Read Zeme Naga SAMRAMME 21 Bible Online

SAMRAMME 21 - Zeme Naga bible

SAMRAMME 21

¹Chunage Israelme Mizpa ge kadeseu de lei, “Anui ruage mî de pe na ’mpuimi je Benjamin zatme dage pei gai mak ra lei,” ze acheu zeu.

²Zai baudime Bethel ge wangka’ndui de lei, zai chige hegîting chang ze Hera masuage ’ntau lu, zai penui ’nrung ze lungsittew ze hap te lei.

³Zai penui ne, “Tingwang Israelme Rapeu gau, ’ndaitew ze aize Israelme dage wangchang lau, Israelme ruage nemai ge zat kat gagaiderabe nung zeu?” kacheu de lei.

⁴Zai hechua ge baudime chuzisi lu, zai chige herâtewbe-kaira tewchu gai de lei, zai kerube-râtewbe ramme benai desieyibe-râtewbe ramme peipat kai de lei.

⁵Zai Israelme ne sa ze, “Tingwang dage wangka’nduibe ge Israelme zat leine gene ’ndaibe zat ze wang mak lau?” kacheu de lei. Mizpa ge Tingwang dage hangmakbe kau deu ge penui deseu gai ’ndi daseu, “Pechu â tewchat ne ra lei,” acheu zeu.

⁶Zai Israelme ne pe kinapeu Benjamin je ngau’nggia di de lei, zai acheu sa ze, “Israelme ruagene zat kat â nemai gene ga di de lei.

⁷’Nsakpatme nâume hangge anui ’ndaikau tew gai ra lau, anui na heleume ramme je penui nâu hang pei mak ra lei ze anui ne Tingwang dage deseugai’ndibe ziegeneu?” ze kacheu de lei.

⁸Zai penui ne, “Israelme zat ramme ruagene ’ndaibe zat ze Mizpa ge Tingwang dage wang gai mak lau?” kacheu de lei.

⁹Zai pie le lau, tejeîbâm, ka’nduibe ge, Jabes-gileadme ruagene mî de wang mak te lei.

¹⁰Chidadege chige wangka’nduibe zene penui gu hereikang gekume ziemmena chang kereu ze kena lang gai de lei, zai acheu ze samdie gai ze, “Tat ze Jabes-gileadme je hiazutkie ne bichat kam ne zu lau; ’mpuimi benai napoine ramme je du bichat kam ne lau.

¹¹Aigum ze ningnui tew ra lei; ’mpeumi leine je zai ’mpuimi ramme ’mpeumi je ’nnagai’ndibe kau leine je â tew’ngga kam ne ra lei,” kacheu de lei.

¹²Zai ’mpeumi je ’nnagaimakbe kau heleu ka’nchime haî medai Jabesh-gilead ge lungme dagene penui peudau de lei; zai Kanaanram ge Shilo ge tejeîbâm ge penui ne chime je nguawang de lei.

¹³Chidadege baudime wangka’nduime zene Rimmon hekâutelang ge baudime Benjaminme je lang gai ze desieyibe sam rangba gai de lei.

¹⁴Zai chipau ting ge Benjaminme helatwang kadai de lei; zai penui ne Jabesh-gilead gene tew’nringgailume heleume je penui dage pei gai bei de lei; penui zene du chime hangge periak ’nsanglak te lei.

¹⁵Zai Israelme ruage zat kat â perua bam ra Tingwang ne tewgai’ndibe ziegene Benjaminme je baudime ngau’nggia di de lei.

¹⁶Chidadege wangka’nduibe ge gechîngme ne, “Pe nâu hang ngau’nsanglaktime hangge penui nâu ramme hangge anui ’ndaikau tew gai ra lau, Benjaminme ruagene ’mpuimi ramme je â tew’ngga kam ’ndi daseu?” ze kacheu de lei.

¹⁷Zai penui ne, “Israelme ruagene pezat je tew’ngga gai mak ra hangge Benjaminme ’nsakpatme hangge, penui hangge rehei teiheduakeurabe hang ’nnang sing lei.

¹⁸Sede anui na heleume ramme je â penui nâu ramme hangge peichi lak te lei,” kacheu de lei.

¹⁹Chidadege penui ne, “Pie le lau, Shilo ge Tingwang gu patingkum-ngi ze, chize Bethel gene tingpeî ’mbia, Bethel gene Shekem ’mbe tatbe puidi gene naimikpat ’mbia ge, zai Lebona gene tingpî ’mbia bambe ge bam gu de lei,” ze kacheu de lei.

²⁰Chidadege penui ne Benjaminme je samdie gai ze, acheu sa ze, “Tat ze grepchî merie ramme ge lîmkua ze bam lau,

²¹zai ’nchet le lau, helim-limbe ramme ge Shilome heleume ramme lim ra hangge pat zai â, grepchî merie ramme gene zuapat ze penui je mi nâu-nâu hangge Shilome heleume ruagene nîm lu ze Benjaminme dei ’mbe tatchu lau.

²²Penui peume benai penui sikiname ’mpeumi ramme ne ningnui dage zuamie ze kiâ lêuzai â, ningnui ne, ‘Herei ge ningnui dagene penui je anui nâu hangge lu mak tai daze, penui je anui nâu hangge lu ’nde ra pei lau. Zai ningnui ne penui je anui hang pei mak taibe ziegene ningnui gu samhatkaibe ze ningnui ne tewka’nsiabe chang ra mak lei’ ze ningnui acheuchi duî lei,” ze kacheu de lei.

²³Dadege â chigum ze Benjaminme ne tew de lei, zai kelimme bau ruagene penui nâu-nâu hang ngua lu tat ti de lei; chidadege â penui ram ’mbe helattat dai lu ze penui gu namdi tewchu kadai de lei, zai chige penui lung ze bam lei.

²⁴Zai chipau ting dege â Israelme chigene mi zat-zat lam benai mi kiduî-duîme lam, zai chigene mi dei-dei ’mbe tat kam di de lei.

²⁵Chipau ting ge â Israelme ruage heguang ga ze lung de lei; ’nteumena ne mi dage yi-yibe tew ze bam lei.