Read Zeme Naga KELIÂBE 1 Bible Online

KELIÂBE 1 - Zeme Naga bible

KELIÂBE 1

¹Mâ-wangchangkeluarabe bambe ze Isua Krista ne pe gume je teilia ra Hera ne pechu (Isua je) peigaibe; zai pa (Isua) ne pe gu angel’mpeu, pe guâ ka’ngguapeu,

²chi Hera sam benai Krista ne sakkitewgaibe zai pa ne mâ-kengaube leine ge du sakkitewpeu, chi Johanbe je langgaibe gene chize chiliâ gai bei de lei.

³Paugaika’ntuabe sam ramme kiâ’nchi ze kiame yi de lei, zai keseume, zai chi rawgai’ndibe teika’mmime yi de lei; beting a na di daseu.

⁴Johanbe dagene Asia ge herakiangna sename dage: Chuna bam-bambe, bamdibe zai bam-bamrapeu dagene, zai pe gu heguang-bamrak suage bambe herui sename dagene,

⁵zai sakki gesang Isua Krista, chaidime ruage meraipeu, zai kedeirei ge heguangme ruage samrampeu dagene ningnui dage ka’nggiabe benai desieyibe peize bam lau. Anui je hung ze pe jai ne anui je anui gu hemui gene ripat kai ze

⁶zai anui je heguangram hang tew gai ze, zai pe Rapeu benai Bepeu hangge anui je tingkume chang ra tewgaipeu dage peize betingbeta pengêudibe benai samramchibe ze bam bam lau. Amen.

⁷Pie le lau, pa â kemâu gene wangkeu mui de lei, hemik leine ne pechu ngau gu lei, pechu giagaime leine neu; zai kedeirei ge pezat leine ne pe ziegene hap kam gu lei. Aigum ra di de lei. Amen.

⁸“I ze Alpha zai Omega lei,” ze Getaleitewchipeu, bam-bambe, bamdibe zai bam-bamrapeu Tingwang Hera ne rang lei.

⁹I Johanbe, ningnui puina’mpeu de lei, tewsabe liebe ge zai heguangram ge zai hereuliebambe ge Isua gene ningnui benai herua ze bambepeu, Hera gu sam benai Krista gu sakkitewbe sam hanggene heduiluaka’nggua Patmos kacheube ge bambepeu zeu.

¹⁰Heguangpeu gu naimikpui ge I â Herui ge bam di de lei, zai a chai ’mbene hegeîluîkie kuâ gum ze hekuâ kechibe ne acheu sa ze

¹¹“Nang ne ngaube ze leisikuak ge raw gai lu ze chize herakiangna sename, Ephesi dage zai Smarna dage zai Pergamos dage zai Thiatira dage zai Sardis dage zai Philadelphia dage zai Lodikia dage lang gai zu lau,” ze kacheube I seu de lei.

¹²Chidadege achu ka’mpaube ze ’ndaikau kuâ mei be chî ra I ’nreiwang dege, gechâk hemibung-kaira sena bambe

¹³zai hemibung-kaira sena zuilung ge hangkat ziemmena na gum ze pe puâ kaisup kai lu zai pe ga ge gechâk kiakâk reu gai lu bambe I ngau de lei;

¹⁴pe peî benai pe tam â, mâ-gêulang hâbe benai kebun gum ze ’ngngûpchup lei; pe mik kena â hemimelei gum,

¹⁵pe pî kena â hetageî hemideki gene rû’nchichiaklube gum, zai pe kuâ-ruak â heduidibe ’ncheu gum lei;

¹⁶hegi sena pe ba hezat’mbia ba ne tei de lei, mui na lam liabe hiazutkie pe mui gene zuapat ze, zai pe ju â naimik ’mbi perîsibe riâ gum lei.

¹⁷I pechu ngau dege chai di gum ze I pe pî ge kâukeu gai di de lei. Kane pa ne pe ba hezat’mbia ba a peî ge kai lu acheu sa ze, “Hing se lau, I ne raîlangbe benai nâlangbe lei,

¹⁸zai I ze ringbampeu lei; I chai di de lei, zai pie le lau, I betingbeta hangge ring la mui lei, a dage Kechaibe benai Kechaiberam gu chabi lamui lei.

¹⁹Chunage mâ-wangchang ze bambe benai bechâng dezai mâ-wangchangrabe nang ngaube ze raw gai zu lau.

²⁰Mâ-’nningchilakbe zat a ba hezat’mbia ba ge chi hegi sena zai gechâk hemibung-kaira sena nang ngaube, chi hegi sena ze â, herakiangna sena gu angelme hang sename je rang, zai chi hemibung-kaira sena je â herakiangna sena je rangbe zeu.