Read Zeme Naga 3 JOHAN 1 Bible Online

3 JOHAN 1 - Zeme Naga bible

3 JOHAN 1

¹Gechîngpeu dagene, I samsang gene kehungpeu Gaiasbe dage,

²I hunglangpeu gau, nang yi ze bam ra, zai ning pum du hereuteuneu mak bam ra I ning hangge kellum gai de lei; nang keringbe ge du yi ze la lei be chî lei.

³Samsang lam ge nang ne ’nninghekuî ze bambe benai samsang luigum ze nang lung bambe rasam ze, nang ne samsang ge suichi-desang bei run dadege, mi puiname ruage hanggesame ne wang lu chize sakkitewliabeibe luage I ne a suiyi-desang ze bam de lei.

⁴A name ne samsang ge suibambe rasam I seube ge chipau peirei a hangge a suiyi dai sua ra ga de lei.

⁵I hunglangpeu gau, nang ne mi puiname hangge tâka’ngguabe luage nang ne mâ-tewgaibe ze helungyibe teiliabe chang de lei, ’ngkeune ze hesangme,

⁶chi ning dage kehungbe bambe rasam penui ne herakiangname masuage sakkitewliame dage zeu. Hera gu tâtewpeu kezei hang penui gu tebeî’mpuî hangge nang ne penui je langpat zun gai ra de lei.

⁷Penui â pe ji (Krista ji) hang ziegene tâtew-tatpatbe ge Hera je neimakme dagene â mâ de lumakme bau daseu.

⁸Chigum ze nang ne aigumbe kau ramme je ’ngngâ gai ra yi sing lei, chidezai anui ze samsang ge tâtewkaheruame chang le ra hangge zeu.

⁹Herakiangna hangge I mâge â raw gai ’nde lei; kane Diotrephesbe, keraîpeu tewneipeu ne a dage rezie bambe mâ-hangge du chak kai mak lei.

¹⁰Chigum ze I wang dezai pa tâtewbe tak a peireige sam kesiabe ramme sa gai ze dam-kadesangbe salia kam gai bu lei. Zai chigene pe lungwângchangbe mak ze mi puiname je ’nchâgailak ze bam lei, zai penui je ’nchâneime je du pa ne nam ze herakiangna gene hela ’mbe penui je lupat kai ze bam lei.

¹¹I kehungpeu gau, kesiabe helitei se lau, kane keyibe ze helitei lau. Mâ-keyibe tewbe kau ze Hera gu chang lei; mâ-kesiabe tewbe kau â, Hera je ngau mak lei.

¹²Demetriasbe yibe â haimena ne sakkitew lei, zai samsang ne du sakkitewgaihâ lei. I ne du pechu sakkitew lei, zai I sakkitewbe ze gesang lei be ningnui ne chî lei.

¹³I sam raw gai ra a dage misongga la de lei, kane I ne leisitang benai leisidui ne rawsua ra mak lei;

¹⁴I ne ningchu hedautâu gai kelua ra, zai heju ne heju hedau ze ’mpautâu gai ra heguî ze bam de lei.

¹⁵Ning dage peize desieyibe bam lau. Mi kangme ramme ’nteumena ne ningchu rechâ gai de lei.