Read Zeme Naga KELIÂBE 6 Bible Online

KELIÂBE 6 - Zeme Naga bible

KELIÂBE 6

¹Chunage chi Melipoine zene ka’nchetbe taunamgaibe sena ruage kat rapat kai bei de lei, dadege mâ-keringbe zat medai ruage kat zene tingcheibe kuâ gumbe gene sa ze, “Wang lau!” kacheube kuâ I seu de lei.

²Dadege pie le lau, hekun kehâbe benai chige gechuabepeu dage hetubaimpi bambe I ngau de lei; zai pechu kraun ze pei gai bei de lei, dadege â pa ze herei duî ra kedâsûn lu tat ti de lei.

³Ka’nchetbe taunamgaibe chi pasenabe ze pa (Melipoine) ne rapat kai dadege mâ-keringbe zat pakenabe zene sa ze, “Wang lau!” kacheube I seu de lei.

⁴Dadege kêdabe hekun gierebabe zuapat leu de lei; kedeirei gene desieyibe lutat ne ra chige gechuabepeu je rezie pei gai bei de lei, chidezai ziemmename kat kat je gîchat ze bam ra hangge zeu; zai pechu ze hiazutkie kedibe pei gai bei de lei.

⁵Ka’nchetbe taunamgaibe chi pakechumbe ze pa (Mellipoine) ne rapat kai dege mâ-keringbe zat pakechumbe zene sa ze, “Wang lau!” kacheube I seu de lei. Dadege pie le lau, hekun getikbe, zai chige gechuabepeu ba ge hedu bambe I ngau de lei;

⁶zai mâ-keringbe zat medai bambe zuilung gene mâ-kua gumbe ze I seu de lei, “Dekuîmeu hit kat zene (Romme gu rangkâng pum kat) chi mai kat tâtewbe hî hang chang ra, zai Barli hit chum zene (Romme gu rangkâng pum kat) chi mai kat tâtewbe hî hang chang ra lei; kane taudui benai wain â tew’nsia se lau!” ze kacheube zeu.

⁷Ka’nchetbe taunamgaibe chi pamedaibe ze pa (Melipoine) ne rapat kai dege, mâ-keringbe zat pamedaibe zene sa ze, “Wang lau!” kacheube I seu de lei.

⁸Dadege pie le lau, hekun pâdabe zai chige gechuabepeu ji ze Kechaibe ze lei, zai Kechaiberam zene pe chai suitattibe I ngau de lei; dadege penai zene kedeirei dau medai ge dau kat peireige tewnei-neibe tew ra tâtewchibe rezie penai je pei gai bei de lei, hiazutkie zai herakûm zai herarît zai kedeirei gu mârekaune ramme zene tewchatrabe zeu.

⁹Ka’nchetbe taunamgaibe chi pamengeube ze pa (Melipoine) ne rapat kai dege, Hera gu sam ziegene benai penui ne sakkitewbeibe ziegene gîchatkaibeime gu keringbe (herui) ramme herâtewbe bamra kangge bambe I ngau de lei.

¹⁰Penui ne hekuâkechibe gene ’nrungpat ze, “Hei Hulangpeu Ka’nchibe, kagesangbe Tingwang gau, nang ne kedeirei ge kebamme peireige samram ze anui jai kûmtew ra beting ’ndaitie larei lau?” ze kacheu de lei.

¹¹Chidadege penui ’nteumena je hepaîni kehâbe kai lu, chi penui benai nguataka’ngguame zai penui sikiname je du penui je gum ze tewchatkaiberame periak wang’nsang mak tâne kecheîne penui je kuâleû gai ra rang gai bei de lei.

¹²Ka’nchetbe taunamgaibe chi paserukbe ze pa (Melipoine) ne rapat kai dege, I pie gai de lei, zai pie le lau, keteika’nchibe wang de lei; dadege tingnaimik ze miseigiriapaî gum tik kai di, hekêu ze hejai gum chang gai di,

¹³zai ’mbeuchîbang ze heratingkai ne guikengak kai bei ze chi hetating (kahegeibe ting) ge bechî ’nchikeube ramme ’ngngaîkeu gum ze tinggîm ge hegi ramme bambe ze kedeirei ge ’ngngaîkeu gai de lei;

¹⁴tinggîm piehang-ngaube ze leisizui ’nzuigai’ndibe gum ze ga gai di, zai kedeiloa ramme benai kedei hedui ne luaka’ngguabe bâm ramme ze penui bâm ramme gene puikeli di de lei.

¹⁵Chidadege â kedeirei ge heguangme zai samramme zai sipai kedime ramme, zai keheume zai peranchime, zai ’nteumena, kebangme benai lungzeunetewme ze hekâuki ramme, zai kedeiloa ge tingchuteria ramme ge ’mbai lu,

¹⁶kedeiloa ramme benai tingchu kedibe ramme je kû ze, “Heguang-bamrak ge ka’ntaupeu (Melipoine) ne ngaurabe gene, zai Hera lumpum daurabe gene anui je dapchim gai lau;

¹⁷penai hangna lumpum kedibe gu naimikpui wangchangdibe ge châu ne penai masuage sapchi ra lau?” ze kacheu de lei.