Read Zeme Naga KELIÂBE 11 Bible Online

KELIÂBE 11 - Zeme Naga bible

KELIÂBE 11

¹Chidadege hetui gum ze mâ-ka’ndeube tui achu pei gai lu ze salia ze: “Zuachu lu ze Hera gu kellumki benai herâtewbe bâmra ze ’ndeu le lau, zai chige kellum ze bamme riak sei le lau,

²kane kellumki gene hela pebâm dibe bâm gu ze â ’ndeu se lau; chize â sâu gai ne lau, zai chize â heramzatme (Jentailme) hangge pei gai ’ndi da, zai penui ne namdi ka’nchibe ze kêu hedai ze kena huakgetie ze bam gu daseu.

³Zai I ne a gu sakkitewme kena je meseigiria paî bâ lu hezie chang kat ze haî na ze riakseruk kemeu sam pau ze bam ra rezie pei gai gu lei,” ze kacheu de lei.

⁴Aibe kena ze kedeirei Wangpeu masuage sapbe olib bang kena benai hemibung-kaira kena de lei.

⁵Zai mi-mige ne penai je tewhereu bei dege â, penai muiki gene hemi ruikeu ze penai teureime je rû’ngga ’ndi di lei; mige ne penai je tewhereu gai ’ndizai â pechu â acheu ze tewchat kai ra di de lei.

⁶Penai kemeu sam paube ting ge penai ne nei-neibe luage tingruirabe nam ra, zai hedui ramme ze hejai chang ra tew gai ra, zai kedeirei je herarît ne peize tewhereu ra rezie penai dage bam lei.

⁷Zai penai gu sakkitewbe tâ tew kam gai dezai â, chi mârekaune besînggabe kuiki gene chube zene penui je herei ze duî lu tewchat ku lei,

⁸zai penai chaidibe pum kena ze chi penai Wangpeu je gîchatkaibe bâm, chi herui lam gene sagaibe Sodom benai Ijip kacheube, chi namdi kedibe gu keloaning ge kai bei ze bam gu lei.

⁹Hezie kechum ze bepi riâ ziemmena zat leine gene zai pezat leine benai pebau gechâm leine zai heramzat leine gene patme ziemmename ne penai chaidibe pum kena je heguapie ze penai pum ze heraw ge hekâm gai ra ngaurau ze bam gu lei,

¹⁰zai kedeirei ge kelungme ramme ne penai peireige penui suiyi ze ’ntu’nta ze kela ramme peihezak ze bam gu de lei, ai kemeu’mpeu kena zene kedeirei ge kelungme je tewsâ ze tewhereu ze bam bei dadegeu.

¹¹Kane hezie kechum ze bepi châng dege penai pum ge Hera dagene keringbe chuilu gut kai bei ze penai pî ne penai sapchu di ze bam de lei, dadege penai je ngaume leine ne hing-desang bam di de lei.

¹²Chidadege penai (kemeu’mpeu kena) ze tinggîm ’mbene hekuâchibe ne sabe, “Ailia ’mbe hang de lau!” kacheube kuâ seu de lei. Dadege penai teureime kengaube gene tinggîm ’mbe penai chu di de lei.

¹³Zai chipau hî ge keteika’nchibe wang de lei, dadege chi namdi ze dau kereu ge dau kat â ’ngngaîkeu di de lei; keteiwangbe gene ziemmename chang sename je â tewchat ’ndi de lei, dadege â chige ’nsakpatme bau ze â hing-desang di ze tinggîm Rapeu ngeutew ze bam di de lei.

¹⁴Chi pakenabe mi duânggabe â tat’ntua de lei; pie le lau, pakechumbe mi duânggabe wangzi gu de lei.

¹⁵Chidadege pasenabe angel’mpeu ne pe gu hegeîluîkie ’mmut kai bei ze, “Kedeirei gu heguangram ze â anui gu Tingwang gu benai pe gu Krista gu heguangram chang gai de lei, zai pa ne betingbeta heguang ze bam gu lei,” ze kacheu de lei.

¹⁶Dadege â gechîngme hang’ngkai ze medaime Hera masuage penui gu heguang-bamrak ge ka’ntaume zene kâu’ngkumkeu ze Hera je kellum ze,

¹⁷“Anui ne anui suiyibe sam ning dage pau gai lei, Tingwang Hera tâtewchipeu, bam-bambepeu zai bamdibepeu, nang ne ning gu tâtewchibe rezie kedibe tei lu samramchudibe ziegeneu.

¹⁸Hera je chimakme â penui lumpum-desang di de lei, ning râtarabe ting wangchangdibe ziegeneu, kechaime je samramrabe ting zeu. Ning guâ ka’ngguame kemeume, zai ning gume ningchu hengêutewme leine, kedime zai kecheime hangge getoabehi peigairabe ting wangchang di de lei. Kedeirei tewka’nsiame je tew’nsiarabe ting ze wangchang di de lei!” ze kacheu de lei.

¹⁹Chidadege â tinggîm ge Hera gu kellumki ze lat kai de lei, zai pe gu samhatkaibebung ze kellumki lungge ngau di de lei; dadege â hegiria kakepitbe ramme, hekuâ kechibe ramme, tingcheikelung-lungbe ramme, keteika’nchibe zai desak keube kechibe bam di de lei.