Read Zeme Naga SAMRAMME 20 Bible Online

SAMRAMME 20 - Zeme Naga bible

SAMRAMME 20

¹Gilead ge bambe heram ramme je du chak kai ze Dan gene Beer-sheba riâ ge Israelme leine benai ziemmena baudime Mizpa gene Tingwang dage mi hangkat gum ze wang’ndui gai de lei.

²Zai baudime benai Israel zatme gu ziemmena besuitewme ne penui runne penui je Hera gu ziemmena wangka’nduibe bâm ge kela gum peipat kai de lei. Zai chige hereikangme hiazutkie puame ziemmena lâk medai lei.

³(Chunage Israelme Mizpa ’mbe hang de lei, kacheube Benjaminme seu de lei) zai Israelme bau ne sa ze, “’Ndaigum ai kesiabe wangchang di mei be anui je ranglia lau?” kacheu de lei.

⁴Gîchatkai’ndipui napeu, Lebi’mpeu ne kak ze, “Benjaminram Gibea ge I wang gai de lei, I benai a nâu nausîpui tingmuî kat rêu gai ra hangge zeu.

⁵Zai achu ’nggi ra Gibea ge bamme zuachu de lei, zai tingmuîzeu ne achu heki tuagua de lei; achu penui tewchat ra tew lei, zai penui ne a nâu nausîpui je penui lungsêt tâtew gai de lei, zai pa â chai di de lei.

⁶Dadege I ne a nâu nausîpui je tei lu pechu dângdesuirui gai bei de lei, zai Israelme zat lungbe heram leine ge dâng’nchiâmpatlube kat-kat ze ’nzi kam gai de lei; penui ne Israelram ge mi ngaukatenetbe benai ngaudaulakbe tâ ramme tewbeibe ziegeneu.

⁷Pie le lau, ningnui Israelme leine gau, aige mâ-rang gai ze geteilia gai zu lau,” ze kacheu de lei.

⁸Zai ziemmename ze muikattew ze zuachu gai lu, “Pe gu paîki ge anui mî du tat ra mak lei, zai anui mî du pe ki lam’mbe helatwang ra mak lei.

⁹Kane chuna anui Gibeame peireige tâtewrabe ze â aize de lei: Anui ne chize ’nzi ra hangge hedachak lu tat ku lei,

¹⁰zai Israelme zat pelane ge ziemmena haî kat ge ziemmena hangkereu anui lu gu lei, chang kat ge haî kat zai ziemmena chang kereu ge ziemmena chang kat lu gu lei, baudime hangge aime bau ne keteu-kesak teiwang ra hangge zeu. Chidezai penui wang dezaine Israelram ge mi ningdaulakbe tâ penui ne tewgaibeibe ziegene Benjamin ge Gibea je ruî dai gu lei,” kacheu de lei.

¹¹Chigum ze Israelme leine muikattew lu ze namdi ze ’nggi ra wangka’ndui de lei.

¹²Benjamin zat leine dage Israel zatme ne ziemmena lang gai lu acheu sa ze, “Ai ningnui ruage aigumbe tâ-kesiabe tewbe wangchangbe ze sia-desang de zeî lau?

¹³Chidaze chuna Gibea ge ziemmena kesiame bau je ningnui peipat kai be lau, dezai penui je anui ne tewchat ne ra, zai mâ-kesiabe Israelme dage lutua kam ne ra hangge zeu,” kacheu de lei. Kane Benjaminme â penui puiname Israelme kuâ ’ngking mak lei.

¹⁴Zai Israelme je herei’nggi ra Gibea namdi ramme gene Benjaminme wangherua gai de lei.

¹⁵Gibea ge bamme ziemmena kelângpatlume haî sena gekumwanggailube peireige Benjaminme â penui gu namdi ramme gene ziemmena hiazutkie teime chang ’ngkai serukme je penui gu namdi ramme gene kelau’nduiwang gai de lei.

¹⁶Aime ruagene kelâng’nchichiakpatkailume ziemmena haî sename ze hekuchâp kau ramme lei; ’nteumena ne hetam-kie kat tingchukâng ne kapbut mak ze kaptaukamduibe kau lei.

