Read Zeme Naga RUTH 1 Bible Online

RUTH 1 - Zeme Naga bible

RUTH 1

¹Samramme ne rezie tei ze bambe ting ge heram ge herakûm wang de lei, zai Judaram ge Bethlehem keloa ge lungpeu mi hangkat Moabram ge bamgailêu ra tat ti de lei, pa ne pe nâu benai pe na ’mpeumi hangna je ngua lu tat ti de lei.

²Chipaupeu ji ze â Elimelekbe lei, zai pe nâu ji â Naomile lei, zai pe na ’mpeumi hangna ji â Malonbe benai Kilionbe de lei; penui â Judaram Bethlehem gene patbe kau, zai Ephrathme de lei. Penui Moabram ’mbe tat ze chige lung ze bam de lei.

³Kane Elimelekbe Naomile napeu chai di de lei, zai pe nâu benai pe na ’mpeumi hangna je put kai diak te lei.

⁴Chibe kena ze Moabme leu je henâu lu de lei; hangkatpui ji ze Orpale zai kêdapui ji ze Ruthle de lei. Chige penui kum kereu gum ze lung gai de lei;

⁵zai Malonbe benai Kilionbe ze du chai di de lei, chipauziegene chipaupui ze pe na kena benai pe napeu zene pechu ’nggiâdiak kai de lei.

⁶Chidadege pa pe mupui kena je ngua lu ze Moabram gene helatwang dai de ra kedâchu di de lei, Tingwang ne pe gume je ’ngkiâmie dai ze penui hetak hang pei bei de lei be Moabram gene pa seulube ziegeneu.

⁷Chidadege pa bambe bâm gene pe mupui kena je ngua lu ze pa tatchu di de lei, zai Judaram ’mbe helatwang dai ra ’mpuîki ge penui tebeîtewtat bam de lei.

⁸Kane Naomile ne pe mupui kena je, “Tat zu lau, ningnai pui ki lam’mbe ningnai helatwang dai zu lau. Kechaime benai a peireige ningnai ne keyibe tew gai bei gum ze, peize Tingwang ne ningnai je ngau’nggia bam lau.” Kacheu de lei.

⁹Ningnai hangna ningnai napeu ki ge ningnai ki gesang hangge ngaudau le ra Tingwang ne pei gai be lau!’ ze acheu bei de lei. Chidadege â penai je pa kakeput te lei. Zai penai kuâ pat ze penai hap ti de lei.

¹⁰Zai penai ne pechu, “Mak lei, ning zatme dage anai ningchu ngua lu helatwang gu lei,” ze kacheu de lei.

¹¹Kane Naomile ne sa ze, “Helatwang dai de zu lau, a na ’mpuimi kena gau, ’ndaitew ze a dage ningnai tat’mpam ra lau? Ningnai napeu kena hangge changchi le ra a nebâm ge ’mpeumi napoine ramme larei semei?

¹²Helatwang dai de zu lau, a mupui kena gau, ningnai ’mpuî ra ’mbe tatchu lau, I â a napeu bam dai ra chîng-kezuzie de daseu. Chidaze nemai tingmuî ne I ne a napeu bam dai ze a name ’mpeumi lungkeu ra I ’nnum gai lei ze I sa gai bei lêuzaidu,

¹³penai chîng-hangbe riâ ningnai kuâchang ra mei? Chipauziegene ningnai mei mak ze bam ra mei? Acheu me lei, a mupui kena gau, Tingwang batâ a peireige wangchanggai’ndibe ziegene ningnai deu hanggene a lunggailak-desang de lei,” acheu bei de lei.

¹⁴Chidadege â penai kuâ pat ze penai hap kadai de lei; zai Orpale ne pe nai je keput kai de lei, kane Ruthle â pechu pamgit lu ze bam de lei.

¹⁵Zai Naomile ne, “Pie le lau, ning sipui â pe zatme benai pe rapeu ramme lam’mbe helatwang dai de lei; ning sipui chai suiwang dai de zu lau,” acheu bei de lei.

¹⁶Kane Ruthle ne sa ze, “Ningchu sâu ra, zai ning chai suibe gene helatwang de ra achu kiâm se lau; Nang tat-tatbe bâm ge I du tat ku lei, zai nang rêugai-gaibe bâm ge I du rêu gu lei; ning zatme ze a zatme chang gu, zai ning Rapeu ze a Rapeu chang lei;

¹⁷nang chaibe bâm ge I du chai gu lei, zai chige achu ritbai gai gu lei. Ning dagene kechaibe ne achu tewrimna lêuzai du peize Tingwang ne chi sua mua ze a peireige tew gai be lau,” ze kacheu de lei.

¹⁸Zai pe dage nguatat ra pe lung sing di de lei be Naomile ngau lu dadege, mâ de pa sa ta di de lei.

¹⁹Zai Bethlehem wangchang mak tâne penai hangna tat bam de lei. Zai penai Bethlehem wangchang dadege penai ziegene namdi luî keleulia bam di de lei; zai ’mpuimi ramme ne, “Aize Naomile de mei?” kacheu de lei.

²⁰Pa ne penui je, “Achu Naomile ze kû se lau, achu â Mara ze kû lau, karî ze (lunghereu ze) bam ra Tingwang ne achu tewhereu gai bei daseu.

²¹Puigit ze I zuapat te lei, zai perua ze Tingwang ne achu nguawang gai kadai de lei. Tingwang ne achu tewsâ gai bei, zai Reziechipeu ne a peireige mi duânggabe teiwanggaibeibe luage, ’ndaitew ze achu Naomile ze ku lau?” kacheu de lei.

²²Aigum ze Naomile helatwang kadai de lei, zai Moableu’mpui chi pe mupui Ruthle je ngua lu Moabram gene helatwang de lei. Zai barli meu gatchube ting ge Bethlehem ge penai wangchang de lei.