Read Zeme Naga KELIÂBE 12 Bible Online

KELIÂBE 12 - Zeme Naga bible

KELIÂBE 12

¹Mâ-gechâmbe mi ’nningchilakbe kat tinggîm ge lia de lei, ’mpuimi hangkat naimik ne paî gum bâ lu, hekêu ne pe pîkang ge bam lu zai pe peî ge kraun hegi kereu ze kena bambe kai lu bam lei;

²pa pe gunpung ze henalungkeu ra keteube ted gene pe duângga ze ka’nrung de lei.

³Dadege kêdabe mâ-gechâmbe ningdaulakbe tinggîm ge lia de lei; pie le lau, dragon (henêu kedibe), pe peî sena benai pe kie kereu pung lu, zai pe peî ge kraun sena kai lu bam de lei.

⁴Pe mi zene hegi ramme dau chum ge dau kat â biak kai bei ze chiramme kedeirei ge ’ngngaîkeu di de lei. Dadege chi dragon (henêu kedibe) ’mpuimi ne henalungkeu dezai pe na je pa ne teurabe hanggene chi ’mpuimi henalung ra changdipui suage sap kai de lei;

⁵chi ’mpuimi zene ’ngngiêne ’mpeumi napoine, heramzatme leine peireige hegeîtui ne samramrapeu je lungkeu gai de lei, kane pe na je â Hera dage benai pe gu heguang-bamrak ge nguachu gai ’ndi de lei,

⁶dadege â chi ’mpuimi ze Hera ne pe hangge kedâgai’ndibe bâm, chige pechu â hezie chang kat ze haî na ze riakseruk reheiheka gai bei bamrabe bâm hênamkang ’mbe pak kai di de lei.

⁷Chunage tinggîm ge herei ’ndetchu ze, Mikaelbe benai pe gu angelme ne dragon je kaherei de lei, dadege chi dragon benai pe gu angelme ne herei ze ka’nggi de lei,

⁸kane dragon benai pe gu angelme je â duî nan ze tinggîm ge penui hang â bâm ga di de lei.

⁹Dadege â dragon kedibe, Diabolbe zai Satan acheu ze kûbe, kedeirei je choarua ze bambepeu—pechu â kedeirei ge tuâkeu gai bei de lei, zai pe gu angelme je pe dage tuâkeu’mpam gai bei de lei.

¹⁰Dadege tinggîm ge hekuâkechibe I seu de lei, acheu sa ze, “Chunage â tewka’nringbe, zai tâtewchibe rezie zai anui Rapeu gu heguangram zai pe gu Krista gu rezie ze wangchang de lei, anui Rapeu masuage ’nrîmbeting benai tingmuî ge anui puiname je ’nggi ze bambepeu je tuâkeu gai ’ndi dadegeu.

¹¹Zai pechu â penui ne Melipoine jai benai penui sakkitewbe gu sam zene duî ’ndi de lei, penui â penui keringbe ze chairabe hang du peipat kai ra ’nzâ mak tadegeu.

¹²Chidaze Hei, tinggîm piehang-ngaube benai chige ningnui kebamme gau, ningnui suiyi’nta ze bam zu lau! Kane Hei kedeirei benai sungkling gau, ningnai duângga gu lei, diabolbe zene pe hangge beting duidibe pa ne chibe ziegene pe râta-kadesangbe ziegene ningnai dage pa wangkeu gai di dadegeu!” ze acheu zeu.

¹³Zai chi dragon ze pechu kedei ge tuâgaibeibe pe runne pechu ngau lu dege â, chi ’ngngiêne ’mpeuminapoine lungkeugaipui je guaka’nsa de lei.

¹⁴Kane chi ’mpuimi ze â, pechu kum chum ze bepi hênamkang ge reheikagaiberabe bâm ’mbe henêu dagene pak te ra keliengdi kedibe kan kena pechu â pei gai bei de lei.

¹⁵’Mpuimi je hedui ne peize ’ntîtat ra pa tattibe chai-chai henêu zene pe muiki gene hedui ze ’nggeuki gum latpat kai bei ze bam de lei.

¹⁶Kane kedei zene ’mpuimi je ’ngngâ gai ra wang lu, pe muiki ’ngkakpat kai bei ze henêu muiki gene hedui ruîpatkaibe ’nggeuki ze ’nzua ’ndi de lei.

¹⁷Chidadege â dragon ze ’mpuimi dage pe lumpum-desang di ze, chi ’mpuimi name kêdame leine, chi Hera gu hingde ge tat’mmi ze Isua gu sakkitewbe sam teime peireige hereitew ra tat ti de lei. Dadege pa (henêu) sungkling kung depûloa ge sap bam de lei.