Read Zeme Naga KELIÂBE 13 Bible Online

KELIÂBE 13 - Zeme Naga bible

KELIÂBE 13

¹Zai mârekaune pe kie kereu zai pe peî sena, pe kie ramme ge kraun ramme pung gai lu, zai pe peî ramme ge Hera je sakahebâbe ji pung gai lu ze sungkling gene zuachubambe I ngau lei.

²Zai chi mârekaune I ne ngaube ze â, keriakkau luigum, pe pî kena ze hegum pî luigum, zai pe muiki ze heradi kedibe muiki luigum lei. Dadege dragon zene keriakkau je pe gu tâtewchibe rezie zai pe gu heguang-bamrak zai pe gu rezie kechibe pei gai bei de lei.

³Pe peî ramme ruage peî kat ge pungchatrabe jâm bambe hangge ngau gai lei, kane chipau jâm ze â teleu’mmi lu de lei, dadege kedeirei leine ne ningdaulak ze chi mârekaune chai suitat ti de lei.

⁴Dragon ne mârekaune je pe gu rezie peigaibeibe ziegene ziemmename ne chi dragon je kellum di de lei, zai penui ne, “Chi mârekaune gumbe châu la lau, zai châu ne pechu ’nggichi dui lau?” acheu ze kakellum de lei.

⁵Zai chi mârekaune je gechîrettewbe sam ramme benai Hera je saka’nsiabe sam ramme sapat ze bam ra pe muiki hang pei gai bei de lei, zai kêu hedai ze kena pe sui-suitew ze bam ra lun gai bei de lei;

⁶chi mârekaune ze Hera ji je benai pa kebambe bâm, chi tinggîm ge bamme leine je sahelêu ze Hera peireige sa’nsia gai ra pe muiki ’ngngapat kai de lei.

⁷Zai keneime ka’nchime je hereitew ze penui je duî le ra du pechu rezie pei gai bei de lei. Zai pa ne pezat leine zai ziemmena pezat gechâm helad gechâm leine zai heramzat leine peireige pechu rezie pei gai bei de lei,

⁸chi tewchatkai’ndibe Melipoine gu keringbe leisikuak ge kedei ’ndam gai makgene penui ji rawgaimakme kedeirei ge kebamme leine ne chi mârekaune je kellum ze bam gu de lei.

⁹Peize pe kun kebambe kau â seu le lau:

¹⁰Mi-mige de kebang hangge tîm ’ndizai â kebangchangrabe ge pa ze tat ra lei; mi-mige hiazutkie ne bichat tizai â, hiazutkie ne pechu bichat himchang ra lei. Aige zene keneime ka’nchime je hereuliechi ra, zai neichi ra kûgaibe chang de lei.

¹¹Chipau chângge kêdabe mârekaune kedei gene zuachudibe I ngau de lei; chize melipoine gum ze pe kie kena pung lu dragon gum ze sam sa de lei.

¹²Ai mârekaune zene keraîbe mârekaune bambe gene pe gu rezie leine tewlia gai de lei, dadege kedeirei benai chige kebamme leine ne chi pungchatrabe jâm pa pungbe teleu’mmigaibeibe chi keraîbe mârekaune je kellum kam ra tew gai bei de lei.

¹³Ai mârekaune (pakenabe) zene tâningdaulakbe kedibe ramme tew ze, ziemmena mikngau gene ’nsangdu tinggîm ’mbene hemi wangkeu ra tew gai ze bam de lei;

¹⁴zai chi mârekaune (keraîbe) suage tewlia ra peigaibeibe chi tâningdaulakbe ramme tei ze mârekaune kenâbe zene kedeirei ge lungme ramme je (mârekaune keraîbe je peize ’nnum’mmi ra) duairua ze bam de lei, chi mârekaune hiazutkie ne tewjâm gai bei sede ring ze bamdibe chi mârekaune (keraîbe) je mârekaune luîtak hang chiam ra penui je rang gai zeu;

¹⁵dadege chi mârekaune (keraîbe) luîtak hang tewlube ge hechuilu keringbe bam ra pei gai ra chi mârekaune (kenâbe) je rezie pei gai bei de lei, chidezai peize mârekaune luîtak hang tewlube zene sam du sapatchi le ra, zai chi mârekaune luîtak hang tewlube je kellummakme je â tewchat ra tew gai ra hangge zeu.

¹⁶Zai chi mârekaune (kenâbe) zene ziemmena kecheime benai kedime, keheume benai kelaksiame, lungzeunetewme benai kebangme je penui ba hezat’mbia ba ge lêuzai penui telie ge lêuzai ka’nchetbe kai kam gai ra du tew gai bei de lei,

¹⁷chidezai mi-mige ne du chi ’nchetkaibe ga zai â mâ lui de luichi lak zai zua de zuachi lak ze bam ra hangge zeu, chize â mârekaune ji mei nune pe ji gu nambar mei je rang de lei.

¹⁸Aize â kaningchingme ne chî ra lei: chi mârekaune gu nambar ze pe dage mâ-gechîbe bambe kau ne peize riampat le lau, aize â ziemmena gu nambar daseu, aipau nambar ze â haî seruk ze riakseruk ze seruk lei.