Read Zeme Naga SAMRAMME 3 Bible Online

SAMRAMME 3 - Zeme Naga bible

SAMRAMME 3

¹Chunage aipau heram zat ramme ze Tingwang ne penui gene Israelme je kedak le ra, chize Kanaanram ge kahereibe ’ndâugaimakme, Israelme leine je kedak ra ’nsakkaibe zat ramme de lei;

²aize â Israelme haîhikme, kahereibe ze ’ndaikau mei be chî le ra, dezai chize besua’ngka ge mâ de chimakbe kau je leusedu kahereibe tak pa ne geteiliagairabe hanggene de lei.

³Heram zat ramme ze airamme de lei: Philistinme wangpeu ramme hangmengeu, zai Kanaanme leine, zai Sidonme, zai Hibme, Lebanon Deiloa ge, Baal-hermon Deiloa gene Hamath chak riâ chang ze lungme ze de lei.

⁴Penui ze â Israelme je kedakrabe hangge Mosabe dagene penui peume dage Tingwang gu hingde ramme pa ne diegaibe Israelme ne pheu gu mei be chilerabe hanggene bam de lei.

⁵Chidadege Israelme â Kanaanme, Hethme, Amorme, Perizme, Hibme, zai Jebusme ruage ngualung ze bam de lei,

⁶zai penui nâu hangge chime leu ramme je lu de lei, zai chime na rehangme hangge penui na heleume je kai de lei; zai chime rapeu ramme guâ penui ka’nggua de lei.

⁷Zai Israelme â Tingwang mikngau ge tâ-kesiabe tew ze, penui Rapeu Tingwang je ’ngngaî ’ndi, zai Baal-râ ramme benai Asheroth guâ ’nggua di de lei.

⁸Chipauziegene Israelme peireige Tingwang pe râta-desang di de lei, zai pa ne Mesopotamia gu heguang Kusan-rishathaimbe ba ge penui je zua gai bei de lei; zai Israelme kum desat Kusan-rishathaimbe guâ ’nggua ze bam de lei.

⁹Kane Israelme ne Tingwang je kû gai bei dege â, Israelme je ripatkairapeu, penui je ripatkaibeipeu, Kalebbe kinapeu Kenazbe na Othni-elbe je Tingwang ne teichu gai bei de lei.

¹⁰Tingwang gu herui pe peireige wangchang de lei, zai pa ne Israelme je samram de lei; herei ra pa zuapat te lei, zai Tingwang ne Mesopotamia gu heguang Kusan-rishathaimbe je pe ba ge pei gai bei de lei; zai Kusan-rishathaimbe peireige pa â pe ba ranchibe bam de lei.

¹¹Chigum ze kum hedai heram ’ntâk ze bam de lei. Chipau chângge Kenazbe na Othni-elbe chai di de lei.

¹²Zai Tingwang mikngau ge tâ-kesiabe Israelme ne tew kadai de lei; zai Israelme je ’nggi ra Moab gu heguang Eglonbe je Tingwang ne pe ran tew’nchi gai bei de lei, Tingwang mikngau ge tâ-kesiabe penui ne tewgai’ndibe ziegeneu.

¹³Pa ne Ammonme benai Amalekme je pe dage kelauwang’ndui gai lu, tat ze Israelme je hereingam lu de lei; zai mêupi bang ramme bambe namdi ze penui ne sut’ndi de lei.

¹⁴Zai Moab gu heguang Eglonbe je Israelme kum kereu ze desat ’nggua ze bam de lei.

¹⁵Kane Tingwang je Israelme ne kû gai bei dege, penui hangge ripatpeu Gerabe na Ehudbe, Benjamin kiria kau, hekuchâpbe je Tingwang ne teichu gai bei de lei. Israelme ne penui gu ’mpuâ ze Moab gu heguang Eglonbe dage mei gai ra pe dagene lang gai de lei.

¹⁶Zai Ehudbe â pe runne pe hangge hiazutkie muinalam bambe, desâu kat riâ tiebe kau teleu lu ze bam de lei; zai chize pa hezat’mbia ’ngkoa ge reu gai lu pe paî kangge kaichim lu bam de lei.

