Read Zeme Naga SAMRAMME 8 Bible Online

SAMRAMME 8 - Zeme Naga bible

SAMRAMME 8

¹Zai Ephraimme ne pechu, “Anui peireige ’ndaitew ze nang aigum ze tew gai lau, Midianme je nang ’nggi ra tatbe luage ’ndaitew ze anui je ku gai mak lau?” kacheu de lei. Zai pechu penui ka’nret te lei.

²Zai pa ne penui je, “Ningnui je teikeda ra hangge chunage I ne ’ndaikau tewgaibe la lau? Ephraimme gu grepchî patehaine ze Abiezerme gu grepchî hechitchibe suane yi mak semei?

³Midianram gu heguangsinme Orebbe benai Zeebbe je Hera ne ningnui ba ge pei gai bei de lei; ningnui je teikeda ra hangge ’ndaikau I tewchilube la lau?” ze kacheu de lei. Chidadege pe peireige penui râtabe ze pa ne aize sa gai bei dege â ’nsînkeu dai di de lei.

⁴Zai Gideonbe pe dage ziemmena haî chum bamme je ngua lu Jordan geuki chang ze chize kapat ti de lei. Penui lei-desang di de lei, sede penui teureime je gua’nchu ze bam rei de lei.

⁵Chipauziegene Sukkoth ge bamme dage pa ne, “Ka’nggia ze a chaisuime je tingkukâng ramme pei be lau; penui â lei-desang di daseu, zai I â Medianme gu heguang kena Zebabe benai Zalmunnabe je gua’nchu larei daseu,” ze kacheu de lei.

⁶Zai Sukkoth gu saibe ramme ne sa ze, “Ning gu hereikangme je tingku pei gai ra hangge ning ba ge Zebabe benai Zalmunnabe je nîm lu la de semei?” kacheu de lei.

⁷Zai Gideonbe ne kak ze, “Acheu zai â yi de lei, Zebabe benai Zalmunnabe je Tingwang ne a ba ge pei gai bei dezai â, hênamkang gu hetubang ramme benai heturia ramme ne ningnui pum I ne kegit himchang gu lei,” ze acheu bei de lei.

⁸Zai chigene Penuel ’mbe pa hang kadai de lei, zai chipau luigum ze penui je du salia kadai de lei; zai Sukkoth ge bamme be pechu samkak gum ze, Penuel ge bamme ne du pechu ’mpaukak kadai de lei.

⁹Zai pa ne Penuel ge bamme je, “Zêune (yi neze) I wang dai dezai aipau ki kehube ze I ne tewkau ’ndu lei,” ze acheu bei de lei.

¹⁰Chunage Zebabe benai Zalmunnabe â ziemmena chang kereu ze mengeu gum ze, Tingbia ’mbia ge bamme gu sipai ’nsakpatme je ngua lu ze Karkor ge bam de lei; hiazutkie puame lâk kat ze chang ’ngkai je â gî ’ndi daseu.

¹¹Zai Gideonbe â Noba benai Jogbeha gene naimikpat ’mbia tebeîtewbe puidi gene hang ze hereikangme je ka’nggi de lei; hereikangme ze â ’nninghereu meluisui ze penui dêutew ze bam dadegeu.

¹²Zai Zebabe benai Zalmunnabe pak ti de lei, zai pa ne penai je gua’nchu ze Midianme gu heguang kena Zebabe benai Zalmunnabe je nîm ’ndi de lei, zai pa ne hereikangme leine je â tewhingrim gai bei de lei.

¹³Chidadege herei’nggi lu ze Joasbe na Gideonbe Heres loa chak gene helatwang kadai de lei.

¹⁴Zai pa ne Sukkoth ge bambe kau rehang’mpeu hangkat je nîm lu ze mâ-kakedî de lei; zai pe hangge pa ne Sukkoth ge saibe ramme benai gechîngme riaksena ze sena ji rawkeu gai bei de lei.

¹⁵Zai pa ne Sukkoth ge bamme dage wang lu, zai acheu sa ze, “Zebabe benai Zalmunnabe je pie le lau, aibe kena ziegene achu ningnui kerai ze, ‘Ning gu ziemmena penui ran-gadime je tingku pei be ra hangge ning ba ge Zebabe benai Zalmunnabe je nîm lu la de semei?’ ze kacheu de zeî lau,” ze acheu bei de lei.

¹⁶Zai pa ne namdi ge gechîngme je nîm lu hênamkang gu hetubang ramme benai heturia ramme tei lu penui benai Sukkoth ge bamme chibam ra geteilia gai bei de lei.

¹⁷Zai Penuel gu heki hube pa ne tewkau gai, zai namdi name je pa ne gî ’ndi de lei.

