Read Zeme Naga KELIÂBE 17 Bible Online

KELIÂBE 17 - Zeme Naga bible

KELIÂBE 17

¹Chipau chângge angelme hepiak sena teime hangsename ruage hangkat ne achu, “Wang lau, hepumzuateube ge hejidipui, hedui misonggabe peireige ’ntau ze bambepui peireige tewsâ ra bambe tak ze I ne ningchu ngualia gu lei,

²chi ’mpuimi, kedeirei heguangme ramme ne pe dage hangleutewbe tâ-kesiabe tew ze bambepui, zai kedeirei ge kelungme ramme ne pe dage pa hangleutewbe gu wain sakmeneu ze bambepui zeu,” ze kacheu de lei.

³Dadege pa ne Herui gene achu hênamkang ’mbe nguatat kai bei de lei, dadege ’mpuimi hangkat mârekaune pegeî giepâdabe peireige ka’ntaupui, pe dage Hera je tewkahelêube ji ramme puigit ze bambe, zai pe dage peî sena zai bekie sena pung ze bambepui je I ngau de lei.

⁴Chi ’mpuimi ze â pe puâ pegeî gie’nzairiabe benai giepâdabe ne kerubbit lu, zai mi katenetbe tatew ramme benai pa hangleutewbe gu kahebâbe tatew ramme ne kaipuigitkailube gechâkpiak pe ba ge tei lu gechâk zai teluichu zai tingchu pemîhungbe zat ramme ne keru ze bam lei;

⁵zai pe telie ge mi ningdaulakbe ji: “Babilon kedibe hepumzuateume benai kedeireime mi katenetbe tâtewme wangpui” acheu ze raw gai lei.

⁶Dadege chi ’mpuimi ze keneime ka’nchime jai benai Isua gu Martar (pe ji gene sâchatkai’ndime) changme jai ze sakmeneu lu bambe I ngau de lei. I pechu ngau gai dege I ningdaulak-desang di de lei.

⁷Kane angel’mpeu ne achu rang gai ze, “’Ndaitew nang ’nningdaulak lau? Chi ’mpuimi benai chi pechu pungbe pe peî sena zai pe kie kereu bambe mârekaune dage mâ-’nningdaulakbe bambe ze I ne ningchu ranglia gu lei.

⁸Chi nang ne mârekaune ngaube ze ringbambe ze chai di de lei, zai besînggabe kuiki gene chu lu ze ’nggagaiderabe ge tat ku lei; dezai kedeirei ge kelungme kedeirei putchube gene keringbe leisikuak ge penui ji raw gai mak ze bamme ne, chi mârekaune ze ring ze bambe chai dai di da, kane wang dai ra changbe ziegene mârekaune je ngau lu ’nningdaulak-desang ze bam gu lei.

⁹Aize kaningchingbe gene ’nningchi ra kû gai lei: chi bekie ramme sena ze â, chi ’mpuimi ka’ntaube kedeiloa sena ze de lei;

¹⁰chiramme ze â heguang hangsename hang du chang lei, penui ruage hangmengeu â kâu di de lei, hangkat â heguang ze la, kêdabe hangkat â wang merei lei, zai pa wang dezai â beting keduîne runne pa â bam gai gu lei.

¹¹Chi mârekaune luakat ring gai lu chaidibe ze (heguang) padesatpeu ze de lei, hangsename ruage bambepeu zeu, zai pa â ’nggagaiderabe ge tat lei.

¹²Zai bekie kereu nang ne ngaube ze â, heguangme hangkereu heguangram tei ra rezie ngau ra kuâ lu, kane penui â mârekaune je ngau lu ’nchetkak kat runne heguang gai ra rezie ngaurame bau ze de lei.

¹³Aime bau â tâtewrabe ge helungsui ka’nsamme zai penui gu tâtewchibe rezie benai rezieteibe leine ze mârekaune dage pei gai ze bamme bau de lei;

¹⁴penui ne Melipoine peireige herei’nggi bei ze Melipoine ne penui je duî’nderame bau lei, pa â besuitewme ramme wangpeu zai heguangme ramme gu Heguang, zai pa ne kûgaibeime zai kelângpatkailume zai keneime je ngua lu penui je duîlerapeu daseu,” ze kacheu de lei.

¹⁵Dadege pa ne achu, “Hedui ramme pe pum zuateupui ka’ntaube bâm ge nang ne ngaube ze â ziemmena zat ramme, zai baudime ramme, zai heramzat ramme, zai hekuâ-helad gechâm-châmbe ramme ne same ze de lei.

¹⁶Zai mâkie kereu (heguangme hangkereu) nang ne ngaube benai chi mârekaune zene chi pe pum zuateupui je ngaugailak ku lei; penui ne pechu sâupet kai ze pumlâng bam ra tew gai gu lei; penui ne pechu teu lu ze hemi ne rû ’ndu lei.

¹⁷Chi Hera gu sam ramme ze tewpui kam mak tâne penui suîhezuâ ze mârekaune dage penui gu heguangram pei gai ze, Hera keneibe tâtewpui gai ra pa ne penui lung ge kai bei dadegeu.

¹⁸Zai chi ’mpuimi nang ne ngaube ze â, kedeireime gu heguangme ramme peireige samram ze bambe namdi kedibe ze de lei,” ze kacheu de lei.