Read Zeme Naga SAMRAMME 6 Bible Online

SAMRAMME 6 - Zeme Naga bible

SAMRAMME 6

¹Zai heram ze kum hedai sau’ntak ze bam di de lei. Tingwang mikngau ge tâ-kesiabe Israelme ne tew kadai de lei; zai Tingwang ne penui je kum sena Midianme ba ge pei gai bei de lei.

²Zai Medianme ne Israelme peireige rezietei ze bam de lei; zai Midianme ziegene Israelme â deiloa ramme gu hekâuki ramme ge zai tingchutegupki ramme ge ’mbaiki ramme tew lu ze bam de lei.

³Israelme ne mâ-himlei ling gai tânege Midianme benai Amalekme zai naimikpat ’mbia deiname ne wang ze penui je ’nggi-gi de lei.

⁴Chime ne wang lu penui dei ge tejeîki tew gai lu rêu ze Gaza huâzie riâ chang ze kedei rachî patbe leine tew’nsia ka’nzie de lei, zai Israelme ram hangge â, hetak, zai meli mei nune kebui mei nune hekunmerângne mei be ’nsangdu ’nsak kai mak te lei.

⁵Penui gu kaurui ramme benai paîki ramme tei kam lu tîngkau lungwangbe gum ze wangka’nzie de lei; penui benai penui gu put-hu ramme â seichi dai lak ti de lei; chipauziegene penui wang-wangbe luage heram ze â tew’nsia kam ra chang de lei.

⁶Zai Midianme ziegene Israelme je â kelaksia-desang gai di de lei; zai ’ngngâ gai ra hangge Israelme ne Tingwang je ku de lei.

⁷Midianme ziegene Tingwang je Israelme kû gai dege,

⁸Israelme dage Tingwang ne kemeu lang gai de lei; zai pa ne penui je rang ze, “Israelme Rapeu Tingwang ne aigum ze rang lei: I ne ningnui je Ijipram gene nguahang de lei, zai kebangtewbeki gene ningnui je lupat kai bei de lei;

⁹zai I ne ningnui je Ijipme ba gene zai ningnui je tewsâme leine ba gene ’nripat kai bei de lei, zai ningnui suage penui je guatua ’ndi de lei, zai penui gu heram ze ningnui hangge pei gai bei de lei;

¹⁰zai ningnui je I ne, ‘I ze Tingwang ningnui Rapeu de lei; ningnui lungbe heram’mpaume Amorme rapeu ramme je ningnui kellum mak ra lei,’ ze rang gai bei de lei. Kane ningnui ne a kuâ ze ’ngking gai mak te lei,” ze kacheu de lei.

¹¹Chunage Tingwang gu tinggîm angel’mpeu wang lu ze Ophra ge Abiezer’mpeu Joasbe gu ’mpubang kangge, pe na Gideonbe ne Midianme je tei’mbai ra hanggene grepchî niakbe bâm gene dekuîmeu bêu ze bambe luage ’ntau bam de lei.

¹²Zai Tingwang gu tinggîm angel’mpeu ne pechu liâ ze acheu rang gai de lei, “Ning dage Tingwang la lei, nang ziemmena peranchi zai gekupeu gau,” ze acheu zeu.

¹³Zai Gideonbe ne pechu, “I chinei ze ningchu kie de lei, a pau gau, anui dage Tingwang bam nung laîzai ’ndaitew ze anui peireige aigumbe wangchang ra lau? Zai pa ne tâningdaulakbe tewgaibe ramme rasam anui paume ne anui je salia ze, acheu sa ze, ‘Ijip gene Tingwang ne anui je nguahang gai de mak semei?’ kacheube ramme ze ’ndaige tat kai kam di lau? Kane chuna ge â Tingwang ne anui je tuâpat kai ’ndi de lei, zai anui je Midianme ba ge pei gai ’ndi de lei,” ze kacheu de lei.