¹⁸Chidadege Zebabe benai Zalmunnabe je pa ne, “Tabor ge ningnui tewchatkaime deu ze ’ndaigum lau?” ze kacheu de lei, penui ne kak ze, “Penui ze du penui ’nteumena ning luigum de lei; penui â heguang na ’mpeumi ramme gum de lei,” kacheu de lei.

¹⁹Zai pa ne, “Penui â a sikiname, a kina a puina ’mpeumi ramme de lei; Tingwang bambe ziegene, ningnui ne penui keringbe ’nzuak kai bei nung laîzai â, ningnui je I tewchat ra mak te lei,” kacheu de lei.

²⁰Zai pe na rehang’mpeu chînglangpeu Jetherbe je pa ne, “Chu ze penui je bichat kai be lau,” ze rang gai de lei. Kane rehang’mpeu ze pe gu hiazutkie tatpat mak lei; pa â hena di rei dadege hing di de lei.

²¹Chidadege Zebabe benai Zalmunnabe ne, “Nang ne chu ze anai peireige chize tew gai zu lau; ziemmena luigum ze pe ranchi ze du chang de lei,” ze kacheu de lei. Zai Gideonbe ne zuachu ze Zebabe benai Zalmunnabe je bichat ’ndi de lei; zai pa ne put-hu ramme guang gene hekêu karchibe luî tewbe heteu ramme lu ’ndi de lei.

²²Chidadege Israelme ne Gideonbe je, “Anui peireige nang ne, zai ning na ne, zai ning chapeu ne du samram ze bam lau; Midianme ba gene nang ne anui je ’nripat kai bei daseu,” ze kacheu de lei.

²³Gideonbe ne penui je, “I ne ningnui peireige samram ra mak, zai a na ne du samram ra mak lei, Tingwang ne ningnui peireige samram gu lei,” ze kacheu de lei.

²⁴Zai Gideonbe ne penui je rang ze, “Ningnui dage mâ-kat I kie ra pei lau; ningnui ’nteumena mi gu-gu hereichâ gene kunchei ramme achu pei lau,” kacheu de lei. (Penui dage â gechâk kunchei ramme bam de lei, penui â Israelme changbe ziegeneu)

²⁵Zai penui ne kak ze, “Anui suiyi ze chiramme anui pei gu lei,” ze kacheu de lei. Zai penui ne paî kat kâm gai de lei, zai chige pe-gu gu hereichâ gene kunchei ramme ’nteumena tuâ gai de lei.

²⁶Zai hekêu karchibe luîtewbe ria ramme, zai heteu ramme, zai Midianme gu heguangme ne kaibe hepuâni yibe ramme sâu ze, zai penui gu put-hu guang ge bambe heteugua ramme sâu ze, pa ne kielube gechâk kuncheigua ramme rît ze â gechâk shekel chang kat ze haî sena de lei.

²⁷Zai Gideonbe ne chize ne ephod hangge tew gai lu pe gu namdi Ophra ge kai de lei; zai chi je Israelme leine ne chige kellum ze bam di de lei, zai chize ne Gideonbe benai pe kiduîme hangge ’mpia chang di de lei.

²⁸Chigum ze Midianme je â Israelme je tewhelêu gai bei ze penui sui tewpat lak ti de lei. Zai Gideonbe ringbe ting ge heram ze kum hedai sautemi ze bam de lei.

²⁹Joasbe na Jerubbaalbe tat ze pe ki gîmsing ge lung ze bam di de lei.

³⁰Chunage Gideonbe pe name, pe dagene hingkeume ’mpeumi riaksena bam de lei, pa â pe nâu misongga bam dadegeu.

³¹Zai Shekem ge bambepui pe gu nausîpui ne du pe hangge ’mpeumi lungkeu gai de lei, zai pa ne pe ji hangge Abimelekbe ’ntak kai de lei.

³²Zai Joasbe na Gideonbe chîng ze gechipau di dezaine chai de lei, zai Abiezerme gu Ophra namdi ge pe peu Joasbe gu heraw ge pechu bai gai de lei.

³³Gideonbe chai kezi, Israelme â lietat dai di, zai Baal ramme je kellum dai di de lei, zai Baal-berith je penui rapeu hang tew gai de lei.

³⁴Zai Israelme â penui teureime penui je guâgit ze bamme leine ba gene penui je ripatkaipeu Tingwang penui Rapeu je ’ngngaî ’ndi de lei;

³⁵zai Israelme hangge tâ-keyibe leine tew gai bei sede penui â Jerubbaalbe kiduîme je ngau’nggia gai mak te lei.