Read Zeme Naga KELIÂBE 10 Bible Online

KELIÂBE 10 - Zeme Naga bible

KELIÂBE 10

¹Chidadege kêdabe angel’mpeu peranchipeu, pechu kemâu ne ’nzui lu, pe peireige ’ngkitplei ne gûm lu, zai pe ju tingnaimik gum pung lu, zai pe pî kena ze du hemimelei chube gum ze tinggîm ’mbene wangkeube I ngau de lei.

²Pe ba ge leisizui poine latpatlube bam lei. Dadege pe pî hezat’mbia pî ne sungkling chai lu zai pe pî heku’mbia pî ne (kedei) heram chai lu,

³heradi kedibe ka’nrâbe gum ze hekuâchibe ne kû gai de lei; pa ne kû gai dege, lua sena tingchei gai de lei.

⁴Zai lua sena tingchei gai dege, I ne raw gai ra heka gai de lei, kane tinggîm ’mbene hekuâ, “Tingcheibe sena zene kerangbe sam rawkeu gai se lau, ’nchet kai le lau,” kacheube I seu de lei.

⁵Dadege I ngaube angel’mpeu ze sungkling benai (kedei) heram ge sap lu tinggîm ’mbe pe ba hezat’mbia ba getuachu lu

⁶ze betingbeta bam-bambepeu, tinggîm benai chige kebambe zat leine tewgaipeu, kedei benai chige kebambe zat leine tewgaipeu, zai sungkling benai chige bambe zat leine tewgaipeu (Hera) ji gene deseutew ze beting â gîngtie ta de lei,

⁷kane chi pasenabe angel’mpeu zene hegeîluîkie ne kûgairabe ting ge Hera ne pe gua ka’ngguabe kemeume dage ranggai’ndibe luigum ze pa (Hera) ne tew ra ka’nningbe mi ’nningchanglakbe ze tewpui gai gu de lei, kacheu lei,

⁸chidadege tinggîm ’mbene chi I seube hekuâ zene achu ’mpau dai ze acheu sa ze, “Tatchu lau, chi sungkling benai (kedei) heram ge sapbampeu, angel’mpeu ba ge leisizui rapat kai ze bambe tei le lau,” kacheu de lei.

⁹Chigum ze I ne angel’mpeu dage tat lu chi leisizuipoine achu pei ra pechu salia de lei; dadege pa ne achu, “Aize tei lu teu le lau; aize ning bungpui lungge karî bam gu lei, kane ning mui ge â ’ngkuidui gum kum ze bam gu lei,” kacheu de lei.

¹⁰Dadege I ne chize angel’mpeu ba gene tei lu teu ’ndi de lei; chize ’ngkuidui gum ze a mui ge kum bam di de lei, kane chize I ne teu gai bei dege â a bungpui ge â karî bam di de lei.

¹¹Dadege achu rang gai ze, “Nang ne ziemmena pezat leine zai heramzatme ramme, zai helad gechâmme zai heguangme dage Hera gu sam pau’ntua gai dai sing ra de lei,” ze kacheu de lei.