Read Zeme Naga KELIÂBE 20 Bible Online

KELIÂBE 20 - Zeme Naga bible

KELIÂBE 20

¹Chipau chângge angel’mpeu pe ba ge besînggabe kuiki gu chabi benai hegeî’ngkapria kedibe tei lu tinggîm ’mbene wangkeube I ngau de lei.

²Dadege pa ne henêu gechîngbe dragon, chi Diabolbe mei nune Satan mei je nîm lu ze kum chang kat hangge pi gai lu ze,

³pechu besînggabe kuiki ge tuâ gai lu ze patingkum chang kat kam gai mak tânege â heramzatme je pa ne duai ta ra hang pechu bangnam gai lu mâ-ka’nchetbe ne taunam gai ’ndi de lei. Chipau chângge â beting keduîne hangge pechu ’mpat kai be ra hangge zeu.

⁴Chipau chângge Heguang-bamrak ramme ge ka’ntaume I ne ngaume ramme ze â, samrambe rezie peigaibeime bau de lei. Zai Krista je sakkitewbeibe ziegene benai Hera gu sam ziegene, zai mârekaune benai chi mârekaune luîtak hang tewlube je kellum mak, zai chi mârekaune gu mâ-’nchetkaibe penui telie ge benai penui ba ge pungmakbeibe ziegene penui peî dâng’ndime gu keringbe ramme je I ngau de lei. Chime bau â ringchu dai lu ze kum chang kat hangge Krista benai ngua-heguang ze bam di de lei.

⁵Chaidime kêdame ’nteumena â kum chang kat kam gai mak tâne â, ringchu dai mak lei. Aize kechaibe benai ringchukadaibe raîlangbe de lei.

⁶Kechaibe gene ringchukadaibe raîlangbe ge bam ra ngaulume ze yi-desang ra de lei! Aigum ringchukadaibe peireige â kechaibe pakenabe â pe gu rezie ga de lei, penui â Hera benai Krista gu tingkume chang ze, pe dage kum chang kat ngua-heguang ze bam ra runne de lei.

⁷Zai kum chang kat kam gai dezai â, Satan je pechu bangbe kebangki gene lupat kai bei ze

⁸hereirabe hangge kedeirei mik medai chige Gogbe benai Magogbe kacheube heramzatme je choarua ra zuapat ku lei; penui riak ze sungkling ge hegitmoîne bambe kie riâ lei.

⁹Zai penui ne kedeirei luî chumhang ze keneime ka’nchime gu sieki benai (Hera gu) kehungbe namdi ze tuaguâ de lei; kane tinggîm ’mbene hemi wangkeu ze penui je rûmut ’ndi de lei,

¹⁰dadege penui je choaruapeu diabolbe je â hemizai benai Salphar, chi mârekaune benai kemeu karasabe kau bambe bâm ge tuâ gai bei de lei, zai penui je â kemuî-keba betingbeta tewsâ ze tewhereu ze bam gu lei.

¹¹Chipau chângge di-kadesangbe Heguang-bamrak kehâbe benai chige ka’ntaupeu je I ngau de lei, pa bambe gene kedei benai tinggîm piehang-ngaube ze tat ti de lei, dadege chibe kena ze bamgairabe bâm hang ngau ta di de lei.

¹²Zai chaidime, kedime, kecheime, heguang-bamrak suage sapgit bambe I ngau de lei, dadege leisikuak ramme ze kuakpat kai de lei. Kêdabe leisikuak chi keringbe leisikuak ze du kuakpat kai de lei. Dadege penui tâtewgai’ndibe luigum ze keringbe leisikuak gene rawgai’ndibe gene kechaime ramme je samram gai bei de lei.

¹³Zai sungkling zene kechaime chige bamme je peipat kai bei de lei, Kechaibe benai Kechaiberam zene chige bamme chaidime je peipat kai bei de lei, zai ’nteumena je penui tatew luigum samram gai bei de lei.

¹⁴Chipau chângge â Kechaibe benai Kechaiberam je â hemizai ge tuâ gai ’ndi de lei. Aize kechaibe pakenabe, hemizai de lei;

¹⁵zai mi-mige peji, keringbe leisikuak ge rawgaibe ngau mak tizai â, pechu â chi hemizai ge tuâ gai nan tai de lei.