Read Zeme Naga KELIÂBE 9 Bible Online

KELIÂBE 9 - Zeme Naga bible

KELIÂBE 9

¹Zai pamengeube angel’mpeu ne pe gu hegeîluîkie ’mmut kai bei ze, tinggîm ’mbene hegi kat kedeirei ge ’ngngaîkeugaidibe I ngau de lei, dadege besînggabe kuiki gu chabi ze pechu (hegi je) pei gai bei de lei;

²pa ne besînggabe kuiki ze lat kai bei de lei, dadege bekuiki putbe gene hemi teki kedibe gu hemika gum ze hiachu de lei, zai chipau kuiki gene patbe hemika zene tingnaimik benai tingkai (chi kebabe ngaube) ze tewmuî ’ndi de lei.

³Chidadege hemika gene kedeirei ge tîngkau ramme wang de lei, dadege penui je kedeirei ge heruimegapui ramme gu rezie ze pei gai bei de lei;

⁴penui je â kedeirei ge hereubuâ bambe ramme, zai mâ-buâ ka’ndiakbe zat leine zai hingbang zat leine je tewhereu mak, kane ziemmename penui telie ge Hera gu ’nchet kai ze taunamgaibe game je runne tewhereu ra rang gai bei de lei;

⁵ziemmena je tewchat mak ze kane kêu mengeu tewsâ ze bam ra pei gai bei de lei, zai penui tewsabe herêu kat ze â heruîmegapui ne ziemmename je ka’ntetbe herêu gum lei.

⁶Zai chipauting ge ziemmename ne kechaibe je peu gu lei, zai chize ngau ra mak lei; penui chai nei gu lei, zai kechaibe ze penui dagene liamtat tu lei.

⁷Chi tîngkau ramme je ngaube ge hekun ramme je herei hangge teiwang’nduigaibe helî gum lei; penui peî ramme ze â gechâk ne tewbe kraun ramme luigum ngau gai lei; penui ju ramme ze â ziemmename ju gum lei,

⁸penui tam ramme ze ’mpuimi tam ramme gum lei, zai penui gêu ramme ze heradi kedibe gim ramme gum lei;

⁹penui dage penui lippungbe ze hegeî ne tewbe hegakam ramme gum lei, zai penui kan ka’ngngaibe ’ncheu â hekun dung ne herei ge timriang zu ze pakbe ’ncheu gum lei,

¹⁰penui dage heruîmegapui ramme gum ze penui mi benai penui ’nchai geteube ramme pung lei, zai ziemmename je ’ntet kai bei ze kêu mengeu kum ze bamderabe tâtewchibe rezie penui dage bam lei.

¹¹Besînggabe kuiki gu angel’mpeu ne penui peireige heguang gum ze bam lei; chi angel’mpeu ji ze â Hebrai lad ne Abaddon, kacheu de lei, zai Grik lad ne pechu Apollion acheu ze ku de lei, (chize mâ-tewka’nsiapeu kacheube lei)

¹²Mi duânggabe keraîbe ze â tat’ntua de lei; pie le lau, mi duânggabe zat kena wang gu rei lei.

¹³Chidadege chi paserukbe angel’mpeu ne pe gu hegeîluîkie ’mmut kai bei ze Hera masuage gechâk ne tewbe herâtewbe bâmra gu chi bekie medai gene hekuâpatbe I seu de lei,

¹⁴chi paserukbe angel’mpeu, pe dage hegeîluîkie bambepeu dage acheu ze sa ze, “Euphrates geuki kedibe ge banggaibeime angelme hangmedaime bau je ’mpat kai be lau,” kacheube kuâ I seu de lei.

¹⁵Chidadege ziemmename zat dau chum ge dau kat je tewchat ra pehî, patingnaimikpui, bekêu zai patingkum hangge kaikua bei ze bamme angelme hangmedaime bau je ’mpat kai bei de lei.

¹⁶Hekunching chua ze sipaime kahereime riak ze million haî na (200,000,000) lei; chi penui riak rangbe kuâ ze I seu de lei.

¹⁷Zai achu keliâbe gene hekun ramme je I ne ngaube tak ze aize de lei; hekunchingchuame gu penui gakam ramme gu pegeî tak ze â hemi benai sapphir zai Salphar geî lei, zai chi hekun peî ramme ze â heradi kedibe peî ramme gum lei, dadege penui muiki ramme gene hemi zai hemika zai Salphar pat ze bam lei.

¹⁸Ai herarît zat kechum zene ziemmena dau chum ge dau kat je â tewchat ’ndi de lei, penui muiki ramme gene hemi, hemika zai Salphar patbe zeneu.

¹⁹Hekun ramme gu tâtewchibe rezie â penui muiki ramme ge benai penui mi ge bam dadegeu; penui mi ze â henêu ramme gum lei, zai penui peî ramme pungbe zene tewjâm gai lei.

²⁰Ziemmena aipau rarît ramme zene tewchat mak ringpatme ze penui ba tatew ramme gene helungheli mak zai herasiabe ramme, zai gechâk zai gepût zai kangngâgeî zai tingchu benai heching ne tewbe heraluîtewbe ramme, chi ngauchi lak zai seuchi lak zai tatchilakbe zat ramme je kakellumbe gene sau mak,

²¹zai penui kegîbe tâ tewbe ramme, zai penui kahekabe tâ tewbe ramme, zai penui hangleutewbe tâ tewbe ramme, zai penui hegachibe tak, airamme gene penui heli mak lei.