Read Zeme Naga KELIÂBE 18 Bible Online

KELIÂBE 18 - Zeme Naga bible

KELIÂBE 18

¹Aipau chângge kêdabe angel’mpeu pe dage reziechibe misongga bam lu tinggîm ’mbene wangkeube I ngau de lei; zai pe dage pengêudibe bambe zene kedeirei je tewreba gai bei de lei.

²Dadege hekuâchibe ne pa ne kû gai ze, “Kâu de lei, Babilon kedibe ze â kâu de lei! Chize herasiabe ramme hang, herui kahebâbe wanggaika’nsuibe bâm hang ’nruine kahebâbe benai katenetbe wanggaika’nsuibe bâm hangge chang gai di de lei;

³heramzat ramme leine ne pa hangleutewbe kesiabe gu wain zene sakmeneu kam di, zai kedeirei ge heguangme ramme ne pe dage hangleutewbe gu tâ-kesiabe tew gai ze bam di, zai kedeirei ge helîkahedetme ramme ze pa lungkakeleube gene lungyichu kam di de lei,” ze kacheu de lei.

⁴Chipau chângge kêdabe hekuâ tinggîm ’mbene I seu de lei, “Pe dagene zuapat te lau, a gume gau, makchai â, ningnui pe gu hemui ge gut kai gu de lei, makchai â, pechu tewkahereube ge ningnui gut kai gu de lei;

⁵pe gu hemui zat ramme â, tinggîm riâ kuachu-chang gai ze, zai Hera ne pe gu hemui-helut ramme ze chî bam di daseu.

⁶Zai pa sing ne tew gai gum ze pe peireige tew gai be lau, zai pe tatew ramme hangge pechu dêt na pei dai be lau; pa ne hepiak ge sakrabe hang kebutkai’ndibe riâ gene dêt na pe hangge kebut kai be lau.

⁷Pa ne pe runne pechu suang gai ze tewnei-neibe tewrua bambe luigum ze, chipau riâ ge pechu tewsabe benai kadesuibe pei gai be lau. Pa ne pe lung ge acheu ze ’nning ze, ‘Heguangpui gum ze I ’ntau bam lei, I ze kemîpui mak lei, mâtew-tewsede kadesuibe a hangge dau ra mak lei,’ ze kacheu dadegeu,

⁸mai kat ne pe hangge gesâbe, herarît zai kadesuibe zai herakûm wang gu lei, zai pechu hemi ne rû ’ndu lei; pechu samrampeu Tingwang Hera â, tâtewchibe daseu,” ze kacheu de lei.

⁹Zai kedeirei heguangme ramme, chipaupui dage hangleutewbe tâ kesiabe tewgai’ndime benai pe dage nguakezit ze bamdime ze chipaupui (Babilon) je rube mika penui ngau dezai pe peireige penui hap ze desui gu lei;

¹⁰penui ne sap’ndeutau lu, pechu tewsabe je hingbe gene, “’Nzehêu! ’nzehêu! nang namdi kedibe, nang namdi tâtewchibe peranchibe, Babilon! ’nchetkak kat lung gene ning hangge samrambe wangchang gai di de lei,” ze penui acheu gu de lei.

¹¹Dadege kedeirei ge helîkahedetme ramme pechu heu ze hap ze bam de lei, dui’nnei ge penui gu kerua ramme,

¹²gechâk, gepût, tingchugeu, pemîhungbe ramme, teluichu ramme, linenpaî yibe ramme, paî gie’nzaibe ramme, silk-lang, giepâdabe, heching perîmyibe zat leine, hepuagim ne tewbe kerua zat leine, heching pemîhungbe ne tewbe kerua zat leine, hetageî, hegeî benai tingchu pemîhungbe,

¹³’nteuma, mâ-perîmyibe moîne ramme, keruta, ka’nnukbe taudui, mâ-perîmyibe hingbangta, wain, taudui, dekuîyibe benai dekuîmeu, kaurui benai meli, hekun ramme benai hekuntimriang, zai kebangme ramme, airamme ze mige ne lu dai ra gadibe ziegeneu.

¹⁴“Nang keringbe zene ngau ra heguî-desang ze bambe mâ-mâ ramme ze ning dagene tat kam de lei, zai ning gu mi ngauka’nchâbe zat ramme benai mâ-mâ-ngauringbe ze ning hangge â ga gai de lei, mâtew-tewsede ngau dai ra ga de lei,” kacheu de lei.

¹⁵Ai kerua zat ramme gene helîkahedetme ramme pe dagene penui heurâ hang giepatlume zene pechu tewsabeime je kehingbe gene sap’ndeutau lu ze penui rankai hap ze desui ze,

¹⁶“’Nzehêu, ’nzehêu, chi namdi kedibe linenpaî gie’nzaibe benai pâdabe ne bâ ze bambe, gechâk benai teluichu ramme ne, zai tingchu pemîhungbe ramme ne keru ze bambe nung zeu!

¹⁷’Nchetkak kat lunggene aipau heurâ ramme ze sia kam gai di de lei,” ze kacheu de lei. Dadege dui’nnei ge besuitewme ramme, zai chige tatme ramme, zai kakereime zai sungkling ge penui gu kerua ramme teime bau ze deutau ’mbene sap lu ze,

¹⁸pechu (chipaupui je) rube mika penui ngaube luage “Chi namdi kedibe gumbe kau namdi la semei?” ze acheu ze ka’nrung de lei.

¹⁹Dadege penui peî ge kedeimoîne ’nruk ze penui hap ze kadesuibe luage, “’Nzehêu, ’nzehêu, chi namdi kedibe chige sungkling ge dui’nnei penui gu bamme ramme pe dagene lungyichu- kam’ndibe nung ze mi duângga lei! ’Nchetkak kat lunggene pechu â tew’nsia kam gai bei ze la de lei.

²⁰Pe peireige hesuiyi’nta zu lau, Hei tinggîmme gau, Hei keneime ka’nchime, zai apostolme zai kemeume gau, chipaupui peireige ningnui ne ningnui kûmruibe hangge Hera ne pe peireige samram gai bei daseu,” ze penui acheu ze ka’nrung de lei.

²¹Chipau chângge peranchibe angel’mpeu ne chêuniakbe chukâng gumbe tingchukâng kat pua lu sungkling ge sîm gai ze acheu sa ze, “Aigum ze Babilon namdi kedibe je sîm gai bu lei, zai peudau dai ra mak lei;

²²zai ’nrabung kebetchime gu ’nrabung kuâ benai heleutewchime ne heleutewbe kuâ, metiam benai hegeîluîkie ’mmutchime ne ka’mmutbe kuâ, airamme ze ningnui dage seu ta du de lei; zai mâ-chiamchipeu ne mâ-mâ-chiambe ze ning dage bam ta du de lei; zai chêuniakbe chukâng kuâ ning dage seu ta du de lei;

²³zai hemibung ’mbi ze ning dage lerba ta du de lei; zai henâukupeu benai meipui kuâ ning dage seu ta du de lei; ning dage helîkahedetme bamme ramme ze kedeirei ge pengêudime bau de lei, zai heramzatme leine je nang ne kahekabe tewbeibe zene duai’nsia kam ’ndi de lei.

²⁴Zai pe dage kemeume benai keneime ka’nchime jai, zai kedeirei ge tewchatkai’ndime jai ze ngaudau de lei,” ze kacheu de lei.