¹⁷Kane Israelme Benjamin je chak kai mak ze, hiazutkie teime ziemmena lâk medai je gekumwang’ndui gai de lei, aime ziemmena ’nteumename ze hereizeuchime bau kam lei.

¹⁸Israelme zuachu ze Bethel ’mbe hang de lei, zai Hera dagene mâ-ka’mmêt te lei, “Benjaminme je ’nggi ra anui ruage châu ne zuapatrai ra lau?” kacheu de lei. Zai Tingwang ne rang ze, “Juda ne hangraî ra de lei,” kacheu de lei.

¹⁹Chidadege Israelme hechua ge chu de lei, zai Gibea hiage tejeîbâm tew de lei.

²⁰Israelme ne Benjaminme je ’nggi ra zuapat te lei; zai Israelme ne Gibea ge penui je ’nggi ra hereizeu teleu gai de lei.

²¹Benjaminme Gibea gene zuapat te lei, zai chipau mai ge Israelme chang ’ngkai ze kena hepum kâu di de lei.

²²Kane ziemmename, Israelme penui lung tew’ngkuu lu, zai chipau bâm ge hereizeu teleu gai kadai de lei, keraîbe mai ge teleugaibe luîrun zeu.

²³Zai Israelme Tingwang masuage hang lu, hegî riâ chang ze hap te lei; zai penui ne Tingwang dage ka’mmêt te lei, “Anui puiname Benjaminme je herei ra anui wang’nna dai ra mei?” kacheu de lei. Zai Tingwang ne rang ze, “Penui je ’nggi zu lau,” ze kacheu de lei.

²⁴Chidadege pakenabe mai ge Benjaminme je ’nggi ra Israelme penui wang’nna kadai de lei.

²⁵Zai penui je ’nggi ra Benjaminme Gibea gene lua pakenabe zuapat kadai de lei, zai kedei ge Israelme hepum kâugaidime chang kereu ze desat de lei; aime leine ze hiazutkie puame ziemmename de lei.

²⁶Chidadege Israelme leine hereikang baudi luî, Bethel ge hang lu ze hap te lei; chige Tingwang masuage ’ntau ze, hegî riâ chang ze chipau mai ge teseurei ze bam de lei, zai Tingwang masuage kerube-râtewbe ramme benai desieyibe-râtewbe ramme peipat kai de lei.

²⁷Chidadege Israelme ne Tingwang dage mâ-ka’mmêt te lei, chipau ting ge Hera gu hingdebung â chige bam dadegeu,

²⁸zai Aaronbe na, Eleazarbe na Phinehabe ne (hingdebung suage chipau ting ge ngua’nggua ze bam de lei), acheu sa ze, “Anui puina Benjaminme je ’nggi ra anui zuapat dai ra rei mei, nune anui sau de ra de mei?” acheu zeu. Zai Tingwang ne rang ze, “Hang zu lau, ’nchuamai ge penui je I ne ning ba ge pei gai gu daseu,” kacheu de lei.

²⁹Chidadege Gibea je lîmkuaguagit ze bam ra Israelme ziemmena ling gai de lei.

³⁰Zai pakechumbe mai ge Benjaminme je ’nggi ra Israelme zuapat ti de lei, zai kêdabe hî ramme ge gum ze Gibea je sapdapa bam de lei.

³¹Zai Benjaminme ne baudime je ’nggi ra zuapat te lei, zai namdi gene ngualietat’ndeu di de lei; zai kêdabe hî ramme ge gum ze penui ne gechim chu di de lei, zai hanggesame je â tewchat ’ndi de lei, puidi ramme ge, chiramme ruage ’mpuîki kat â Bethel ’mbe zai kêdabe â Gibea ’mbe tatbe ’mpuî ge zai heduloa ge du Israelme hanghimreu gum ze chai di de lei.

³²Zai Benjaminme ne sa ze, “Keraîbe luage gum ze penui je â tew’nriam gai bei de lei,” ze kacheu de lei. Kane Israelme ne, “Pak zu kei lei, zai penui je namdi gene puidi ramme lam’mbe guatua’ndeu ne kei lei,” ze kacheu de lei.

