Read Zeme Naga KELIÂBE 19 Bible Online

KELIÂBE 19 - Zeme Naga bible

KELIÂBE 19

¹Aipau châng dege tinggîm ’mbene baudime kuâ gumbe I seu de lei, acheu ’nrung ze, “Hallelujah! Tewka’nringbe zai pengêudibe, zai tâtewchibe gu rezie ze anui Rapeu gu lei,

²pe gu samrambe â gesang zai peling lei; pe gu hangleutewbe tâ zene kedeirei tewhebâgaibeibe chi hepumzuateube tâtewpui, pe ji di ze bambepui peireige pa ne samram gai bei, zai chi ’mpuimi ne pe guâ ka’ngguame jai tewpatkaibeibe pa ne hekûmtew gai bei daseu,” ze kacheu de lei.

³Luakat penui ne ’nrung gai dai ze, “Hallelujah! Hemika pe dagene betingbeta hang chu ze la lei,” ze kacheu de lei.

⁴Dadege gechîngme ’ngkai ze medai benai mâ-keringbe zat medai zene kâukeu ze Heguang-bamrak ge ka’ntaupeu Hera je kakellum de lei, “Amen. Hallelujah!” acheu sa zeu.

⁵Zai Heguang-bamrak gene hekuâ pat ze, “Anui Rapeu je toa zu lau, ningnui pechu hingchi ze bamme, zai kecheime benai kedime leine gau,” acheu ka’nrung de lei.

⁶Chidadege baudime kuâ kechibe gumbe, hedui misongga bambe kuâ gum zai tingcheikelung bambe kuâ gum ze ’nrung ze, “Hallelujah! Tingwang anui Rapeu, Getaleitewchipeu ne heguang ze samram la daseu.

⁷Anui ne pechu anui suiyigaihâ ze suang’ndi gai ze pengêudibe pei gai ze bam kei lei, Melipoine je hegiarabe ze â wangchang de lei, pe nâu changrapui ze pe runne kedâ kam lu kuâ la daseu;

⁸pechu (chipaupui je) â linenpaî yibe, karbabe benai ka’nchibe ne bâ gai ra pei gai ’nde lei,” ze kacheube I seu de lei— chi linenpaî yibe ze â keneime ka’nchibe gu tatew kapelingbe hang chang daseu.

⁹Dadege angel’mpeu ne achu, “Aize raw gai lau: Melipoine je kahegiabe gu luube-bâm ge wang ra ’nnâgaibeime yi gu lei,” ze kacheu de lei. Zai pa ne achu, “Airamme ze Hera gu sam pelingsingbe de lei,” ze kacheu de lei.

¹⁰Dadege â I pechu kellum ra pe pîkang ge kâukeu gai de lei, kane pa ne achu, “Nang mâtew-tewsede chigum tew ra mak lei! Nang benai ning puiname, Krista ne sakkitewbe sam ze tei ze tâtewme ruage I du (ningnui gum ze) tâtewpeu de lei, Hera je kellum lau,” ze kacheu de lei. Isua je sakkitewgaibe sam ze â, kemeu sam keringbe de lei, (zai Isua ne sakkitewbe sam ze â kemeume sam hangge keringbe lei).

¹¹Chipau chângge tinggîm lat kai ze bambe I ngau de lei, dadege pie le lau, hekun kehâbe! Chige chuabepeu je â, Kapelingbe benai Kagesangbe acheu ze ku lei, zai ka’nzeibe gene pa ne samram ze herei’mpung ze bam lei.

¹²Pe mik kena â hemimelei gum lei, zai pe peî ge kraun misongga pung lei; zai pa ne makchai â, mî de chimakbe chi heji ’nritkai’ndibe ze pe dage bam lei.

¹³Pechu â hejai ge sûmgailube paî ne bâ gai bei de lei, zai pechu kûbe ji ze â Chi Hera gu Sam ze kacheube lei.

¹⁴Dadege tinggîm gu hereikangme (angelme) ramme ne linenpaî yibe, penui puâ kehâbe benai ka’nchibe ramme kai lu hekun kehâbe ramme chingchua lu pe chai sui de lei.

¹⁵Heramzatme ramme je bichatrabe hiazutkie pemuiliabe ze pe mui gene pat ze bam lei, zai pa ne penui je hegeîtui ne samram gu lei; pa ne Hera Tâtewchipeu lumpum gene wain niakbe kuiki ze kedîmrua gu lei.

¹⁶Pe puâ benai pe nie ge pungbe pe ji ze heguangme gu Heguang zai hera ramme gu Tingwang acheu ze ’nrit kai lei.

¹⁷Chipau chângge angel’mpeu hangkat ne tingnaimik ge sap lu tinggîm ge ’nruine liamruabe ramme zat leine je pe rankai kû ze, “Wang lau, Hera gu luube-teseu kedibe ge wang kam gai lau,

¹⁸Heguangme pumji, sipai kedime pumji, pe peranchime pumji, hekun ramme benai hekunchingchuame pumji, zai ziemmena leine kebang-makme benai kebangme, zai kecheime benai kedime pumji tew ra hangge zeu,” ze acheu ze bambe I ngau de lei.

¹⁹Dadege mârekaune benai kedeirei gu heguangme ne chi hekunching ge ’ntau ze bambepeu benai pe gu hereikangme je herei’nggi ra penui gu hereikangme je ngua lu wang’ndui-gaibambe I ngau de lei.

²⁰Zai chi mârekaune ze â, chi kemeu karasa kau mârekaune masua sing gene pa ne tâningdaulakbe ramme tew ze bambe zene chi mârekaune gu mâ-’nchetkaibe pungme leine je benai mârekaune luîtak hang tewlube je kellum ze bamme leine je choarua ze bambepeu dage nîm’mpam gai ’ndi de lei. Aime hangna je â Salphar ne tau ze bambe hemizai ge tuâ gai ’ndi de lei.

²¹Kêdame leine je â hekunching ge ’ntau ze bambepeu gu hiazutkie, chi pe muiki gene patbe hiazutkie zene bichat kam ’ndi de lei; zai ’nruine zat leine ne penui pumji zene teukelalui lu bam di de lei.