¹⁷Zai Moab gu heguang Eglonbe dage pa ne ’mpuâ mei de lei. Eglonbe â lungkahechâbe ziemmena de lei.

¹⁸Zai Ehudbe ’mpuâ mei gai lu dege, ’mpuâ pungwangme ziemmena ramme je pa ne langtua ’ndi de lei.

¹⁹Kane pa â Gilgal hiage tingchu ne mâ-luîtewbe ge helatwang dai lu, zai acheu sa ze, “Heguang gau, ning hangge a dage hekimsam lamui lei,” ze kacheu de lei. Zai pa ne, “Rim bam gai lau,” ze die gai bei de lei. Zai pe dagene pe kumme hela zuapat kam di de lei.

²⁰Zai hegeikinbe ’mpûm ge bambe kisîam ge pa pe runne ’ntau lage Ehudbe pe dage wang de lei. Zai Ehudbe ne, “Ning hangge Hera dagene samkela peibe a dage lamui lei,” ze acheu bei de lei. Zai pe bâm gene pa zuachu de lei.

²¹Ehudbe pe ba heku’mbia ne hezat’mbia ’ngkoa gene hiazutkie tatpat lu, pe bungpui ge gechi gai ’ndi de lei;

²²zai hekie pak runne makse pa’nda du gut’mpam di de lei, zai hekiemui jâm ze pe châ ne kuptenai ’ndi de lei, pe bungpui gene hekie ze pa tukpat mak tadegeu; zai pe chai ’mbe pelapat ti de lei.

²³Chidadege Ehudbe â kegup ’mbe zuapat lu, ’mpûm ge bambe kisîam gu ’ngkam ramme kainam gai lu, zai chize bechâp kainam kam gai ’ndi de lei.

²⁴Pa tatti dege pe guâ ka’ngguame wang de lei; zai ’mpûm ge bambe kisîam gu ’ngkam ramme kainamkam’ndibe penui ngau lu dege, “Hegeikinbe kisîam lungge pa â sautemi gai di sing de lei,” ze penui ’nning gai de lei.

²⁵Zai penui kuâlielak-desangdibe riâ kuâ gai de lei; kane pa ne ’mpûm ge bambe kisîam gu ’ngkam ramme lat kai suamak ze bam bei dadege, penui ne chabi tei lu ze ’ngkam ramme lat kai de lei; zai chige penui gu heguang chai di ze kûngduaki ge tuâ laleu de lei.

²⁶Penui gîngnakkaidibe luage Ehudbe â pak’mbia di de lei, zai tingchu ramme ne mâ-luîtewgaibe bâm tat’nzûtat ti de lei, zai Se-ira ’mbe pak’mbia gai di de lei.

²⁷Pa wangchang dege Ephraim gu peloaram ge hegeîluîkie pa ’mmut kai de lei; zai peloaram gene Israelme je pa ngua lu, pa ne penui sua raî lu ze wangkeu de lei.

²⁸Zai pa ne penui je, “A chai sui le lau; ningnui ba ge ningnui teureime Moabme je Tingwang ne pei gai ’nde lei,” ze rang gai de lei. Chidadege penui pe chai suikeu di de lei; zai Jordan geuki depiau ramme Moabme kabe bâm penui ne reî ’ndi de lei, zai ziemmena hangkat ’nsangdu tatka ra lun mak te lei.

²⁹Zai penui ne chipau luage Moabme pumchi leine, hepumsakyime ziemmena chang kereu gum ze tewchat ’ndi de lei; hangkatte ’nsakpat mak te lei.

³⁰Chigum ze Israelme ba kangge chipau mai gene Moabram je tewhelêu gai bei de lei, zai heram ze kum riakdesat riâ sau’ntak ze bam de lei.

³¹Bechâng ge Anathbe na Shamgarbe pat te lei, pa ne getum kumbe tui ne Philistinme ziemmena haî seruk je tewchat ’ndi de lei; pa du Israelme je ripat kai de lei.