Read Zeme Naga KELIÂBE 21 Bible Online

KELIÂBE 21 - Zeme Naga bible

KELIÂBE 21

¹Chipau chângge tinggîm karchibe benai kedei karchibe I ngau de lei; chi tinggîm karchibe benai chi kedei karchibe ze â tat ti zai sungkling ze â ga gai di dadegeu.

²Meirapui ne pe napeu hanggene pe puâni kai lu kedâkua gum ze, Hera dagene tinggîm ’mbene Jerusalem karchibe chi namdi ze wangkeube I ngau de lei;

³dadege heguang-bamrak gene hekuâchibe ne sa ze, “Pie le lau, chi Hera bambe bâm â ziemmename dage la de lei. Pa ne penui dage bam bam gu, zai penui ze pe gume chang ze bam gu lei, zai Hera sing ne penui je nguabam bam gu lei;

⁴pa ne hemikdui leine ze penui mik gene nuitua gai gu lei, dezai kechaibe ze bam ta du de lei, kadesuibe du zai kehapbe du zai keteubeted du bam ta du de lei, tingtie gu mâ-mâ ramme â tat kam di daseu,” kacheube I seu de lei.

⁵Dadege heguang-bamrak ge ka’ntaupeu ne sa ze, “Pie le lau, I mâgetaleine tewrechi ze la lei,” ze kacheu de lei. Pa ne sa dai ze, “Aize raw gai lau, aipau sam ramme â ’nnumtewduibe ramme benai peling daseu,” ze kacheu de lei.

⁶Dadege pa ne achu, “Tewkam de lei! I ze Alpha benai Omega, bepîbang benai betun lei. Kahereibe kau je I ne keringbe hedui depin gene hedui ze ’ntane pei gu lei.

⁷Duîtat ze bambe kau ne aipau heu ze nguaheu ra ngau gu lei, dezai I ne pe Rapeu chang ze bam gu zai pa ze a na chang ze bam gu lei.

⁸Kane chi kahengîme, ’nnum’mmimakme, tewhebâgai’ndime, kegîme, hangleutewme, kahekame, heraluîtewbe je kakellumme, zai karasa-sachime penui dam hang â, hemi benai Salphar ne taube, chi hemizai runne de lei, chi kechaibe pakenabe zeu,” ze kacheu de lei.

⁹Chipau chângge angelme hangsename ruage hangkat chi herarît nâlangbe sena zene puigit bambe hepiak sena pe dage bambepeu ne achu ’mpau ze, “Wang lau, Meibepui, chi Melipoine nâu ze I ne ningchu ngualia gu lei,” ze kacheu de lei.

¹⁰Dadege â pa ne achu Herui gene kedeiloa kedibe, kehu ’mbe nguatat kai lu ze, Hera dagene tinggîm ’mbene namdi ka’nchibe Jerusalem wangkeube ze achu ngualia de lei.

¹¹Hera ngeudibe ne (chi namdi ka’nchibe ze) teluichu ngauhungbe zat gum, zai jaspar tingchu gum, zai kristal tingchu gum pling bambe zeu.

¹²Chi namdi ge namdi kerietaube kedibe, kehube gu kemui kereu ze kena bambe ge angelme hangkereu-ze-kename bam lei, zai chi keriekemui ramme ge Israelbe name bau hangkereu-ze-kename ji ’nrit kai kam gai lei;

¹³tingbia ’mbia ge kemui kechum bam, tingpeî ’mbia ge kemui kechum bam, tingpî ’mbia ge kemui kechum bam, zai tingrun ’mbia ge kemui kechum bambe zeu.

¹⁴Zai chi namdi kerietau ge pedimchukâng kedibe kereu ze kena kai lei, zai chiramme peireige Melipoine gu apostolme hangkereu-ze-kename ji ramme bam lei.

¹⁵Zai achu ka’mpaupeu dage namdi benai keriekemui ramme, zai kerietau ramme ’ndeurua ra mâ-ka’ndeube gechâktui bam de lei.

¹⁶Zai chi namdi ze mik medai bam lei, chige betâ ze pedit benai ’nsam kam lei; dadege pa ne namdi ze pe tui ne ’ndeu gai ze stadia chang kereu ze kena (kilometar chang na ze haî medai) riâ pat lei; betâ zai pedit zai pehut ze ’nsam kam lei.

¹⁷Pa ne namdi kerietau ze du ’ndeu gai de lei, chige ’mpeumi sâu angel’mpeu sâu ne ’ndeu gai dege sâu haî kat ze hedai ze medai lei.

¹⁸Kerietau ze â jaspar tingchu ne tew de lei, kane namdi â gechâk ka’nchibe ne tew lei, judageî gum ngau’nchichiakbe zeneu.

¹⁹Namdi gu kerietau kedibe gu pedimchukâng ramme ze â teluichu ne bepuâ hang tew gai lei; raîlangbe chukâng ze â jaspar tingchu lei, pakenabe ze â sapphir tingchu lei, pakechumbe ze â agat tingchu lei, pamedaibe ze â emerald tingchu lei,

²⁰pamengeube ge oniks tingchu lei, paserukbe ze â karnelian tingchu lei, pasenabe ze â kruselait tingchu lei, padesatbe ze â beril tingchu lei, pasekuibe ze â topaz tingchu lei, pakereube ze â krisopras tingchu lei, pakereu ze katbe ze â jasinth tingchu lei, pakereu-ze-kenabe ze â amethist tingchu lei.

²¹Zai kerietau kereu ze kena ze â teluichu ramme kam lei, ’ngkam ’nsangne teluichu kat kat ne tew lei, zai namdi gu keloaning ze gechâk ka’nchibe ne tew lei, judageî gum ngau’nchichiakbe zeneu.

²²Dadege namdi lungge kellumki â I ne ngau mak lei, chi namdi gu kellumki ze â Tingwang Hera, chi Tâtewchipeu zai Melipoine zene hemibung chang di dadegeu.

²³Zai chipau namdi ge â chige lerba ra hang tingnaimik mei, nune hekêu mei be mâ de ’nnang ta di de lei, Hera ngeudibe zene namdi gu kebabe hang chang zai Melipoine zene hemibung chang di dadegeu.

²⁴Chi kebabe ’mbi gene heramzatme ramme tatrua ra de lei; zai kedeirei gu heguangme ramme zene penui ngeudibe ramme chige teiwang gai gu lei,

²⁵zai chi namdi gu kemuiki ramme ze mâdau de ’nrîmbeting ge kainam ze bam ra mak lei—zai chige kebabe (kêdabe) bam ta du de lei;

²⁶heramzatme ramme gu pengêudibe zat leine benai heramzatme ramme ne suang ze bambe zat ramme ze chige penui ne teiwang kam gai gu lei.

²⁷Kane ’nchimakbe â chige mâ de teigut ra mak lei, zai mi-mige mi katenetbe tâ tewbe kau, zai karasasabe kau â, chige mî de gut ra mak lei, kane Melipoine keringbe leisikuak ge penui ji rawgai’ndime runne gut ku lei.