Read Zeme Naga SAMRAMME 4 Bible Online

SAMRAMME 4 - Zeme Naga bible

SAMRAMME 4

¹Zai Ehudbe chaidibe chângge Israelme ne Tingwang mikngau ge tâ-kesiabe tew kadai de lei.

²Zai Tingwang ne penui je Kanaanram gu heguang, Hazor ge kaheguangpeu Jabinbe ba ge zua gai bei de lei; pe gu hereikang muiteipeu â Harosheth-ha-goiim ge lungpeu Siserabe de lei.

³Chidadege ’ngngâ gai ra hangge Israelme Tingwang je ku de lei; chipaupeu dage â hegeî ne tewbe hekuntimriang haî sekui bam, zai pejaîsiabe gene Israelme je kum ’ngkai tewsâ ze bambe ziegeneu.

⁴Chunage Lappidothbe nâu, kemeu tewpui Deborale ne Israelme peireige chipau ting ge samram ze bam de lei.

⁵Pa â Ephraim gu peloaram ge Rama benai Bethel kakge Debora gu mêupi bang kangge ’ntau ka’nsui lei; zai samram gai ra hangge Israelme pe dage wang de lei.

⁶Pa ne ziemmena lang gai ze Naphtaliram ge Kedes gene Abino-ambe na Barakbe je kûwang gai lu, pa ne pechu, “Tingwang, Israelme Rapeu ne ningchu samdie gai de lei, ‘Tat chu lau, Tabor Deiloa’ntûm ge ningnui gu ziemmename je nguawangherua gai le lau, Naphtali zat benai Zebulun zat gene ziemmena chang kereu je tei le lau.

⁷Dezai I ne Siserabe, Jabinbe gu hereikang muiteipeu je pe gu hekuntimriang benai pe gu hereikangme je ngua lu ze Kishon geuki kung ge ningchu hedau ra nguapat kai bu lei, zai I ne pechu ning ba ge pei gai bu lei,’ kacheu de lei,” ze rang gai bei de lei.

⁸Barakbe ne pechu, “A dage nang nguatat ra zai â I tat ku lei; kane nang ne a dage nguatat mak ra zai â I tat ra mak lei,” ze kacheu de lei.

⁹Zai pa ne, “Ning dage I nguatat sing gu lei; acheuleusede nang tatbe ’mpuî zene ningchu ning ngeudirabe hangge ngua gai ra mak lei, Tingwang ne Siserabe je ’mpuimi ba ge zua gai ’ndu daseu,” ze acheu bei de lei. Chidadege Deborale zuachu lu, Barakbe benai pa Kedes ’mbe tat ti de lei.

¹⁰Barakbe ne Zebulun zat benai Naphtali zat je Kedes ge kû’ndui gai de lei; zai ziemmena chang kereu pe chai suihang de lei; zai Deborale du pechu ngua’mpam hang de lei.

¹¹Chunage Ken’mpeu Heberbe â kêdame Kenme Mosabe pau Hobabbe chaname dagene bamchâm di de lei, zai pa â Kedes hiage bambe Za-anannim ge ’mpubang riâ chang ze pe gu paîki liâm gai de lei.

¹²Tabor Deiloa’ntûm ’mbe Abino-ambe na Barakbe hang di de lei be Siserabe dage pauchang gai bei dege â,

¹³Siserabe pe gu hekuntimriang ramme leine, hegeî ne tewbe hekuntimriang ramme haî sekui, zai pe gu ziemmename Harosheth-ha-goiim gene Kishon geuki riâ chang ze pe dage bamme leine je kûpat te lei.

¹⁴Zai Deborale ne Barakbe je, “Zuachu zu lau! Tingwang ne Siserabe je ning ba ge peigaibe mai nemai tingnaimikpui ze daseu. Ning suage Tingwang ne raîtat ti de mak semei?” ze kacheu de lei. Chidadege Tabor Deiloa gene ziemmena chang kereume ne pe chai sui lu ze Barakbe wangkeu di de lei.

¹⁵Zai Siserabe benai pe gu hekuntimriang ramme leine zai pe gu hereikangme leine je Tingwang ne Barakbe suage hiazutkie gene gechim’nsia kam ’ndi de lei; zai Siserabe pe gu hekuntimriang gene wangkeu lu, pe pî ne pak ti de lei.

¹⁶Zai Barakbe ne hekuntimriang ramme benai hereikangme Harosheth-ha-goiim riâ gua’nchutat te lei, zai Siserabe gu hereikangme leine hiazutkie mui gene kâu kam gai di de lei, hangkatte ’nsakpat mak te lei.

¹⁷Kane Siserabe â pe pî ne Ken’mpeu Heberbe nâu Jaelle gu paîki ge pak kai di de lei; Hazor gu heguang, Jabinbe benai Ken’mpeu Heberbe kiduîme kakge desieyibe bam dadegeu.

¹⁸Zai Siserabe je suidau ra Jaelle zuapat te lei, zai pechu, “Gut kai lau, a pau gau, a ki ge gut kai lau, mâ de hing se lau,” ze kacheu de lei. Chidadege paîki ge pe ki ge pa gut kai di de lei, zai pa ne paî ne pechu tapsung gai bei de lei.

¹⁹Zai pa ne Jaelle je, “I sak kai ra hedui kecheîne achu pei lau; I herei di daseu,” ze kacheu de lei. Chidadege pa ne hemeigei ne tewbe tungduibung latpat lu ze pechu sak ra pei gai lu, pechu tapsung gai dai bei de lei.

²⁰Zai pa ne Jaelle je, “Paîki kemui ge sapkua le lau, zai mige wang ze ningchu ’nneu ze, ‘Aige mige la mei?’ ze acheu lêuzai â, ga lei ze acheu be lau,” ze rang gai bei de lei.

²¹Kane Heberbe nâu Jaelle ne paîki gu heria chakbe ’ntung tei lu, pe ba ge tediak tei lu, zai binne ze pe tailam wang lu kedei lung ’mbe ’ntung ze giapelagut temak tâne pateulup gene ’ntung ze giagut kai bei de lei, pa â lei-desang di ze jeihungkeudibe ziegeneu. Chigum ze pa chai di de lei.

²²Zai pie le lau, Siserabe je Barakbe ’nchumiewang dadege, pechu suidau ra Jaelle zuapat te lei, zai pa ne pechu, “Wang lau, dezai nang peubepeu je I ne ngualia bu lei,” ze kacheu de lei. Chidadege Jaelle gu paîki ’mbe pakgut ti de lei; zai chige Siserabe pateulup ge paîki ’ntung ne gia lu chai di ze tuâbambe ngau de lei.

²³Chigum ze Hera ne Kanaanram gu heguang Jabinbe je Israelme suage hereingam gai bei de lei.

²⁴Zai penui ne Kanaanram gu heguang Jabinbe je tew’nsia gai ’nde mak tâne, Kanaanram gu heguang Jabinbe peireige Israelme ba ranchibi-bi ze bam de lei.