Read Zeme Naga SAMRAMME 5 Bible Online

SAMRAMME 5 - Zeme Naga bible

SAMRAMME 5

¹Chidadege Deborale benai Abino-ambe na Barakbe ne chipau mai ge heleutew de lei:

²“Israelme ruage besuitewme ne nguaraîtatbeibe ziegene, baudime ne ’nchâchai ze penui pum peipatkaibeibe ziegene, Tingwang je toa lau!

³“’Ngking le lau, heguangme gau; ningnui kun ’ndualie le lau, heguangsinme gau, Tingwang dage I ne kehingbing ze toa gu lei, Israelme Rapeu dage zeu.

⁴“Tingwang gau, Seir gene nang zuapatbe luage, Edomram gene nang tatpatbe luage, kedei-kaketei de lei, zai tinggîm ramme gene tingzau de lei, eu lei, kemâu ramme ne hedui ruikeu gai de lei.

⁵Tingwang suage Kedeiloa’ntûm ramme kakechuî de lei, Israelme Rapeu Tingwang suage wîbe Sinai loa gezeu.

⁶“Anathbe na Shamgarbe zai Jaelle ting ge, tebeî kangzangtewme sau di, zai keliktatbe ’mpuî ramme gene tebeîtewme ze tat te lei.

⁷Keloame helu tâ tewbe telungtak ze Israelram ge sau di de lei, nang zuachu mak tânege ai, Hei Deborale, Israelram ge hêpui gum ze zuachu de lei.

⁸Karchibe rapeu ramme je kelâng gai bei dege, keriekemui ramme ge herei wangchang de lei, Israelram ge chang hedaime ruage hinggei benai hengeu ngau mei?

⁹Ziemmename ruagene penui runne penui je ’nchâchai ze peipatkaime, Israelme gu hereimuiteime lam’mbe a lung zua gai de lei, Tingwang je toa lau.

¹⁰“Aipau ze salia lau, ningnui hekunmerângne kehâbe chingchuame gau, ningnui pemîhungbe paikam peireige ka’ntaume, zai ningnui ’mpuîki tat ze bamme gau.

¹¹Hedui bambe bâm ramme ge ’ntoî-’nra gene heleuzieme kuâ ’ngking gai lau, chige penui ne Tingwang gu kengambe leutewpelit ze la lei, Israelram ge pe gume helu tâ tewme ne kengambe leu zeu. “Chidadege Tingwang gu ziemmena keriekemui ’mbe ’nzangkeu de lei.

¹²“Chu lau, chu lau, Deborale! chu lau, chu lau, heleuziepat zu lau! zuachu zu lau, Barakbe gau, kebang ramme je kumtatchu lau, Hei, Abino-ambe na gau.

¹³Chidadege besuitewme ruage ’nsakpatme zuakeu di de lei; peranchime je ngua lu ze pe hangge Tingwang gu ziemmena zuakeu di de lei.

¹⁴Ephraim gene penui zuapat ze bekâmram ’mbe tat kai de lei, ning chai sui la lei, Benjaminbe gau, ning kiduîme je ngua lu zeu; Makir gene hereimuiteime zuakeu di de lei, zai Zebulun gene hereikang saibe tui teime wangkeu di de lei.

¹⁵Issakar zat ge heguangsinme Deborale je ngua lu wang de lei, zai Issakarbe â Barakbe dage ’nnumtew de lei; teziening ’mbe penui â pe chai sui’nnuichaptat ti de lei. Reuben zat ramme ruage â helung suilam hang peulak ze bam di de lei.

¹⁶Meli rielung ramme ge ’ndaitew ze nang bam gai di lau, melidung je metiam ne kube kuâ seugairabe hangge zeu? Reuben zat ramme ruage â helungsui lam hang peulak ze bam di de lei.

¹⁷Gilead â Jordan giam ’mbe bam di de lei; zai Dan ’ndaitew ze pa hedui’nneikuak ramme ge bam di lau? Asher â sungkling kung ge ’ntausip kai di, pa wangkeugaibe bâm ge lung ze bam di de lei.

¹⁸Zebulun â chaibe chang ze penui keringbe peipatkaibe ziemmena zat te lei; Naphtali du peloa hube ge pe laîkai ze herei bam lei.

¹⁹“Heguangme wang ze penui kaherei de lei; dadege Kanaanram gu heguang ramme je ka’nggi de lei, Taanak ge, Megiddo ’nggeuki ramme taige zeu; gepût, hereichâ ramme mâ de penui ngau mak lei.

²⁰Tinggîm ’mbene hegi ramme kaherei de lei, penui tatbe ’mpuî ramme gene Siserabe je penui ka’nggi de lei.

²¹Kishon geuki teleu ne penui je biaktat ti de lei, teleu ranchibe, Kishon teleu zeneu. A keringbe gau! peranchibe gene tat ze bam lau!

²²“Chidadege pakbeibe ziegene hekun ramme pîkuâ prum-rum tai de lei, pe gu hekunsei ramme pakbe ’ncheu zeu.

²³“Meroz je deset kai be lau,” Tingwang gu tinggîm angel’mpeu ne rang lei, “Chipau ram deiname je chiang gai be lau, Tingwang je ’ngngâ gai ra penui wangmakbe ziegeneu, peranchime je Tingwang hang ’nggigaihâ ra hangge zeu.

²⁴“ ’Mpuimi ramme ruage peize Jaelle ne pe paurega lang lau, Ken’mpeu Heberbe nâu jeu, paîki ge lungbe ’mpuimi ramme ruage pe pauregalangpui zeu.

²⁵Siserabe ne hedui kie bei dege pa ne pechu tungdui pei bei lei, pe hangge pa ne pengêudibe kuak gene tungdui tewhialube ramme teipat bei de lei.

²⁶Pe ba ne paîki chakbe riâ ’ntung tei de lei, zai pe ba hezat’mbia ba ne tâtewpeu gu tediak tei de lei; Siserabe je pa ne kakedeî de lei, pa ne pe peî ze tewhitruai ’ndi de lei, pa ne pe teulup tewpâng ze giapela ’ndi de lei.

²⁷Pa’ngngaîkeu de lei, pa kau gai di de lei, pe pî hiage pa â tuâ’ntatui bam di de lei; pe pî kangge pa ’ngngaîkeu gai de lei, pa kau gai di de lei. Pa kâukeugaibe bâm ge, chige pa chai gai di de lei.

²⁸“Siserabe pui ze muicheiki gene ’ngkiâpie de lei, ’nggârie kak gene heguapie ze Siserabe pui kûsa de lei: ‘Pe gu hekuntimriang ’ndaitew ze wangrî-kadesang se lau? Pe gu hekuntimriang ramme, zai pakpedumbe pîkuâ ’ndaitew ze seukelua mak kerei se lau?’ zeu.

²⁹Pe gu ’mpuimi ningchinglangme ne kak lei, mak lei, pe runne pechu kak lei,

³⁰‘Penui â hereichâ peu ze chize ’nzi di â mak se mei?— ’Nteumena hangge heleume hangkat-kat mei nune hangna-na mei zeu; Siserabe hangge rîmlube paî ramme ne hereichâ hangge, rîmlube paî heziak tewlube zene hereichâ hangge, a guang hangge rîmlube heziakpaî kena zene hereichâ chang ze, teiwangrabe hanggene semei?’ zeu.

³¹“Hei, chigum ze ning teureime â peize ga de lau, Tingwang gau! Kane peize ning kangme je â, pe ranchi gene naimik chube gum bam lau,” acheu zeu.