Read Zeme Naga SAMRAMME 9 Bible Online

SAMRAMME 9 - Zeme Naga bible

SAMRAMME 9

¹Chunage Jerubbaalbe na Abimelekbe Shekem ’mbe pe pui kiriame lam’mbe tat ze penui je benai pe pui kiduîme zat leine dage rang gai ze,

²“Shekemram name leine seube ge salia lau, ‘’Ndaibe ze ningnui hangge yibi lau? Jerubbaalbe na ’mpeumi riaksename ’nteumena ne ningnui peireige samram ra mei, nune hangkat ne ningnui peireige samram ra lau?’ I ze â ningnui ra benai ningnui gu hejai kat te lei be du chî le lau,” kacheu de lei.

³Zai pe pui kiduîme ne aipau sam ramme leine pa kelei ge Shekem gu ziemmena leine je salia de lei; zai Abimelekbe chai sui ra hangge penui lung hezuâ di de lei, penui ne sa ze, “Pa ze â anui kiduî’mpeu de lei,” kacheu daseu.

⁴Zai Baal-berith ki gene keput kâng riaksena penui ne pechu pei bei ze chize ne pe chaisuime peruânggabe zai pe kunrachibe kau ramme je pa ne puî de lei.

⁵Zai pa ne Ophra ge pe peu ki ’mbe tat ze, tingchutum kat peireige Jerubbaalbe name, pe sikiname ’mpeumi riaksena je gîchat ’ndi de lei, kane Jerubbaalbe na henalangbe Jothambe â ’nsakpat te lei, pa â ’mbaidibe ziegeneu.

⁶Zai Shekemram name benai Beth-millo gu ziemmena leine wangherua lu ze penui tat ze Abimelekbe je Shekem ge tingchusum bambe ’mpubang hia gene heguang hang suang gai de lei.

⁷Jothambe je chize pau gai bei dege, pa tat ze Gerizim Deiloa ’ntûm ge sap lu ze, zai ’nrung ze penui je, “A kuâ ’ngking le lau, ningnui Shekem gu ziemmename gau, dezai Hera ne ningnui je ’ngking gai be ra hangge zeu.

⁸’Ndâge luakat â penui peireige heguang hang suang gai ra zuapat te lei, zai penui ne olib bang je, ‘Anui peireige heguang chang lau,’ kacheu de lei.

⁹Kane olib bang ne penui je, ‘A dage I gechabe, chize ne hera ramme benai ziemmename je hengêupeigaibe sâu nan ze hingbang ramme peireige kengakzai bam ra semei?’ acheu bei de lei.

¹⁰Zai hingbang ramme ne ’mbeuchîbang je, ‘Wang lau, anui peireige heguang lau,’ kacheu de lei.

¹¹Kane ’mbeuchîbang ne penui je, ‘I gekumbe benai a rachî keyibe sâu nan ze hingbang ramme peireige kengakzai bam ra semei?’ kacheu de lei.

¹²Zai hingbang ramme ne grepchî hiâm je, ‘Nang ne wang ze anui peireige heguang chang lau?’ kacheu de lei.

¹³Kane grepchî hiâm ne penui je, ‘Chi hera ramme benai ziemmena suika’ntabe a gu wain I sâu nan ze hingbang ramme peireige kengakzai bam ra semei?’ kacheu de lei.

¹⁴Chidadege â hingbang leine ne hetupat je, ‘Nang ne wang ze anui peireige heguang chang lau’ kacheu de lei.

¹⁵Zai hetupat ne hingbang ramme je, ‘Ningnui ne lungsang sing ne achu ningnui peireige heguang hang ’nnuk kai ra zai â, wang ze a kezui ge ’nseu le lau; kane chi acheu makchai â, hetupat gene peize hemi pat ze Lebanon gu kedarbang ramme rû’ngga kam ne lau,’ kacheu de lei.

¹⁶“Chunage chidaze Abimelekbe je heguang hang ningnui suanggaibe luage ningnui lungsang benai hengêutewbe gene tâtew gai zai â, zai Jerubbaalbe benai pe kiduîme dage ningnui mâ-’nningchibe bam, zai pe tatew luigum ze pe peireige keyibe tew gai zai â—

¹⁷a peu ne pa keringbe ’nzâ mak ze ningnui hangge herei’nggi gai de lei, zai Midianme ba gene ningnui je ’nripat kai bei de lei;

¹⁸zai nemai ge â a peu ki je ’nggi ra ningnui zuachu di de lei, zai pe name ’mpeumi riaksename je tingchukâng kat peireige bichat kam gai bei, zai Abimelekbe, pe guâ ka’ngguapui na je ningnui kiduîme changbeibe ziegene Shekem ge lungme leine peireige heguang hangge ningnui ne suang gai bei de lei—

¹⁹chidadege nemai ge Jerubbaalbe benai pe ki peireige lungsang benai hengêutewbe gene tâtew gai zai â, Abimelekbe dage ningnui suiyi’nta lau, zai pa ze du peize ningnui peireige pe suiyi’nta lau;

²⁰kane acheu me lei dizai â Abimelekbe dagene peize hemi pat ze Shekem benai Beth-millo deiname je rû’ngga kam ne lau; zai peize Shekem deiname dagene zai Beth-millo gene hemi zuapat ze Abimelekbe je rû ne lau,” ze kacheu de lei.

