Read Zeme Naga KELIÂBE 15 Bible Online

KELIÂBE 15 - Zeme Naga bible

KELIÂBE 15

¹Chipau chângge mâ-gechâmbe ’nningchilakbe, chi tâtewchibe benai ’nningchilakbe Hera lumpum nâlangbe hangge angel hangsename dage herarît zat sena bambe ze I ngau de lei.

²Zai hemi kakebutbe hedui judageî gum ’nchi-plingbe bambe benai chi mârekaune zai chi mârekaune luîtak hang tewlube zai chipau nambar zene penui ji hang chang ze bamme je duîkamlume ze ’nrabung ramme Hera ne penui je peigaibe tei lu, judageî gum ’nchi-plingbe sungkling kung ge sapdambambe I ngau de lei.

³Dadege Hera guâ ka’ngguapeu Mosabe benai Melipoine leu ze penui tew ze, “Ning tatew ramme â di-desang lei, zai mi ’nningdaulak-desang lei, Hei Tingwang Hera getaleitewchipeu! Ning gu ’mpuî ramme â ’nzei zai gesang lei, Hei reheime Wangpeu!

⁴Châu ningchu hing mak ra lau, zai châu ning ngeutew mak ra lau, Hei Tingwang gau? Ning runne ka’nchibe daseu. Heramzatme leine ne zuawang ze ningchu kellum gu lei, ning tatew ka’nzeibe ramme teilia gai ze bam bam bei daseu,” ze acheu ze leutew de lei.

⁵Aipau chângge I pie gai de lei, dadege tinggîm ge Hera bambe bâm ka’nchibe (sakkitewbe paîki) gu kellumki ze lat kai de lei,

⁶dadege angelme hanggesame, paî ka’nchibe hâplingbe ne penui puâ kai lu, penui ga ge gechâk kiakâk ramme reu gai lu ze bamme, chi herarît zat sena teime bau ze kellumki gene zuapat ti de lei.

⁷Dadege mâ-keringbe zat medai ruage kat zene angelme hanggesame bau je gechâkpiak sena, chi betingbeta bam-bambepeu Hera lumpum zene kaipuigitlube pei gai bei de lei.

⁸Dadege â kellumki ze Hera ngeudibe gene benai pe gu tâtewchibe rezie gene patbe mika zene hiampuigit bam di de lei, zai angelme hanggesame bau gu herarît zat sena ze kam gai mak tâne â mî de kellumki ge gutchi lak ze bam de lei.