Read Zeme Naga KELIÂBE 5 Bible Online

KELIÂBE 5 - Zeme Naga bible

KELIÂBE 5

¹Zai heguang-bamrak ge ka’ntaupeu hezat’mbia ge leisizui helung benai hela ge rawgai’ndibe ka’nchetbe sena ne taunamgailube bambe I ngau de lei;

²zai angel’mpeu ne hekuâchibe ne sam ’mpau ze, “Aipau leisizui rapat ra chige ka’nchetbe taunamgaibe ramme tewpâng ra châu kebuibe kau la lau?” ze acheu bambe I ngau de lei.

³Zai tinggîm ge du, kedeipeirei ge du zai kedeikang ge du chi leisizui rapat ze pieleduibe kau mî de ga di de lei,

⁴zai chi leisizui ze rapat ze pierabe kau mî je ngaudau mak dege I hap-desang bam di de lei.

⁵Dadege gechîngme ruage hangkat ne achu, “Hap ta lau; Juda kiria gene heradi kedibe, Dabidbe Ma (pema teringhibe) zene duî ’nde lei, chidezai pa ne chi leisizui benai chi ’nchetnamgaibe sena ze rapatchi le ra hangge zeu,” ze kacheu de lei.

⁶Zai heguang-bamrak benai mâ-keringbe medai kakge zai gechîngme ramme ruage Melipoine sapbambe ze I ngau de lei, chi Melipoine ze tewchatkaibeibe luirunbe, bekie sena, zai pe mik sena pungbe zeu, chiramme ze â kedeirei leine ge Hera gu herui sena langpatkai’ndibe ramme de lei;

⁷dadege pa (Melipoine) zene wang lu ze heguang-bamrak ge ka’ntaupeu hezat’mbia ba gene leisizui ze lu lu de lei.

⁸Zai pa ne leisizui tei lu dege mâ-keringbe medai benai gechîngme hang’ngkai ze medaime bau ne, chi keneime ka’nchime ne kakellumbe, mâ-perîmyibe kaipuigitlube gechâkpiak ramme benai ’nrabung kat kat tei’nggam lu ze Melipoine suage kâukeuliâ gai de lei;

⁹dadege penui ne heleu karchibe leutew ze, “Nang zene leisizui lu lu chi taunamgaibe ka’nchetbe ramme ze rapat ra kebuipeu lei, ningchu tewchat kai bei ze ning jai ne pezat gechâm zai hekuâ-helad gechâm leine, zai ziemmena zat leine zai heramzat leine gene ziemmename je Hera hangge ’nri gai bei de lei,

¹⁰zai nang ne penui je heguangram hang benai anui Rapeu hangge tingkume chang ra tew gai bei de lei, zai penui ne kedeirei ge samram gu de lei,” acheu ze leutew de lei.

¹¹Chipau chângge I pie gai de lei, dadege heguang-bamrak zai mâ-keringbe ramme, zai gechîngme ramme taigene angelme misonggame penui chang kereu tûm chang kereu zai changsenâng tûm changsenângme kuâ I seu de lei;

¹²hekuâ kechibe ne acheu sa ze, “Gîchatkaibeibe Melipoine zene reziechibe zai keheube zai kaningchingbe zai tâtewchibe zai hengêutewbe zai pengêudibe zai ’nnamgaibe ramme ze ngau ra bui lei!” ze kacheu de lei.

¹³Zai tinggîm ge benai kedeirei ge zai kedei ge benai sungkling ge ’ndamgaibe zat pelung ge bambe leine ne, “Heguang-bamrak ge ka’ntaupeu benai Melipoine dage ’nnamgaibe zai hengêutewbe zai pengêudibe zai tâtewchibe peranchibe ze betingbeta peize bam bam lau!” ze acheu sabe kuâ I seu de lei.

¹⁴Dadege mâ-keringbe zat medai zene, “Amenbe!” ze acheu bei dege, gechîngme ramme zene kâukeu ze kakellum de lei.