²¹Zai Jothambe ze pak ti zai ’mbia di de lei, zai pe sipeu Abimelekbe je hingbe ziegene Beer ’mbe tat ze lung di de lei.

²²Abimelekbe ne Israelme peireige kum chum rezie tei ze bam de lei.

²³Zai Hera ne Abimelekbe benai Shekem gu ziemmename kakge herui kesiabe lang gai bei de lei; zai Shekem gu ziemmename ne Abimelekbe dage penui choâ kesiabe tew gai de lei;

²⁴chidezai Jerubbaalbe name ’mpeumi riaksename peireige tâ-kesiabe tewgai’ndibe hejaipâu ze penui je gî’ndipeu, penui sikina’mpeu Abimelekbe peireige benai Shekemme, Abimelekbe ne pe sikiname je bichat ra pe baran tew’nchigaime dage wangchang le ra hangge zeu.

²⁵Zai Shekemram name ne kedeiloa ’ntûm ramme ge pechu lîmkua ze bam ra ziemmena ramme je kai de lei, zai chipau ’mpuî ge penui je tatkapelame leine je penui ne sutteu de lei; zai chize Abimelekbe dage pauchang de lei.

²⁶Zai Ebedbe na Gaalbe pe sikina je ngua lu ze Shekem ge wang gai de lei; zai Shekem ge bamme ne pechu ’nnumtew de lei.

²⁷Zai helu ’mbe penui tat te lei, zai penui gu grepchî merie ramme gene grepchî ramme gekumwang’ndui lu ze nei de lei, zai hengî ze, zai penui rapeu ki ge gut ze, teu ze sak ze, Abimelekbe je saka’nsia de lei.

²⁸Zai Abedbe na Gaalbe ne sa ze, “Abimelekbe châu lau, zai pechu nguabamrabe hangge, anui Shekem gu ziemmename ’ndaigumbe kau ramme rei se lau? Jerubbaalbe na benai pe gu basâ Zebulbe ne Shekembe peu Hamorbe gu ziemmena guâ ka’nggua mak semei? Chidaze ’ndaitew ze pe guâ anui ’nggua ra lau?

²⁹Aime bau ze a ba kangge bambe kau nung laîzai â, Abimelekbe je I â tew’ngga ’ndu de lei. I â Abimelekbe je, ‘Ning gu hereikangme tewpung le lau, zai zuapat lau,’ ze acheu gu de lei,” kacheu de lei.

³⁰Ebedbe na Gaalbe sam ramme ze namdi ge rezieteipeu Zebulbe seu lu dege, pe râta-desang di de lei.

³¹Zai pa ne Aruma ’mbe Abimelekbe tailam hepâupaume je lang gai ze, acheu ze, “Pie le lau, Ebedbe na Gaalbe benai pe sikiname Shekem ge wang de lei, zai penui ne ningchu ’nggi ra namdi ge kesia geteilumbup kai la de lei.

³²Chunage chidaze, nang ne ning dage bamme je ngua lu ze tingmuî ne tat ze, helu ramme ge lîmkua le lau.

³³Hechua ge naimik patgap dezai chuzisi lu ze namdi ge chumgut chu lau; zai pa benai pe dage bamme ne ningchu ’nggi ra zuapat dezai pezeu ne dau-daube luî gene nang tew gai le duî lei,” ze rang gai de lei.

³⁴Zai Abimelekbe benai pe dage bamme leine tingmuî ge zuachu lu, bau medai ’nzi lu ze Shekem je lîmkua de lei.

³⁵Zai Ebedbe na Gaalbe zuapat ze namdi gu keriekemui-ga ge sap te lei; zai Abimelekbe benai pe dage bamme penui lîmkuabe bâm gene zuachu de lei.

³⁶Zai chi ziemmena ramme je Gaalbe ngau lu dege, pa ne Zebulbe je, “Pie le lau, kedeiloa ’ntûm ramme gene ziemmename wangkeu mui de lei!” kacheu de lei. Zai Zebulbe ne pechu, “Kedeiloa ramme kezui je ziemmena hang nang ngau gai de lei,” acheu bei de lei.

³⁷Gaalbe ne sa dai ze, “Ni ziemmena ramme heram sumzui gene wangkeu mui de lei, zai bau kat ze â hedachakme gu ’Mpubang ’mbia ne wang mui de lei,” kacheu de lei.

³⁸Chidadege Zebulbe ne pechu, “Chunage ning mui ’ndaige la lau? Nang, ‘Abimelekbe châu lau, pechu anui ngua ra hangge zeu?’ kacheupeu gau. Aime bau ze nang saka’nsiame bau mak semei? Chunage zuapat ze penui je ’nggi zu lau,” ze acheu bei de lei.

