Read Zeme Naga KELIÂBE 8 Bible Online

KELIÂBE 8 - Zeme Naga bible

KELIÂBE 8

¹Melipoine zene ka’nchetbe taunamgaibe rapat kai dege â, tinggîm ge ’nchetkak bepi riâ gum â rim bam gai di de lei.

²Chidadege â Hera masuage sapme angelme hanggesame bau, zai hegeîluîkie ramme sena penui je peigaibe I ngau de lei.

³Zai angelme kêdapeu wang lu ze herâtewbe bâmra ge gechâk ne tewbe mâ-perîmyibe ka’ntaube kuak tei lu sap kai de lei; dadege misongga ze mâ-perîmyibe ramme ze keneime ka’nchime gu kakellumbe ramme ge kebut’mpam gai ra hang heguang-bamrak suage gechâk ne tewbe herâtewbe bâmra peireige pechu pei gai bei de lei;

⁴dadege Hera masuage angel’mpeu ba gene mâ-perîmyibe gu hemika ze keneime ka’nchime gu kakellumbe benai kena nguachu di de lei.

⁵Chidadege â angel’mpeu ne mâ-perîmyibe ka’ntaube kuak tei lu herâtewbe bâmra ge hemi bambe zene chi (mâkuak) ge kaipuiting gai lu chize kedeirei ge tuâ gai bei de lei; dadege â tingcheikelung-lungbe, mâ-kuâchibe ramme, hegiria kakepitbe ramme, zai kedei-kaketeibe pat ti de lei.

⁶Chunage hegeîluîkie sena penui dage bamme, angelme hangsename bau zene chi (hegeîluîkie) ramme ’mmut kai ra hekasûn lu bam de lei.

⁷Railangbe angel’mpeu ne pe gu hegeîluîkie ’mmut kai bei ze, desak benai hemi chi hejai kebutlube ze kedeirei ge ’ngngaikeu di de lei; dadege kedeirei dau chum ge dau kat â rû ’ndi de lei, zai hereubuâ ka’ndiakbe leine rû kam ’ndi de lei.

⁸Pakenabe angel’mpeu ne pe gu hegeîluîkie ’mmut kai bei ze, mâge â kedeiloa kedibe gum ze hemitaube ze sungkling ge tuâ gai bei de lei;

⁹dadege sungkling dau chum ge dau kat ze hejai chang gai di de lei, sungkling ge mâ-keringbe bambe zat ramme dau chum ge dau kat â chai kam di de lei, zai hedui’nnei ramme dau chum ge dau kat â tew’nsia kam ’ndi de lei.

¹⁰Pakechumbe angel’mpeu ne pe gu hegeîluîkie ’mmut kai bei ze tinggîm ’mbene hegi kedibe kat keleu gum tauba ze ’ngngaîkeu di de lei, zai chize ’nggeuki ramme dau chum ge dau kat peireige benai hedui depin ramme peireige ’ngngaîkeu gai di de lei.

¹¹Chi hegi ji ze â, Keza (hereubang karîbe) lei. Hedui dau chum ge dau kat ze karî gai di de lei, zai chize ne ziemmena misonggame chai di de lei, chize karî bam ra tewgai’ndibe ziegeneu.

¹²Zai tinggîm angel’mpeu pamedaipeu ne pe gu hegeîluîkie ’mmut kai bei dege, tingnaimik ze dau chum ge dau kat, zai hekêu ze dau chum ge dau kat, zai hegi ramme dau chum ge dau kat â lak bei ze penui kebabe ze dau chum ge dau kat ze tewmuî ’ndi lei, tingnaimikpui kat lungge dau chum ge dau kat kebabe bam mak ra, zai chigum ze tingmuî kat ge du dau chum ge dau kat muî bam ra tew gai bei de lei.

¹³Chipau châng dege â I pie gai de lei, dadege â tinggîm zuilung ge keliengdi kinruabe luage chize ne hekuâkechibe ne ’nra ze, “Mi duângga lei, mi duângga lei, hegeîluîkie kêdabe ramme angelme hangchum ne ’mmutkairabe ge kedeirei ge lung ze bamme hangge mi duânggabe daurabe zeu!” ze kacheu de lei.