¹⁴Dadege Tingwang ne pe lam ’nreiwang lu, “Aipau ranchi ning dage bambe tei lu tat ze Midianme ba gene Israelme je ripat kai be lau; ningchu I ne lang gai mak semei?” ze kacheu de lei.

¹⁵Gideonbe ne kak ze, “Rang lau, a Wang gau, ’ndaigum ze I ne Israelme je ’nripatchi le ra lau? Pie le lau, a kiduîme ze â Manassebe zat ge ’nnulangbe kau, zai a kibaume ruage du I â cheilangbe kau lei,” ze kacheu de lei.

¹⁶Zai Tingwang ne pechu rang gai ze, “Kane ning dage I bam gu lei, zai ziemmena hangkat je gum ze Midianme je nang ne tew’nsia gu lei,” ze kacheu de lei.

¹⁷Gideonbe ne pechu, “Chunage nang ne achu ngau’nggia gai zai â, achu ka’mpaube nang de lei be ka’nchetbe (dak) achu teilia lau.

¹⁸I wang ze a gu kela heipat ze ning suage kai mak tâne aigene tatrimna mak ra ningchu I kiam lei,” kacheu de lei. Zai Pa ne, “Nang wang dai mak tâne I bamkuâ gu lei,” acheu bei de lei.

¹⁹Chidadege Gideonbe pe kilûng ’mbe gut lu ze kemeipoine teleu lu zai dekuî Epha kat ne ’nduihîkaimakbe tingku kateleu de lei; pa ne hemei ze â ’ntui ge kai lu, zai hegidui â heli ge kai lu chiramme ze teipat ze ’mpubang kangge pechu pei gai bei de lei.

²⁰Zai Hera gu angel’mpeu ne pechu, “Hemei benai ’nduihîkaimakbe tingku ramme tei lu ze, chiramme ze aipau chukâng peireige kai lau, zai chiramme peireige hegidui ruî gai be lau,” kacheu de lei. Zai chigum ze pa tew gai de lei.

²¹Chidadege Tingwang gu angel’mpeu ne pe ba ge hetui bambe tûn ’nzap lu, zai hemei benai ’nduihîkaimakbe tingku ramme deîtau gai bei de lei; zai chige tingchutum gene hemi tauben pat ze hemei benai ’nduihî kaimakbe tingku rû’ngga kam ’ndi de lei; chidadege â Tingwang gu tinggîm angel’mpeu â pe mikngau gene galap kai di de lei.

²²Chidadege Gideonbe chipaupeu ze Tingwang gu tinggîm angel’mpeu de lei be chî di de lei; zai Gideonbe ne sa ze, “Hei Tingwang Hera gau! Tingwang gu tinggîm angel’mpeu je pe ju I ngauhedau lu de lei,” ze kacheu de lei.

²³Kane Tingwang ne pechu rang gai ze, “Ning dage desieyibe peize bam lau; hing se lau, nang chai ra mak lei,” acheu bei de lei.

²⁴Chidadege Gideonbe ne chige Tingwang hangge herâtewbe kaira tew gai de lei, zai Tingwang â desieyibe lei, ze ’ntak kai de lei. Chuna ting riâ chang ze Abiezerme gu kedei ge Ophra ge chize sap larei lei.

²⁵Chipau mai tingmuî ge Tingwang ne pechu rang gai ze, “Ning peu gu kebuisei, pakenabe buisei kum sena kau tei le lau, zai ning peu gu Baal dage herâtewbe-kaira chakkau ne lau, zai pe taige Asherah rapui luî tewbe bikau ne lau;

²⁶zai tingchu ne pesin-perin desuazun lu ze, aipau tûm peireige Tingwang ning Rapeu hangge herâtewbe-kaira tew gai lau; chipau chângge pakenabe buisei tei lu, nang bikaugaibe Asherah luî tewbe heching zene rûkambe-râtewbe pei gai lau,” ze kacheu de lei.

