Read Zeme Naga KELIÂBE 4 Bible Online

KELIÂBE 4 - Zeme Naga bible

KELIÂBE 4

¹Aipau châng dege I pie gai de lei, dadege ni, tinggîm ge latbambe ’ngkam! Zai hegeîluîkie kuâ gumbe gene achu ka’mpaube I ne seuraibe kuâ ze, “Ailia hang lau, dezai aipau chângge ’ndaikau wangchang ra mei be I ne ningchu ngualia gu lei,” ze kacheu de lei.

²Luakatne Herui ge I bam di laleu de lei, zai ni, tinggîm ge heguang-bamrak kat bambe ge hangkat ne chige ka’ntaube!

³Zai chige ’ntau ze bambepeu ze jaspar benai karnelian (tingchu zat ramme) helî gum ze lia de lei, zai emerald (tingchu) chu luigum ze ’ngkîtplei zene heguang-bamrak tauguâ ze bam lei.

⁴Heguang-bamrak ze kêdabe heguang-bamrak ’ngkai ze medai zene kaiguâ lu zai gechîngme ramme hang’ngkai ze medaime bau ne penui peî ge gechâk kraun kai lu ze paîkehâbe bâ lu chi heguang-bamrak ramme ge ka’ntau de lei.

⁵Heguang-bamrak gene hegiria kakepitbe ramme, zai tingkakelungbe, tingcheibe kuâ ramme pat ze bam de lei, zai heguang-bamrak suage hemitaube keleu sena, chi Hera gu herui zat sena ze bam lei;

⁶Zai chi heguang-bamrak suage kristal tingchu gumbe hedui judageî gum ’nchi-plingbambe sungkling bam lei. Zai chi heguang-bamrak mik medai ’mbia ge mâ-keringbe zat medai penui chai penui suage penui mik ramme ne puigit-bambe:

⁷chi raîlangbe mâ-keringbe ze â, heradi kedibe luigum lei, chi pakenabe mâ-keringbe ze â, getumsei gum lei, chi pakechumbe mâ-keringbe ze â, ziemmena ju gum lei, zai chi pamedaibe ze â, liamtat ze bambe keliengdi gum lei.

⁸Zai chi mâ-keringbe zat medai penui ’nteumena hangkat-kat dage pe kan seruk-ruk pung, zai hemik ramme ne penui pum bampuigit ze bam, zai kemuî-keba mâdau heleutewsau ta di ze bambe, “Ka’nchibe lei, ka’nchibe lei, ka’nchibe lei, Tingwang Hera Tâtewchipeu, bamdipeu, bam-bambepeu, zai bam-bamrapeu zeu!” ze acheu ze leutew lei.

⁹Zai mâ-keringbe zat medai zene heguang-bamrak ge ka’ntaupeu, betingbeta ring ze bambepeu je pengêudibe zai hengêutewbe zai hesuiyibe pei gai ze bambe ge,

¹⁰chi heguang-bamrak ge ka’ntaupeu suage gechîngme hang’ngkai ze medaime bau ne keikeu ze betingbeta ring ze bambepeu je kellum ze bam de lei; penui ne penui gu kraun ramme ze lupat lu ’ngking gai ze,

¹¹“Anui gu Tingwang zai anui Rapeu, nang ne mâgetaleine tewgaibe ziegene, zai ning suî’nning gene chiramme bam, zai ’ndamgaibeibe ziegene pengêudibe, zai hengêutewbe zai tâtewchibe rezie ze ngau ra nang â bui sing lei,” ze acheu ze leutew de lei.