Read Zeme Naga KELIÂBE 7 Bible Online

KELIÂBE 7 - Zeme Naga bible

KELIÂBE 7

¹Aipau châng dege angelme hangmedaime bau ze kedeirei mik medai ge sap lu kedeirei ge tingkai medai teinam ze bambe I ngau de lei, dezai kedeirei ge zai sungkling ge zai hingbang ge tingkai gui gai mak ra hangge zeu.

²Chidadege angel’mpeu kêdapeu, keringbe Rapeu gu ka’nchetbe taunamgaibe tei lu kehu ’mbe chudibe I ngau de lei, dadege kedeirei benai sungkling je tewhereu ra tâtewchibe rezie peigaibeime angelme hangmedaime bau je hekuâkechibe ne kû ze,

³acheu ze sa ze, “Anui Rapeu gu tâka’ngguame ramme telie ge anui mâ-mâ-’nchet kai mak tâne â kedeirei mei zai sungkling mei zai ’nrêu mei je tewhereu gai se lau,” ze kacheu de lei.

⁴Chidadege Israelbe name zat leine ruagene chang haî kat ze hedai ze medaime je ’nchetkai’ndibe rasam I seu de lei,

⁵Juda zat gene chang kereu-ze-kename je ’nchet kai zai Reubenbe zat gene chang kereu-ze-kename je ’nchet kai, Gadbe zat gene chang kereu-ze-kename je ’nchet kai,

⁶Asherbe zat gene chang kereu-ze-kename je ’nchet kai, zai Naphtalibe zat gene chang kereu-ze-kename je ’nchet kai, Manassebe zat gene chang kereu-ze-kename je ’nchet kai,

⁷Simeonbe zat gene chang kereu-ze-kename je ’nchet kai, Lebibe zat gene chang kereu ze kename je ’nchet kai, Issakharbe zat gene chang kereu-ze-kename je ’nchet kai,

⁸Zebulunbe zat gene chang kereu-ze-kename, je ’nchet kai, Josepbe zat gene chang kereu-ze-kename je ’nchet kai, zai Benjaminbe zat gene chang kereu-ze-kename je ’nchet kai zeu.

⁹Aipau châng dege I pie gai de lei, dadege pie le lau, heguang-bamrak suage benai Melipoine suage mi ne de seikamchilakbe baudime, heramzat leine ruagene, hezat leine ruagene zai ziemmena pezat gechâm, hekuâgechâmme sapgit bambe ze hepuâni kehâbe kai kam lu penui ba ge ’nchangtu ramme tei’nggam lu,

¹⁰zai hekuâ kechibe ne ’nrung ze, “Tewka’nringbe â anui Rapeu, heguang-bamrak ge ka’ntaupeu gu, zai Melipoine gu lei!” ze acheu ze bam de lei.

¹¹Dadege â angelme leine ne heguang-bamrak tuaguâ ze, zai gechîngme ramme je tuaguâ ze, zai mâ-keringbe zat medai je tuaguâ ze, heguang-bamrak suage kâu’ngkumkeu ze Hera je kellum ze,

¹²acheu sa ze, “Amen! ’Nnamgaibe zai pengêudibe zai kaningchingbe zai hesuiyibe paugaibe zai hengêutewbe zai tâtewchibe rezie zai peranchibe ze betingbeta peize Hera dage bam bam lau! Amen” ze kacheu de lei.

¹³Chidadege gechîngme ruage mi hangkat ne achu ’mpau ze, “Aime paîkehâbe bâ lu bamme bau châume lau, zai penui ’ndai’mbene wangme lau?” ze kacheu de lei.

¹⁴I ne pechu, “A pau gau, nang ne chî lei,” acheu bei de lei. Dadege pa ne achu, “Aime bau â kahereube kedibe liebe gene zuapattime bau de lei; penui â penui paîni geta’nchilume bau zai Melipoine jai gene tew’ngngûpchuplume bau de lei.

¹⁵Chipauziegene penui â, Hera gu heguang-bamrak suage bam lei, zai pe gu kellumki lungge pechu ’nggua-himmuî ’nggua-tingba ze bam de lei; zai chi heguang-bamrak ge ka’ntaupeu zene penui je â ’nggum ze bam bam ra de lei.

¹⁶Penui â ’njei dai ra mak, herei de herei dai ra mak lei; penui â naichiêpu ra mak, zai mâ-mâ-kelumbe zat ne tewhereu ra mak lei.

¹⁷Heguang-bamrak bambe sûngngang ge Melipoine zene penui hangge melireîpeu chang ze, zai pa ne penui je â, keringbe hedui depin ge ngua gai gu daseu; zai Hera ne penui mik ge penui mikdui leine nuitua gai gu lei,” ze kacheu de lei.