Read Zeme Naga SAMRAMME 7 Bible Online

SAMRAMME 7 - Zeme Naga bible

SAMRAMME 7

¹Chidadege Jerubbaalbe (chige Gideonbe) zai pe dage ziemmena bamme leine hechuasûn chu lu Harod ’nggeuterak hiage sauka’ndui de lei; zai Midianme bamka’nduibe bâm ze â penui dagene tingpeî ’mbia, More deiloa hiage, teziening ge bam de lei.

²Tingwang ne Gideonbe je rang ze, “Midianme je penui ba ge pei gai be ra hangge ning dage ziemmena bambe ze a hangge â kie-ran de lei, Israelme ne a peireige keditew ze, ‘A runne a ba ne achu ’nripat kai bei de lei,’ ze acheu mak ra hangge zeu.

³Chidaze chunage baudime seube ge rangba gai be lau, ‘Mi-mige de hing ze kakedunbe kau â peize pe ki lam helatwang dai de lau,’ zeu,” kacheu de lei. Zai Gideonbe ne penui je kakedak te lei; chang ’ngkai ze kena helat dai di dege, chang kereu bamka’nsak te lei.

⁴Zai Tingwang ne Gideonbe je rang gai ze, “Ziemmena kie-ran rei de lei; penui je ’nggeuki ’mbe nguakeu zu lau, dezai ning hangge I ne penui je kedak kai bu lei; zai I ne ningchu, ‘Aipaupeu je nang nguatat ra de lei,’ ze I ne kacheupeu je nang nguatat ra de lei; zai I ne ningchu, ‘Aipaupeu je â ning dage nguatat mak ra lei,’ kacheube peu ze â tat mak ra lei,” ze kacheu de lei.

⁵Chidadege pa ne ziemmename je ’nggeuki ’mbe nguakeu de lei; zai Tingwang ne Gideonbe dage rang gai ze, “Hetei gum ze mi-mige du pe lei ne hedui ’nniaksakbe kau, zai kukdungkeu lu ze hedui sakbe kau je teichâm ne lau,” kacheu de lei.

⁶Zai penui mui ge penui ba ne teichu ze tupsakbe kau â, ziemmena haî chum lei; kane kêdame leine ze â hedui sak ra kukdungkeu de lei.

⁷Zai Tingwang ne Gideonbe je rang gai ze, “Hedui ’nrupsakbe kau ziemmena haî chum zene ningnui je I ne ’nripat kai gu lei, zai Midianme je ningnui ba ge pei gai gu lei; zai kêdame leine je â pe ki ki ’mbe peize tat dai de zu lau,” kacheu de lei.

⁸Chigum ze pa ne chime bau gu hegambung ramme benai penui gu hegeîluîkie ramme penui ba gene tei’ndi de lei; zai Israelme kêdame je â penui gu paîki ’mbe lang gai ’ndi lei, kane ziemmena haî chum je â ’nsak kai de lei; zai Midianme gu tejeîki â pa’ngkang ge teziening ge bam de lei.

⁹Chipau mai tingmuî sing ge Tingwang ne pechu rang gai ze, “Chu lu ze penui gu tejeîbâm ’mbe wangkeu du lau; chize ning ba ge I ne pei gai ’ndi daseu.

¹⁰Kane nang ne wangkeuhing zai â, ning guâ ka’ngguapeu Purabe je ngua lu wangkeu zu lau;

¹¹dezai penui ’ndaikau sa mei be nang seu gu de lei, zai chipau châng dezai â chi penui jei ka’nduibe bâm ’mbe wangkeurabe hangge ning ba ran tew’nchi gai bu de lei,” ze kacheu de lei. Chidadege pe guâ ka’ngguapeu Purabe je ngua lu ze hereime tejeîbâm gu hekêtkaibe bâm ramme ge wangkeu di de lei.

¹²Zai Midianme benai Amalekme zai Tingbia ’mbia gu ziemmena leine ze â tîngkaudung lungwangbe gum ze jeigit ze bam de lei; zai penui gu put-hu ramme riak â sungkling kung ge deseî bambe seikamlakbe riâ bam lei.