³⁹Zai Gaalbe ne Shekemme sua raî lu ze Abimelekbe je ka’nggi de lei.

⁴⁰Zai Abimelekbe ne pechu gua’nsa bei ze pa â pak ti de lei; zai misonggame ne keriekemui riâ chang ze hejam kam di de lei.

⁴¹Zai Abimelekbe â Aruma ge bam de lei; zai Zebulbe ne Gaalbe benai pe sikiname je guatua’ndibe ziegene penui â Shekem ge bam-daidau lak ti de lei.

⁴²Bechaibe mai ge ziemmename helu ramme lam’mbe zuapat ti de lei. Zai chize Abimelekbe je pau gai bei de lei.

⁴³Pe gu ziemmena je ngua lu, penui je bau chum ’nzi gai lu, zai helu ramme ge lîmkua ze bam de lei; zai pa pie gai dege namdi gene ziemmena ramme zuapatbe pa ngau de lei, zai pa ne zuachu ze penui je gîchat ’ndi de lei.

⁴⁴Abimelekbe benai pe dage bamme bau kat ne pakpat ze namdi gu keriekemui ge sapnam ’ndi de lei, zai bau na zene helu ge bamme leine je ’nsapat ze penui je gî ’ndi de lei.

⁴⁵Zai Abimelekbe ne chipau namdi ze chipau mai, mai kat luî ka’nggi de lei; namdi ze pa ne sut ’ndi de lei, zai pelung ge ziemmena bamme je tewchat ’ndi de lei; zai pa ne namdi ze tew’nsia lu ze ’nchaî ’nrukpuigit kai bei de lei.

⁴⁶Shekem gu hekihube ge bamme leine chize seu lu dege, El-berith ki gu ’mbaiki ge penui gut ti de lei.

⁴⁷Shekem gu hekihube gu ziemmena ramme leine wang’ndui gai lamui de lei be Abimelekbe dage pau gai bei de lei.

⁴⁸Zai Abimelekbe Zalmon Deiloa ’mbe pa benai pe dage bamme leine hang di de lei; zai Abimelekbe â pe ba ge ’nrei tei lu, hechingkeî put kat kuî lu, puachu lu pe keîtoa ge kai de lei. Zai pe dage bamme bau suage pa ne, “I tewbe ningnui ngaulube luigum ze kelua ze I ne tew gum ze tew zu lau,” ze kacheu de lei.

⁴⁹Chigum ze ziemmena ’nteumena penui put-put hang kuî lu, Abimelekbe chai suitat ze ’mbaiki ge kua gai bei de lei, zai penui ne chi ’mbaiki ze penui peireige hemituanam gai bei de lei, chipauziegene Shekem gu heki kehube gu ziemmename leine du chai di de lei, ’mpeumi benai ’mpuimi ziemmena chang kat riâ chai di de lei.

⁵⁰Chidadege Thebez ’mbe Abimelekbe tat te lei, zai Thebez hiage tejeîbâm tew lu, chize lu ’ndi de lei.

⁵¹Kane namdi lungge heki hube peranchibe ki bam de lei, zai namdi gu ziemmena leine ’mpeumi benai ’mpuimi chige pak kai di de lei, zai pelung ’mbene ’ngkam kainam ’ndi de lei; zai penui chi heki hube ’mpûm ’mbe chu di de lei.

⁵²Zai Abimelekbe chipau ki ge wang lu, chige ka’nggi de lei, zai chize hemitua gai be ra hangge ’ngkam hia wang’nna di de lei.

⁵³Zai ’mpuimi hangkat ne chêuniakbe chukâng ’nreipeu zene Abimelekbe peî sîm bei de lei, zai pe peîra sîmruai ’ndi de lei.

⁵⁴Chidadege pe gu hereimerua puapeu rehang’mpeu je kelua ze kû lu ze, zai pechu rang gai ze, “Ning gu hiazutkie tatpat lu achu tewchat kai zu lau, ziemmename ne achu, ‘’Mpuimi ne pechu tewchat lei,’ ze acheu mak ra hangge zeu,” ze kacheu de lei. Zai pe gu rehang’mpeu ne pechu gechipelapik kai bei ze pa chai di de lei.

⁵⁵Abimelekbe chai di de lei be Israelme ngau lu dege, ’nteumena pe ki-ki ’mbe tat kam di de lei.

⁵⁶Aigum ze Hera ne Abimelekbe gu tâ-kesiabe tewbe, pa ne pe sikiname riaksename je tewchatbe gene pe peu peireige tâ-kesiabe tewgai’ndibe hî ze peiruî gai de lei;

⁵⁷zai Shekemme penui lungriak kesiabe ze penui peireige keu gai dai ra Hera ne tew gai bei de lei; zai Jerubbaalbe na Jothambe gu desetkaibe ze penui peireige wangchang de lei.