²⁷Chigum ze Gideonbe ne pe guâ ka’ngguame ruagene hangkereu je ngua lu, Tingwang ne pechu ranggaibe luigum ze tew gai de lei; kane tîngna ge chize tew ra hangge â pe kiduîme benai keloame je pa hing-kadesangbe ziegene, tingmuî gene pa chipau tâ tew de lei.

²⁸Hechuasûn ge namdi name chu dadege, pie le lau, Baal gu herâtewbe-kaira tewkau gai ’ndi, zai pe taige Asherah bambe ze bikau ’ndi, zai pakenabe buisei zene herâtewbe hang herâtewbe-kaira tew gai kadaibe ge peipatkaibe ngau de lei.

²⁹Zai penui karai ge acheu sa ze, “Châu ne aipau tâ tew gai lau?” kacheu de lei. Zai penui peurua ze kemêt kai lu dege, penui ne, “Joasbe na Gideonbe ne aipau tâ tew gai de lei,” kacheu de lei.

³⁰Chidadege namdi name ne Joasbe je, “Ning na je nguapat lau, pechu tewchat kai ra hangge zeu, pa ne Baal gu herâtewbe-kaira chakkau ’ndi, zai pe taige Asherah je bikau ’ndi daseu,” ze kacheu de lei.

³¹Kane Joasbe ne pechu sapdapa ze bamme leine je, “Baal hangge ningnui tingkanggai’ngngâ ra de semei? Makchai pechu sagu gai ra de semei? Mi-migedu pe hangge geikanggaihâbe kau â, hechua dezai tewchat ’ndu lei. Pa ze hera lei, zai â peize pe runne pe hangge ’nggi le lau, pe gu herâtewbe-kaira ze â chakkau ’ndi daseu,” ze acheu bei de lei.

³²Chipauziegene pechu ze chipau mai gene Jerubbaal ze ku de lei, chize â “Peize Baal ne pechu tingkang lau,” kacheube de lei, Gideonbe ne pe gu herâtewbe-kaira puikau’ndibe ziegeneu.

³³Chidadege Midianme benai Amalekme zai Tingbia ’mbia gu ziemmena leine wangka’ndui de lei, zai Jordan geuki ka lu Jezril kâm ge sauka’ndui de lei.

³⁴Kane Tingwang gu herui ne Gideonbe je tei ’ndi de lei; dadege pa ne hegeîluîkie ’mmut kai de lei, zai pe chai sui ra hangge, Abiezerme je kûpat kai de lei.

³⁵Zai Manasseram leine ge hepâupaume je lang gai de lei; zai penui je du pe chai sui ra kûpat kai de lei. Zai Asher, Zebulun zai Naphtali ge hepâupaume je pa ne lang gai de lei; zai penui je hedau ra penui hang de lei.

³⁶Chidadege Gideonbe ne Hera je, “Nang ne rangbe luigum ze Israelme je nang ripatkairabe ze a ba gene gu lei, zai â,

³⁷pie le lau, kechaîpung ge mâ-gêupuâng I kai gu lei; meligêupuâng ge runne kezikdui bam, zai kedei ze â pelane changku dizai â nang ne rangbe luigum ze a ba ne nang ne Israelme je ’nripat kai gu lei be I chî ra de lei,” ze kacheu de lei.

³⁸Zai chipau luigum ze wangchang di de lei. Bechaibe mai hechuasûn ge pa chu lu meligêu pa tui de lei, mâ-gêupuâng gene hekuak kat puitingduibe riâ hedui getuipat te lei.

³⁹Chidadege Gideonbe ne Hera dage, “A peireige ning râta gai se lau, luakat runne leusede aipau sam I sa gai ra pei lau; ka’nggia ze meli gêupuâng gene luakat I heda gai dai ra pei lau, meli gêupuâng ge runne changku ze bam, zai kedei ze â pelane ge peize kezikdui bam lau,” ze kacheu de lei.

⁴⁰Zai chigum ze bam ra Hera ne chipau mai tingmuî ge tew gai bei de lei; meli gêupuâng ge runne chang ze, kedei ge â pelane ge kezikdui ’nnia bam de lei.