Read Zeme Naga KELIÂBE 3 Bible Online

KELIÂBE 3 - Zeme Naga bible

KELIÂBE 3

¹“Zai Sardis herakiangna gu angel’mpeu hang sam raw gai be lau: ‘Pe dage Hera gu herui sena benai hegi sena bampeu gu sam ramme. “ ‘I ne ning tatew ramme chî lei; nang ring’ndiaktau la lei be rasam â chî kam lei, kane nang â chai di de lei.

²’Nrakchu lau, zai ’nsakkuâbe chai-gaitena bambe ze perantew’nchi gai zu lau, a Rapeu mikngau ge ning tatew zat ramme mâ de yika’nsangbe hangge I ne ngau gai mak lei.

³Chidaze nang ne ngaulube benai seulube ze chîbam lau; chize tei’mmi lau, zai helung-heli lau. Nang ne ’nrakchu ra mak lei dizai â, mâ-kahegapeu gum ze I ning dage wang gu lei, zai ’ndaibe hî ge ning dage I ne wang gu mei be nang chî ra mak lei.

⁴Acheuleusedu ziemmena (heji ramme) gechâmnege ning dage Sardis ge larei lei, ziemmena penui paîni tewhebâgaimakme bau zeu; zai penui â kebuibe kau ramme changbe ziegene penui â penui paîni kehâbe kai lu I benai tatrua ze bam gu lei.

⁵Duîtat ze bambepeu je â aigumbe paîni kehâbe ne kai gai be ra de lei, dezai keringbe leisikuak gene I ne pe ji chui’ngga ra mak lei; I ne pe ji ze a peu benai pe gu angelme suage pauliâ kam gai gu lei.

⁶Peize pe kun kebambe kau â, Herui ne herakiangna ramme dage mâ-kerangbe sam ze seu le lau,’ ze acheu zeu.

⁷“Zai Philadelphia ge herakiangna gu angel’mpeu hang raw gai lau: ‘Ka’nchipeu, kagesangpeu, pa ne latkaibe mî de kainam mak, zai pa ne kainambe mî de latmakbe Dabidbe gu chabi teipeu gu sam ramme.

⁸“ ‘I ne ning tatew ramme chî lei. Pie le lau, ’ngkam latbambe I ne ning suage kai ’nde lei, mi ne de kainamchilakbe zeu; ning dage tâtewchibe rezie kecheîne runne bam lei, zai acheusede nang ne a sam tei lu ze a ji ’ngkim gai mak ze bambeibe I chî lei.

⁹Pie le lau, Satanbe gu ka’nduibeki gu ziemmena penui Judame ne mak sedu karasa ne penui ze Judame lei ze kacheume, penui ne wang ze ning pîkangge keikeu ra, zai I ne ningchu hung lei be chî ra, pie le lau, I ne tew gai gai gu lei.

¹⁰Liechirabe sam I peigaibe ze nang ne tei’mmibeibe ziegene kedeirei ge kelungme je kedak ra hang kedeirei luî pelane ge kakedakbe wangbe hî ge I ne ningchu â tei’nggim gai gu lei.

¹¹I wangkeu zi gu de lei; ning dage kebambe ze tei’ntip le lau, chidezai mî ne ning gu kraun sut-tat mak ra hangge zeu.

¹²Duîtatbampeu je â a Rapeu gu kellumki ge gechia’ndi hangge I ne pechu tew gai gu lei; pa chigene mâtew-tewsede tat ra mak lei, zai I ne pe peireige a Rapeu ji, zai chi tinggîm ’mbene a Rapeu dagene wangkeube Jerusalem karchibe, a Rapeu gu namdi ji, zai a ji karchibe singbe ze raw gai gu lei.

¹³Peize pe kun kebambe kau â, Herui ne herakiangna ramme je mâ-kerangbe sam ze seu le lau,’ acheu zeu.

¹⁴“Zai Laodikia ge herakiangna gu angel’mpeu hang raw gai lau: ‘Amenbe, chi pelingsingbe benai gesangsingbe sakkitewpeu Hera ’ndam leine gu pîbang changpeu gu sam ramme.

¹⁵“ ‘I ne ning tatew ramme chî lei: nang â hegei de hegei mak, lum de lum mak bam lei. Nang lum zai lum, hegei zai hegei ze bam de ra yi de zeî lau!

¹⁶Chidaze nang ne lumliang-liang ze hegei de hegei mak, lum de lum mak bamdibe ziegene I ne ningchu a mui gene hela ’mbe kepitpat kai gu lei.

¹⁷I â a lungyi, I â lung’ntua, zai I mâ de ’nnang me lei, ze nang ne kacheu daseu; nang ze ning pausia ning duângga ze bambe kau, ngau’nggîakia ze bambe kau, kelaksiabe kau, hemikchitbe kau, zai pumlâng bambe kau lei be nang chî mak zeu.

¹⁸Chipauziegene a dagene gechâk hemi ne rû’nchilube nang lui ra I ne ningchu nguagetei gai lei, chidezai nang lungyi le ra, zai ning paîni kehâbe kai ze nang pumlâng bambe ngaube ze kaichim le ra, zai nang ne mâ-ngauchi le ra ning mik kena ge reheu ’nnuk kai le ra hangge zeu.

¹⁹I ne kehungme je â I ne ’ngngiam ze lak lei; chidaze ’nning’nchuk kai ze helung-heli lau.

²⁰Pie le lau, I sap lu ’ngkam kagekeu lei; mi-mige a kuâ seu lu ’ngkam latkaibe kau je â I ne pe dage gut lu pechu mâ-nguateu gu lei, zai pa du a dage mâ-nguateu gu lei.

²¹Duîtatbampeu â I ne pechu a gu Heguang-bamrak ge ’ntau ra pei gai gu lei, I du a runne duî lu ze a peu dage pe gu Heguang-bamrak ge ’ntau ze bam gum zeu.

²²Peize pe kun kebambe kau â, Herui ne herakiangna ramme dage mâ-kerangbe sam ze seu le lau,’ acheu zeu,” ze kacheu de lei.