Read Zeme Naga KELIÂBE 2 Bible Online

KELIÂBE 2 - Zeme Naga bible

KELIÂBE 2

¹“Ephesi ge herakiangna gu angel’mpeu hang raw gai lau: ‘Pa hezat’mbia ba ge hegi sena teipeu chi hemibung-kaira sena ruage tatruapeu gu sam ramme.

²“ ‘I ne ning tatew ramme, nang hereu ze tâtewbe benai nang hereuliechibe, zai nang ne ziemmena kesiame je â gesutchi lak kane apostolme makme, karasa-same ne penui runne penui â apostolme lei, kacheume je kedakchi ze bambe tak I ne chî lei;

³nang ne liechi ze a ji hanggene kahereube liebambe, zai nang ne leikeu mak ze bambe I chî lei.

⁴Kane keraîbe ting ge ning dage hungchibe bambe tak ze nang ne sâugai’ndibe geze I ne ningchu kesiatew de lei.

⁵Chidaze nang ’ndaikau gene kâu di mei be chibam lau, helung-heli ze keraîbe ge nang tewbe tâ ramme ze tew lau. Makchai â I ne ning dage wang ze ning gu hemibung-kaira ze pebâm gene I lutua ’ndu lei, nang ne ning lung heli makchai ai.

⁶Acheusede aize ning dage bam de lei, Nikola-chaisuime bau tatew ramme, chi I ne du ngaugailakbe nang ne ngaugailak ze bambe zeu.

⁷Peize pe kun kebambe kau â, Herui ne herakiangna ramme dage mâ-kerangbe sam ze seu le lau. Duîbepeu je keringbe chingbang rachî raiteu ra pei gu lei, Hera gu paradais ge bambe zeu,’ ze acheu zeu.

⁸“Zai Smarna ge herakiangna gu angel’mpeu hang raw gai lau: ‘Railangbe benai nâlangpeu chai di ze ringchudipeu gu sam ramme.

⁹“ ‘Nang ne hereu ning duângga ze bambe benai nang ne kelaksia (kane nang â lungyi) ze bambe zai Judame-makme ne penui Judame lei, ze kacheume, kane penui â Satan gu ka’nduibeki changme ne ningchu saka’nsiabe tak ze I chî lei.

¹⁰Ning hangge hereulie ra bambe ze hing se lau. Pie le lau diabolbe ne ningnui hanggesame je kebangki ge tuâ gai zi gu de lei, ningnui je kedak le ra hangge zeu, zai hezie kereu ningnui hereu ze ningnui duângga bam gu lei. Kechaibe riâ chang ze lungsangtew ze bam lau, dezai I ne ningchu keringbe kraun pei gu lei.

¹¹Peize pe kun kebambe kau â, herui ne herakiangna ramme dage mâ-kerangbe sam ze seu le lau. Duîbepeu je kechaibe pakenabe zene tew’nteu gai be ra mak lei,’ ze acheu zeu.

¹²“Zai Pergamam herakiangna gu angel’mpeu hang raw gai lau: ‘Mui na lam liabe hiazutkie pe dage bambepeu gu sam ramme.

¹³“ ‘Satan bambe bâm, chige nang bambe ze I ne chî lei; chi achu lungsangtewpeu, a gu sakkitewpeu Antipasbe, Satan bambe bâm, ningnui ruagene tewchatkaibeipeu ringbe ting ge ningnui ne a ji tei’ntip ze achu keneibe ’ngkim mak ze bambe I ne chî lei.

¹⁴Kane I ne ningchu kesiatewbe kecheîne la lei: Balaambe ne Israelme je peize heraluîtewbe ramme hangge hetak herâtew ze peipatkaibe teu ze hangleutewbe gu tâ-kesiabe tew ra hanggene Israel name suage tewkaurabe kenambe kai ra Balakbe je geteigaipeu (Balaambe) gu geteiliabesie teime ningnui ruage bam lei.

¹⁵Chigum ze ningnui dage hanggesame Nikola-chaisuime bau gu geteiliabe teime du bam lei.

¹⁶Chidaze helung-heli zu lau. Makchai â, I ne ning dage kelua ze wang ze a muiki gene patbe hiazutkie zene penui je herei gu de lei.

¹⁷Peize pe kun kebambe kau â Herui ne herakiangna ramme dage mâ-kerangbe sam ze seu le lau. Duîbepeu je chi hekâmgai’ndibe manna gêsa I ne pei gu lei, zai tingchu kat kehâbe, tingchu ge heji kat rawgaibe, chize lupeu runne chî zangno, mî de chimakbe ze I ne pechu pei gu lei,’ ze acheu zeu.

¹⁸“Zai Thiatira ge herakiangna gu angel’mpeu hang raw gai lau: ‘Hera Na, pe dage pe mik kena hemimelei gum bambepeu, zai pe pî kena ge hetageî chuipelinglube gum bambepeu gu sam ramme.

¹⁹“ ‘I ne ning tatew tak ramme, ning dage kehungbe, keneibe zai tâ’ngguachibe zai hereuliechibe tak bambe ramme chî lei, chi keraîbe tatew suadu kenâbe tatew gu ze yi’ngkeudibe zeu.

²⁰Kane aize I ne ningchu kesiatew lei, chi Jezebelle pe runne pechu kemeu’mpui hang suang gai ze, zai a guâ ka’ngguame ramme je peize hangleutew ze heraluîtewbe ramme hang hetak herâtewbe ge peipatkaibe ze teu ra nguagetei ze duai ze bambepui je nang ne gesut ze bambe ziegeneu.

²¹Pa pe lung helirabe hangge I beting pei gai de lei, kane pa hangleutewbe gene pe lung heligailak lei.

²²Pie le lau, I ne pechu ka’nrâbe jeî ge tuâ gai gu lei, zai pe dage kahemabe tâ nguatewme je I ne kahereube kedibe tua gai gu lei, chipaupui tatew ramme gene penui ’mbia lei makchai aî;

²³zai I ne pe name ramme je lakchat kai gu lei. Zai chidezai I ze helung ka’nningbe tak peubepeu lei be herakiangna ramme leine ne chî kam gu lei, zai I ne ningnui tâtewgaibe luigum ze ningnui hangkat-kat je pei kam gu lei.

²⁴Kane Thiatira ge ningnui kêdame bau leine, chi mâ-geteiliabe sam teimakme, hanggesame ne Satan gu mâ-kechukbe zat ramme acheu ze kube, chize chimakme, ningnui je I rang de lei, ningnui peireige kêdabe heputkeritbe ramme â I tua gai me lei;

²⁵I wangkeu mak tâne ningnui dage bambe runne ze tei’ntiprip ze tei bam lau.

²⁶Betun chang mak tâne duîtat ze I tewbe tâ ramme tewtat bambe kau je heramzatme peireige samrambe rezie I ne pei gai gu lei,

²⁷dezai hegamli ramme lakdesuiruigaibe gum ze pa ne penui peireige hegeîtui ne chigum ze samram gu lei, I du a peu dagene samrambe rezie ngaulube gum zeu;

²⁸zai I ne pechu hekuâgi pei gu lei.

²⁹Peize pe kun kebambe kau â Herui ne herakiangname dage mâ-kerangbe sam ze seu le lau,’ ze acheu zeu.