¹³Gideonbe wangchang dadege, pie le lau, ziemmena hangkatpeu ne pe kangpeu je hemang salia de lei; zai pa ne acheu sa ze, “Pie le lau, I hemang ka’mmi de lei; zai pie le lau, barli tingkukâng kat Midianme gu tejeîbâm ge ’ngkuagut ti de lei, zai paîki ge wangchang ze chize gikau ’ndi de lei, zai gikedetda gai bei ze paîki ze tuâ’ncheirang bam di de lei,” ze kacheu de lei.

¹⁴Zai pe kangpeu ne kak ze, “Aize mâkedabe makse, Joasbe na, Israel’mpeu Gideonbe gu hiazutkie de lei; pe ba ge Hera ne Midianram benai pe gu hereikang baudime leine je pei gai bei de lei,” ze kacheu de lei.

¹⁵Hemang sabe benai chize sakakelibe Gideonbe seu lu dege, pa kakellum de lei; zai Israelme gu tejeîbâm ’mbe pa helatwang dai lu, zai acheu sa ze, “Chu zu lau, Midianme je Tingwang ne ningnui ba ge pei gai ’ndi daseu,” ze kacheu de lei.

¹⁶Zai ziemmena haî chum je bau chum hang ’nzi gai lu, zai penui ’nteumena ba ge hegeîluîkie ramme benai hegambung perua ramme lungge keleu ramme kai lu ze pei kam gai bei de lei.

¹⁷Zai penui je pa ne rang ze, “Achu pie le lau, zai I ne tew gum ze tew lau; tejeîbâm ’mpahiage I wang dezai I ne tew gum ze tew lau.

¹⁸I benai a dage bamme leine ne hegeîluîkie ’mmut kai dezai, pebâm’nsangne gene du hegeîluîkie ’mmut kai ze acheu ze ’nrung lau, ‘Tingwang hang benai Gideonbe hang’ acheu zeu,” ze kacheu de lei.

¹⁹Chidadege muisumrabe suanege penui hekêtkaiheleigap kai lu dege, Gideonbe benai pe dage ziemmena haî kat bamme bau ze tejeîbâm ’mpage hiâwangchang de lei; zai penui ne hegeîluîkie ramme ’mmut ze penui ba ge hegambung ramme bambe lakpâng gai de lei.

²⁰Zai bau chum zene hegeîluîkie ramme ’mmut ze hegambung ramme tewpâng gai de lei, penui ba heku’mbia ba ne keleu ramme tei lu, zai hezat’mbia ba ramme ne hegeîluîkie ramme ’mmut ra tei de lei; zai penui ’nrung ze, “Tingwang hang zai Gideonbe hangge hiazutkie!” kacheu de lei.

²¹Penui bâm bâm gene tejeîbâm ge sapguâling ze bam de lei, zai hereikangme leine pak ti de lei; penui ’nrung ze pak ti de lei.

²²Penui ne hegeîluîkie haî chum ’mmut kai dege ziemmena leine penui kangme karai hiazutkie ne herei ra, zai hereikangme leine herei ra Tingwang ne tew gai bei de lei; zai hereikangme ze Zerera ’mbia Beth-shitta riâ, Tabbath hiage Abel-meholaram herai riâ pakchang de lei.

²³Zai Israelme je Naphtali gene zai Asher gene zai Manasseram leine gene kûpat kai de lei, zai penui ne Midianme je guaka’nchu de lei.

²⁴Zai Gideonbe ne Ephraim gu peloaram leine ge hepâupaume je lang gai ze, “Midianme je ’nggi ra wangkeu ze Beth-bara riâ chang ze ’nggeuki ramme sut le lau, zai Jordan geuki du sut le lau,” ze rang gai de lei. Chipau luigum ze Ephraim gu ’mpeumi ramme leine je kûpat te lei, zai penui ne Beth-bara riâ chang ze ’nggeuki ramme sut lu zai Jordan geuki du sut ’ndi de lei.

²⁵Zai penui ne Midianram gu heguangsinpeu kena Orebbe benai Zeebbe je nîm lu de lei; Oreb chutum ge penui ne Orebbe je tewchat kai de lei, zai Zeebbe gu grepchî niakbe bâm ge penui ne Zeebbe je tewchat kai de lei, zai Midianme je penui gua’nchutat te lei. Zai penui ne Jordan giam ge Gideonbe dage Orebbe benai Zeebbe peîdâng teiwang gai de lei.