³³Zai Israelme leine penui bambe bâm gene zuachu de lei, zai Baal-tamar ge sapdapa gai de lei; zai Israelme ’mbai lu lîmkua ze bamme leine penui bâm bâm gene zuachu lu Geba gene naimik kêu ’mbia gene pakpat te lei.

³⁴Zai Gibea je ’nggi ra hangge Israelme ruagene kelânglume chang kereu wang de lei, zai herei ze pecheuchi-kadesang de lei; kane Benjaminme â penui peireige tew’nsiagairabe na di de lei be chî mak te lei.

³⁵Zai Israelme suage Benjaminme hereingam lak ra Tingwang ne tew gai bei de lei; zai chipau mai ge Israelme ne Benjaminme je chang ’ngkai ze mengeu ze haî kat je tew’nsia ’ndi de lei; aime leine ze hiazutkie puame bau de lei.

³⁶Chidadege penui â ngam lak ti de lei be Benjaminme ngau di de lei. Gibea namdi je ’nggi ra ’mbai lu lîmkuadime je penui ’nnumtewbe ziegene Israelme ne Benjaminme hangge kedeiza ’mbia gai de lei.

³⁷Lîmkua ze bambe ziemmena ramme ne kelua ze Gibea namdi ’mbe guâwang de lei; ’mbai lîmkua ze bamme zene zuapat ze hiazutkie ne namdi pelane gechim’nsia kam ’ndi de lei.

³⁸Chunage Israelme benai ’mbai lîmkua ze bamme kakge ka’nchetbe hang teleugaibe ze â namdi gene hemika kemâukang gum ze pat ra penui ne tew gai dezai,

³⁹Israelme herei’nggichu ra de lei, chunage Benjaminme â hebi chu di de lei, zai Israelme je hanghimreu gum ze tewchat ’ndi de lei; penui ne rang ze, “’Nggiraibe lua gum ze anui suage penui je â gechimkau ’ndi de lei,” kacheu de lei.

⁴⁰Kane hemika hiaribe gene ’nchet ra namdi gene zuachube ngau dadege â Benjaminme hechai ’nriakpie de lei; zai pie le lau, namdi luî hemika gene tinggîm ’mbe chu di de lei.

⁴¹Chidadege â Israelme ’nreiwang kadai de lei, zai Benjaminme â penui duângga di de lei, tew’nsiarabe penui hiage la de lei be penui ngau di dadegeu.

⁴²Chipauziegene Israelme masua gene tingkangram ’mbe pak kai de ra hechai ’nriktat ti de lei; kane herei ne penui je guachang di de lei, zai namdi gene zuapatme zene penui zuilung gene penui je tew’ngga kam ’ndi de lei,

⁴³Benjaminme je â guâgit lu ze, penui ne gua’nchu ze, zai penui je Noha gene Gibea gu naimik pat ’mbia teidabe bâm riâ chang ze chaîkeniak’nsia kam gai bei de lei.

⁴⁴Ziemmena gekuube kau ramme Benjaminme chang kereu ze desat kâu di de lei.

⁴⁵Zai penui keliktat ze Rimmon gu tingchutum ’mbe tingkangram ’mbia paktat ti de lei; puidi ramme gene penui ruage chang-mengeume je â bikau kam ’ndi de lei, zai penui je Gidom ’mbe gua’nchumiechang gai de lei, zai penui ruage ziemmena chang na je â bichat ’ndi de lei.

⁴⁶Chidadege Benjaminme chipau mai ge hepum kâudime ze â hiazutkie puame bau chang ’ngkai ze mengeu de lei, penui ’nteumena gekuube kâu kam de lei.

⁴⁷Kane ziemmena haî seruk tatkeliktat ti, zai Rimmon gu tingchukâuki ge tingkangram ’mbia penui pak kai di de lei; zai Rimmon tingchukâuki ge kêu medai bam di de lei.

⁴⁸Zai Israelme ne Benjaminme je ’nggikedetwang dai ze, hiazutkie ne penui je bichat te lei, ziemmena benai hekaune ramme zai penui ne peudaulu-lube tewka’nsia de lei. Zai namdi ramme penui peudau-lube leine â, hemi ne rû’nsia kam ’ndi de lei.