haî kat ze kereu ge chai di de lei.

⁹Zai penui ne pechu Gaas deiloa gene tingpeî ’mbia Ephraim gu peloaram ge, Timnath-heres ge pe dei lungge bai gai bei de lei.

¹⁰Zai chipau reheime leine â chai kam di de lei; zai penui chângge rehei kêdabe, Tingwang je chî mak, zai pa ne Israelme hang tâtewgaibeibe du chimakbe rehei lungchu kadai de lei.

¹¹Zai Tingwang mikngau ge Israelme tâ-kesiabe tew ze Baal ramme je ’nggua di de lei;

¹²zai Tingwang penui peume Rapeu, Ijipram gene penui je nguapatkaibeipeu je penui sâu ’ndi de lei; penui huâzie ge bamme râ ramme ruagene kêdabe râ ramme je penui peurua di de lei; zai chiramme je penui kellum di de lei; zai penui ne Tingwang rata tew gai bei de lei.

¹³Tingwang je penui sâu ’ndi de lei, zai Baal-râ ramme benai Ashtaroth guâ ’nggua di de lei.

¹⁴Chipauziegene Israelme peireige Tingwang pe râta-desang di de lei, zai gechimruame, penui je kagechimme dage pa ne penui je pei gai bei de lei; zai pa ne penui je penui teureime penui hiage lungguâ ze bamme gu reziechibe kangge bam ra zua gai bei de lei, chidezai penui teureime je penui sapdangchi lak ra hangge zeu.

¹⁵Herei ra penui zuapat tânege, kesiabe tewgairabe hangge Tingwang ba penui peireige bam de lei, Tingwang ne kedeibe peigai’ndibe luigum, zai penui je Tingwang ne deseugai’ndibe luigum zeu; zai penui â lunghereu-desang ze bam de lei.

¹⁶Chidadege, penui je kagechimme gu rezie gene penui je ripatkaime, samramme je Tingwang ne teichu gai de lei.

¹⁷Zai chi acheusede penui gu samramme kuâ penui ’ngking mak te lei; kêdabe râ ramme dage penui hema gai di de lei, zai chime je kakellum dadegeu; penui â Tingwang gu hingde ramme kuâpheulume penui peume tatkaibe ’mpuî gene lietat-keluarâp ti de lei, zai penui â chime gum ze tew mak te lei.

¹⁸Penui gu samramme hangge Tingwang ne teichugai-gaibe lua’nsangne ge samrampeu je Tingwang ne nguabam de lei; zai chi samrampeu ringbe ting tâluî pa ne penui teureime ba gene penui je ripat kai bei de lei; penui je tewhereu ze tewsâme bambe ziegene penui huaibe ze Tingwang ne ngau’nggiadibe ziegeneu.

¹⁹Kane samrampeu chai di dege â, penui hechai ’ngngîn dai di, zai penui peume suadu, penui telung tak sia’nteu-teu ze, kêdabe râ ramme je peu ze, penui guâ ’nggua, zai chime je kellum ze bam di de lei; penui tatew ramme benai penui hekuâpheumakbe ’mpuî ramme ze katte penui sâu gai mak te lei.

²⁰Chipauziegene Israelme peireige Tingwang pe râta-desang di de lei; zai pa ne rang ze, “Aime ziemmename zene a gu samhatkaibe penui peume dage I diegai’ndibe ze hede’ngka di, zai a kuâ ze penui pheumakbe ziegene,

²¹Joshuabe ne pa chaibe ting ge ’nsakkaidiakme heramzatme je chuna gene seu ze, zat katte penui suagene I guatua ra mak lei,

²²chidezai penui peume gum ze Tingwang gu ’mpuî tat ra ’ntîngteî ze tat ku mei, nune chize tew mak ku mei be ze chiramme gene Israelme je I kedak le ra hangge zeu,” ze kacheu de lei.

²³Chidadege Tingwang ne chi heramzat ramme je, luakatne kelitua gai mak, zai Joshuabe gu reziechibe kangge penui je pei gai mak ze ’nsak kai bei de lei.