Read Zeme Naga KELIÂBE 22 Bible Online

KELIÂBE 22 - Zeme Naga bible

KELIÂBE 22

¹Chipau chângge keringbe dui luabe ’nggeuki, kristal gum karbabe, Hera benai Melipoine gu Heguang-bamrak gene

²namdi gu keloaning sûngngang luapelakeube pa ne achu ngualia de lei; zai ’nggeuki giam lam ge bekêu’nsangne ge pechî zat kereu ze kena ’nchipatbe keringbe chingbang bambe ze du ngualia de lei; zai chipau bang ge peneu ramme zene heramzatme keteu-keneube zat ramme tew’mmi ze bam lei.

³Chige â desetkaibe tâ tewbe ga du de lei, Hera benai Melipoine gu Heguang-bamrak runne chige bam ze pe guâ ka’ngguame ne pechu kellum ze bam bam ra de lei;

⁴penui ne pe ju ngau gu de lei, zai pe ji ze penui telie ge bam kam gu de lei.

⁵Zai muîkeu ta du de lei; penui ne hemibung gu kebabe mei nu tingnaimik gu kebabe mei ze ’nnang ta de lei, Tingwang Hera ne penui gu kebabe chang ze bam bam gu dadegeu, zai penui ne betingbeta heguang ze bam bam ra de lei.

⁶Dadege pa ne achu, “Aipau sam ramme ze â ’nnumtewduibe benai peling lei. Zai Tingwang, kemeume ramme gu herui ramme Rapeu ne mâ-wangchangkelua ra bambe ze teilia ra pe guâ ka’ngguame je lang gai ’nde lei.

⁷Zai pie le lau, I wangkeu kelua gu lei,” ze kacheu de lei. Aipau leisikuak ge pauka’ntuabe sam ramme teichime yi gu lei.

⁸I ze airamme seu ze ngaupeu Johanbe de lei. Zai I ne chiramme seu ze ngau lu dege chiramme achu ngualiapeu angel’mpeu pîkang ge kellum ra I kâukeu gai de lei;

⁹kane pa ne achu, “Nang mâtew-tewsedu chigum tew ra mak lei! Nang benai ning puiname kemeume, zai aipau leisikuak gu sam ramme tei ze bamme ruage I du (ningnui gum ze) tâtewpeu de lei. Hera je kellum lau,” ze kacheu de lei.

¹⁰Zai pa ne achu, “Beting â na di daze, aipau leisikuak ge pauka’ntuabe sam ramme ze ka’nchetbe taunam gai se lau.

¹¹Kesiabe tâ tewbe kau je peize kesiabe tâ tewbe luî ze bam gai rî lau, zai mi katenetbe tâ tewbe kau je peize mi katenetbe tâ tewbe luî ze bam gai rî lau, zai pelingtewbe kau je peize pelingtewbe luî ze bam gai rî lau, zai ka’nchime je peize ka’nchibe luî ze bam gai rî lau.”

¹²“Pie le lau, I wangkeu kelua gu lei, mi-mige ’nteumena ne pa tâtewgaibe luigum ze I ne pei gai dai ra getoabehi tei lu zeu.

¹³I ze Alpha benai Omega, raîlangbe benai nâlangbe, bepîbang benai betun lei,” ze kacheu de lei.

¹⁴Penui paîni geta’nchi ze bamme yi gu lei, keringbe chingbang rachî raiteu ra ngau le ra, zai keriekemui ramme gezene chi namdi ge gut le ra hangge zeu.

¹⁵Hela ge â hetei ramme, zai kahekabe tewme ramme, zai hangleutewme ramme, zai kegîme ramme, zai heraluîtewbe je kakellumme ramme, zai mâ-karasatewbe je ’nchâ ze karasatewme ramme ne bam lei.

¹⁶“I Isua ne a gu angel’mpeu je herakiangname hangge ai sakkitewbe sam pei gai ze ningnui dage lang gai de lei. I â Dabidbe materinghibe gene patbe kau, zai pe haîhik’mpeu, zai hekuâgi karbabe lei,” kacheu de lei.

¹⁷Chi Herui benai Meibepui zene, “Wang lau,” kacheu de lei. Zai seutâulube kau ne peize, “Wang lau,” ze acheu pau lau. Zai kahereibe kau je â peize wang lau, zai keneibe kau ze â peize ’ntane keringbe hedui ze lu le lau.

¹⁸Aipau leisikuak ge paugaika’ntuabe sam mige keseume leine je I ne ’ntîng ra rang gai de lei: mi-mige chipau sam ramme ge kaisuabe kau dage â aipau leisikuak ge ranggaibe herarît zat ramme ze Hera ne pe dage kaisuâ gai gu lei,

¹⁹zai ai pauka’ntuabe sam rawgaibe leisikuak gu sam ramme, chi rawgai’ndibe sam ramme mige lutuabe kau je â keringbe chingbang ge benai namdi ka’nchibe ge pe gu hedam ngau ra bambe ze Hera ne teitat ’ndu lei.

²⁰Airamme je sakkitew ze bambepeu ne, “I wangkeu kelua sing gu de lei,” ze kacheu de lei. Amen. Wangkeu lau, Heguang Isua!

²¹Heguang Isua ka’nggiabe ze keneime ka’nchime leine dage bam lau. Amen.