Read Zeme Naga KELIÂBE 16 Bible Online

KELIÂBE 16 - Zeme Naga bible

KELIÂBE 16

¹Chipau chângge kellumki gene hekuâchibe gene angelme hangsename bau dage sam rang gai ze, “Tat ze kedeirei ge Hera lumpum piak sena ruîpat kai be lau,” ze kacheube I seu lei.

²Chigum ze keraîbe angel’mpeu ne tat lu ze pe gu hepiak ze kedeirei ge ruî gai bei de lei, dadege â mi katenetbe benai mâ-kesiabe hejâm kedibe (heteu) ramme ze ziemmename chi mârekaune ramme gu mâ-’nchetkaibe pungme benai mârekaune luîtak hang teleulube je kakellumme leine dage wang gai di de lei.

³Pakenabe angel’mpeu ne pe gu hepiak ze sungkling ge ruî gai bei de lei, dadege â chize ziemmena chaidime jai gum ze bam di de lei, zai sungkling ge mâ-keringbe bambe zat leine chai kam di de lei.

⁴Pakechumbe angel’mpeu ne pe gu hepiak ze ’nggeuki ramme ge benai hedui-depin ramme ge ruî gai bei de lei, dadege â chiramme ze hejai chang gai di de lei.

⁵Dadege â hedui ge besuitewpeu angel’mpeu ne sabe, “Nang ne samramgaibe ramme ge nang â pelingtew lei, nang â bam-bambe benai bamdibe, Ka’nchibe Hangkat lei.

⁶Ziemmename ne keneime ka’nchime benai kemeume jai tewpat kai bei, zai nang ne penui je hejai sak ra pei gai bei de lei. Aize penui peireige wangka’nziebe de lei!” ze kacheu de lei.

⁷Dadege herâtewbe-kaira ne ’nrung ze, “Eu lei, Tingwang Hera Tâtewchipeu gau, nang ne samramgaibe ramme ze â, gesang benai ka’nzeibe de lei!” kacheube I seu de lei.

⁸Pamedaibe angel’mpeu ne pe gu hepiak ze tingnaimik peireige ruî gai bei de lei, dadege â ziemmename je hemi ne pugesiê ze bam ra naimik je pei bei de lei.

⁹Ziemmename je â kelumbe ted keteube ne pugesiê bei de lei, dadege â penui ne Hera, ai mi je tewkahereube zat ramme leine peireige rezieteipeu ji ge deset kai bei ze bam de lei, zai penui lung heli mak zai pe ngeutew mak bam di de lei.

¹⁰Pamengeube angel’mpeu ne pe gu hepiak ze mârekaune gu heguang-bamrak peireige ruî gai bei de lei, dadege â pe gu heguangram ze kemuîbe ge bam gai di de lei; ziemmena ramme ze penui duânggabe gene penui leipak kedâugetie ze,

¹¹keteubeted benai hejâm ramme ziegene tinggîm Rapeu je deset kai de lei, zai penui tatew ramme gene heli mak tai de lei.

¹²Paserukbe angel’mpeu ne pe gu hepiak ze ’nggeuki kedibe Euphrates ge ruî gai bei de lei, dadege â chi ’nggeuki ge hedui ze changku gai di de lei, tingbia ’mbene heguangme wangrabe ’mpuî hang kedâgairabe hangge zeu.

¹³Zai herui kahebâbe ramme kechum hegau ramme luigum ze dragon muiki gene zai mârekaune muiki gene zai kemeu karasa-same mui gene zuapatbe I ngau de lei;

¹⁴ai herui kesiabe kechum ze â tâningdaulakbe tâ tew ze bambe diabolbe gu herui ramme de lei, Tâtewchipeu Hera gu tingnaimikpui dilangbe mai ge herei’nggirabe hang kedeirei pelane gu heguangme ramme je kûwang’ndui ra mâ-mâ ge tatruame bau zeu.

¹⁵(“Ni, mâ-kahegapeu gum ze I wang lei! Jeikeu mak ’nrak ze bamme, pe pum pumlâng bambe ngau mak ra hangge pe paîni kai lu kuame yi de lei!”)

¹⁶Dadege penui ne Hebrai lad ge Armageddon kacheube (chize Gîchatkaibe deiloa) ge wang’ndui gai de lei.

¹⁷Pasenabe angel’mpeu ne pe gu hepiak ze tingkai ge ruî gai bei de lei, dadege â kellumki gene, heguang-bamrak gene, hekuâchibe pat ze, “Tewkam gai ’nde lei!” ze kacheu de lei.

¹⁸Dadege â hegiria kakepitbe ramme, hekuâchibe ramme, tingcheikelungbe kuâ ramme, keteika’nchibe, chi ziemmename kedeirei ge bamgaibe gene mâdau de aigum keteika’nchibe wanggaimakbe zat ramme wang di de lei.

¹⁹Chi namdi kedibe ze dau chum pângpat ti, zai heramzatme gu namdi ramme ze kâu kam di de lei, dadege â Hera ne pa pe râta-kadesangbe gu hepiak ze Babilonram kedibe je sak ra tewgaibe ’nningdau di de lei.

²⁰Zai heram hedui ne luaka’ngguabe bâm leine ze tat kam di, zai kedeiloa ramme mâ de ngau ta di de lei;

²¹zai desak kedibe ramme, perît hit rengeu kau ramme tinggîm ’mbene ziemmename peireige keu gai ze, aigum ze mi hingka-desangbe tewkahereube zat wangbe ziegene ziemmena ne Hera je deset kai ra changbe riâ ze kêusau mak ze kêu bam di de lei.