Read Zeme Naga KELIÂBE 14 Bible Online

KELIÂBE 14 - Zeme Naga bible

KELIÂBE 14

¹Chipau châng dege I pie gai de lei, zai ni, Zaion Loa ge chi Melipoine taige baudime penui telie ge pe ji benai pe Peu ji rawgailume chang haî kat ze hedai ze medaime sap bam lei.

²Zai tinggîm ’mbene hekuâ heduidibe kuâ gum zai tingcheibe kuâ kechibe gumbe I seu de lei; I seube kuâ ze â, ’nrabung kebetchime ne ’nrabung kebetbeibe kuâ gum de lei,

³dadege penui ne heguang-bamrak suagene zai mâ-keringbe zat medai bambe suagene zai gechîngme ramme suagene heleu karchibe tew ze bam de lei. Chipau leu ze mimige ne de tewchi lak kam lei, chang haî kat ze hedai ze medaime, chi kedeirei gene ’nripatkaibeime runne zangnêu.

⁴Aime bau ze â ’mpuimi dagene penui runne penui je tewhebâgaimakme bau de lei, penui â ka’ntia dadegeu; aime bau â Melipoine tatkai-kaibe ge suirua ze bam lei, aime bau zene Hera benai Melipoine hangge raîlangbe rachî chang ze pezat leine ruagene ripat kai bei ze bamme bau de lei,

⁵zai penui mui ne karasa-sagaibe ga lei, penui â heziâkgame bau dadegeu.

⁶Chipau chângge kêdapeu angel’mpeu ne kedeirei ge kebamme leine, heramzatme leine zai pezat helad gechâm leine zai ziemmename leine dage sam pau gai ra hangge betunmakbe gospel pe dage kai lu tinggîm zuilung ge kinrua bambe I ngau de lei;

⁷dadege pa ne hekuâchibe ne sa ze, “Hera je hingchi ze pe ngeutew lau, pa ne samramrabe nehî ze â wangchang di daseu; zai ting benai kedei, sungkling benai hedui-depin ramme tewgaipeu je kellum zu lau,” kacheu de lei.

⁸Zai angel’mpeu kêdabe, pakenapeu ne angel’mpeu keraipeu chai-chai sui ze acheu sa ze, “Kâu de lei, Babilon kedibe kâu de lei, heramzatme leine je pe gu hangleutewbe kahebâbe gu wain sak ra tewgaipui zeu,” ze kacheu de lei.

⁹Dadege kêdabe angel’mpeu pakechumpeu, chi keraîbe kena chai-chai sui ze, hekuâchibe ne acheu sa ze, “Mi-mige mârekaune benai chi peluîtak hang tewlube je kellum, zai pe telie ge mei zai pe ba ge mei ze (mârekaune gu) ’nchetkaibe bambe kau â

¹⁰Hera lumpum piak chige mâ de haimakbe wain ruîpatkaibe, chi Hera lumpum gu wain ze pa du sak ku lei, zai pechu ze angelme ka’nchime benai Melipoine masuage hemi benai Salphar ne tewhereu ze bam gu lei.

¹¹Zai penui je tewsabe mika ze betingbeta chu ze bam gu lei; zai mârekaune benai peluîtak hang tewgailube je kakellumbe kau ramme, zai aipau ji hangge penui dage mâ-’nchetkaibe pungme leine hang â kemuî-keba penui hangge saukatemibe ga de lei,” ze kacheu de lei.

¹²Aigezene keneime ka’nchime, chi Hera gu hingde ramme tei’mmi ze Isua je keneime ne hereuliechi ze bam ra kûgaibe de lei.

¹³Dadege tinggîm ’mbene, “Aize raw gai zu lau: chuna gene seu ze Heguangpeu gene chaime, chi chaidime ze yi ra de lei,” ze kacheube kuâ I seu de lei. “Yisang run lei, penui tatew luigumbe penui dage dau bei dadege tâtewkahereube gene sautemi ra penui ngaulerabe zeu!” ze Herui ne kacheu de lei.

¹⁴Chipau chângge I pie gai de lei, dadege ni, kemâu kehâbe benai mige ziemmena (na) luigum ze pe peî ge kraun kai lu, zai pe ba ge ’ngkuaine pemuiliabe teibampeu zeu.

¹⁵Dadege kêdabe angel’mpeu kellumki gene zuapat lu chi kemâu peireige ka’ntaupeu je hekuâchibe ne kû ze, “Ning gu ’ngkuaine tei lu ze gat chu lau, kedei rachî â mei kam di ze gatrabe nehî wangchang di daseu,” ze kacheu de lei.

¹⁶Chidadege â kemâu peireige ka’ntaupeu ne ’ngkuaine ze kedei ge keliamkeu gai bei ze kedei rachî ze pa ne gat ’ndi de lei.

¹⁷Dadege kêdabe angel’mpeu tinggîm ge kellumki gene zuapat te lei, zai pe dage ’ngkuaine pemuiliabe bam lei.

¹⁸Chipau chângge kêdabe angel’mpeu, hemi peireige tâtewchibe rezieteipeu, chi angel’mpeu ze herâtewbe bâmra gene zuapat te lei, dadege ’ngkuaine pemuiliabe pungpeu je hekuâchibe ne pa ne kû ze, “Ning gu ’ngkuaine tei lu kedei gene patbe grepchîhuâ ramme ze gat chu lau, chi pechî ramme ze mei di daseu,” ze kacheu de lei.

¹⁹Chigum ze angel’mpeu ne pe gu ’ngkuaine ze kedeirei ge keliamkeu gai bei ze kedei gene grepchî gatwang kam gai de lei, dadege â grepchî niakbe bâm kedibe ge Hera lumpum ze tuâ gai bei de lei;

²⁰dadege â grepchî ze namdi hela ’mbene niak ti de lei, zai grepchî niakbe gene hejai pat ze hekun peî ge pamegauria pungbe riâ hejai sunghangchang ze stadia chang kat ze haî seruk, (kilometar haî chum) riâ luatatchang ze bam de lei.