Read Zeme Naga JUDA 1 Bible Online

JUDA 1 - Zeme Naga bible

JUDA 1

¹Judabe, Isua Krista guâ ka’ngguapeu benai Jakobbe kinapeu dagene, Kûpatkaibeime, Hera Bepeu gene kehungme zai Isua Krista ne reî ze bamme dage:

²Peize ka’nggiabe, desieyibe, zai kehungbe ze ningnui dage tewpung gai be lau.

³Kehungme gau, anui ’nteumena ne tewka’nringbe ngau kam ze bambe deu ge I ne sam raw gai nei-desang ze bambe ge, keneime ka’nchime dage luakatne pelane hang peigai’ndibe, chi keneibe hangge ze helungwângchang sing ze bam ra kiâm gai ze aize raw gai ra ka’nnangbe hang I ne ngaupat kai de lei.

⁴Ziemmena hanggesame, tingtie besua’ngka gene penui je tew’ngkuigaibe rasam raw gai bei ze bamme, chime ze ningnui ruage reine ze gut ti de lei. Penui â penui dage Hera luilungtak yibe game, anui Rapeu ka’nggiabe ze hangleutewbe luilung kesiabe ge teihelei gai ze bamme benai penui gu Dilangpeu Isua Krista benai Tingwang je ’ngkim ze bamme bau lei.

⁵Besua’ngka gene aize ningnui chî di bam lêuzaidu I ne ningnui je rang’ngkia gai nei lei, chi Tingwang ne pe gume je Ijip gene lupat kai bei de lei, kane bechâng dege ’nnum’mmimakme je â tew’ngga ’ndi lei kacheube zeu.

⁶Zai angelme du penui bâm ge bam mak ze, kane penui bâm kezei ze put kai ’ndizai â, samrambe naimikpui kedibe mai riâ hangge pa ne kemuîbe chuklangbe bâm ge betun mak ze hegeîria ne pi ze bambe ge kai nan tai de lei;

⁷Sodom benai Gomorra zai pehuâzie ge bambe namdi ramme ne hangleutew ze hemeipumsie keneibe ge ka’nzûbe tâ tew ze betunmakbe hemi ne tewsabe lie ze teiherangtew bam ra changdibe gum zeu, ze kacheube zeu.

⁸Aipau siabe tak gene aime ramme ze penui mang-ka’mmibe ramme zene penui pum tewhebâ, (Hera gu) rezie tuâpat kai, zai kehube ge pengêudi ze bambe ramme (angelme) peireige du sa’nsia ze bam lei.

⁹Kane angel dilangpeu Mikaelbe ne Mosabe kechaipum deu ge diabolbe dage hegei ze samtube luage pa ne diabolbe peireige sa’nsia ze samram gai ra ’nning mak lei, kane acheu sa ze, “Tingwang ne peize ningchu ’ngngiam be lau,” kacheu de lei.

¹⁰Kane aime bau â penui ne chimakbe ramme ge sa’nsia ze bam lei, zai hekaubena luilungtak gene penui mâ-gechîbe zene penui je tew’nsia gai bei de lei.

¹¹Penui hang â mi duânggabe de lei! Penui ne Kainbe tatbe ’mpuî ge tat kai ze, zai pelâp-pegîe ngaurabe hanggene penui runne penui je Balaambe kemaube ge mau gai dai ra peipat kai ze, zai Korabe ne Hera je ka’nggibe ge penui du ’nggi’mpam gai ze chigene penui ga gai ze bambe ziegeneu.

¹²Airamme ze â ningnui gu kehungbe-ngi (haimena mâ-teu ze mi suiyi kaheruabe) hangge mâ-tewka’nsiabe zat ramme chang de lei, penui runne penui hang chibe gene teu-sak-meneu lu keleurua lei; penui â tingkai ne gui’ntîruabe heduipungmakbe kemâu de lei; penui â hingbang hechit ting ge keruabe bang luâna (kengaube ge benai ngaumakbe ge) chaidesua ze pema gene puipat’ndibe bang ramme de lei;

¹³penui â sungkling heduiteleu kechibe de lei, penui gu ka’ngngambe hûp ramme tachube zeu; penui â giruabe hegi ramme, penui hangge kemuîbe gechukbe bâm betingbeta hang kaikua’ndime bau de lei.

¹⁴Aime bau deu ge chi Adam gene reheipiakeube pasenabe ge chi Enokbe zene pau’ntua gai ze, “Pie le lau, Tingwang ne pe gu ka’nchime changsenângme je ngua lu wangchang de lei,

¹⁵haimena peireige samram ra, zai Hera je neimakme bambe tak gene Hera je neimakme tatew penui ne tewgai’ndibe ramme benai Hera je neimakme hemuime ne sam siabe ramme sagai’ndibe peireige chau’ngkui gai ra hangge zeu,” kacheu de lei.

¹⁶Aime ramme â ki ze geikangchime, hegeineime, hemeipumsie ka’nchiebe suiguttew ze bamme, pesamkangradime, mi runne mi hang yi ra miramme ruâgetoachime bau de lei.

¹⁷Kane kehungme gau, anui Wang Isua Krista rasam kemeume ne rang’ntuagaibe ze chî bam lau;

¹⁸penui ne ningnui je, “Beting nâlangbe ge â Hera je neimakbe luilungtak kesiabe tak gene kehichibe ramme pat ku lei,” ze kacheube zeu.

¹⁹Aime ze kedeirei luilung gu ziemmena, penui dage Herui game, pebau tewchâmpatme bau de lei.

²⁰Kane ningnui mi puina kehungme gau, ningnui gu ’nchilangbe keneibe gene ningnui runne ningnui je teichu ze bam lau, Herui Ka’nchibe gene kellum bam lau;

²¹chi Hera kehungbe gene ningnui runne ningnui je reîchi ze bam lau; ringbetunmakbe ngaurabe hangge anui Wang Isua Krista ne ’nggiagairabe ze kuâ bam lau.

²²’Nnumteguak ze bamme je ranglia’mmi gai lau;

²³hanggesame je hemi gene chakpat kai ze tew’nringpat kai lau; kêdame je ngauka’nggiabe teilia lau, kehingbe lungpung lu zeu, hemeipum ka’nchiebe tatew gene deîhebâgai’ndibe paîni ’nsangdu ngaugailak zeu.

²⁴Chunage ningnui kâuderabe gene ningnui je tei’nggim ze bambepeu zai pa pe ngeudibe masuage ningnui heziâkga ze hesuiyibe ne ningnui je nguawanggaiduipeu dage,

²⁵Isua Krista anui Wangpeu gezene Hera anui je tewka’nringpeu hangkatgap bambepeu dage pengêudibe samramchibe, kaheguangbe, reziechibe ze pehî leine ge zai chunage zai betingbeta peize bam bam lau. Amen.