Read Zeme Naga RUTH 2 Bible Online

RUTH 2 - Zeme Naga bible

RUTH 2

¹Chunage Naomile â pe napeu kiduî’mpeu, keheupeu Elimelekbe kibau’mpeu, pe ji Boazbe kacheupeu bam de lei.

²Zai Moab’mpui Ruthle ne Naomile je, “I helu ’mbe tat ze hemeubuî ramme ze achu ngauka’nggiapeu chai gene I kuai’ndui le ra hangge achu tat ra pei lau,” kacheu de lei. Zai pa ne pechu, “A na gau, tat zu lau,” acheu bei de lei.

³Chidadege â pa zuapat ze tat ze helu ge helugatme chaige hemeubuî ramme kuai de lei; zai Elimelekbe kiduîme ruage mi hangkatpeu Boazbe lu ’nchui ge pa tatdau gai de lei.

⁴Zai pie le lau, Bethlehem gene Boazbe zuapat te lei; zai pa ne helugatme je, “Peize Tingwang ningnui dage bam lau!” ze kacheu de lei. Zai penui ne kak ze, “Tingwang ne ningchu ’nnam gai be lau,” ze kacheu de lei.

⁵Chidadege â Boazbe ne pe guâ ka’ngguapeu helugatme ruage besuiteupeu je, “Chize chaume leu’mpui se lau?” kacheu de lei.

⁶Zai pe guâ ka’ngguapeu helugatme ruage besuiteupeu ne, “Pa â Moabme leu’mpui lei, Moabram gene Naomile ne nguawangpui lei.

⁷Pa ne, ‘I kiam lei, helugatme chai ge mekum ramme ruage hemeubuî I kuai ra pei lau,’ ze kacheu de lei. Chigum ze pa wang lu ze hechuasûn gene chu ze chuna riâ chang ze luakatte sau mak ze tew bam de lei,” ze acheu bei de lei.

⁸Chidadege Boazbe ne Ruthle je, “Chunage ’ngking le lau, a na gau, kêdabe lu gene kuai ra tat se lau zai aipau lu ze sâu gai se lau, kane aige bamme heleume dage nguaherua le lau.

⁹Penui helugatbe ze ’nchet bam lau, zai penui chai sui le lau. Ningchu tâkeleu mak ra rehangme je I die gai mak semei? Zai nang herei dezai heduibung ramme ge rehangme ne hedui tuakkaibeibe gene tat ze sak le lau,” ze acheu bei de lei.

¹⁰Dadege pa pe ju kedei ’mbe kei’ngkumkeu lu, acheu sa ze, “I hesangme chang ze bambe luage ’ndaitew ze achu nang ngau’nggia zai ’nningkatinggeu se lau?” kacheu de lei.

¹¹Kane Boazbe ne pechu kak ze, “Ning napeu chaidibe châng gene seu ze ning nai hangge nang tewgai’ndibe leine achu salia kam bei de lei, zai ’ndaigum ze ning pui benai ning peu zai ning ram dei sâu ze besua’ngka ge nang chimakbe zat dage wang mei be tak du achu salia kam bei de lei.

¹²Nang tewgai’ndibe peireige Tingwang ne ningchu peize peiruî be lau, zai pe kan kangge nang ’nseu gai ra wanggaipeu Israelme Rapeu, Tingwang ne peize ningchu getoabehi peipuigit kai be lau!” acheu bei de lei.

¹³Dadege pa ne “A pau gau, achu nang ne ngau’nggia-kadesang de lei, ning guâ ka’ngguapui ramme ruage I bammakbe kau chang sede, nang ne I ning guâ ka’ngguapui je a lungsui tew’nta gai ze yi ze ’mpau bei daseu,” ze kacheu de lei.

¹⁴Zai mâ-teube hî ge Boazbe ne pechu, “Ailia wang lau, zai tingku gêsa â teu le lau, zai wain ge ning gu tingku liâp sûm gai le lau,” acheu bei de lei. Dadege helugatme taige pa ka’ntau de lei, zai Boazbe ne pechu barli meu hemi gene ’mpuaklube pei gai bei de lei; zai pa teu’nggeu mak tâne teu de lei, zai pa teuka’nsakbe gêsa â bam rei de lei.

¹⁵Hemeubuî kuai ra pa zuachu dai dege, Boazbe ne pe guâ ka’ngguame rehangme je rang gai ze, “Mekum ramme ruage du peize pechu hemeubuî ramme kuai le lau, zai pechu ’ngngiam se lau.

¹⁶Zai mekum ramme gene du pe hangge gêsa â tukpat kai be lau, zai pa kuai ra hangge sâu gai be lau, zai pechu ’nrû se lau,” ze acheu bei de lei.

¹⁷Chidadege â hegî riâ chang ze helu ge hemeubuî pa kuairua ze bam de lei; zai pa kuai’nduilube beûpat kai dege barli gu ephah kat (hit kereu gum ze) pat te lei.

¹⁸Zai chize pa teichu lu ze namdi ’mbe tat ti de lei; pa ne kuai’nduilube ze pe nai je teilia de lei, zai pa teu’nggeu lu ze ’nsakpatbe ze du lupat lu ze pechu pei bei de lei.

¹⁹Zai pe nai ne pechu, “Nemai ge ’ndaige nang kuai’ndui ra tat lau? Zai ’ndaige nang tâtew lau? Ningchu katinggeupeu je peize Hera ne ’nnam gai be lau,” ze kacheu de lei. Chidadege pa ne penai je châu dage pa tâtew mei be salia bei de lei, zai acheu sa ze, “Nemai ge I nguatâtewpeu ji â Boazbe lei,” acheu bei de lei.

²⁰Dadege Naomile ne pe mupui je, “Pa ka’nggiabe ne keringme benai kechaime je du sâu gai mak ze bambepeu Tingwang ne peize pechu ’nnam gai be lau,” kacheu de lei. Naomile ne aize du pechu salia de lei, “Chipaupeu ze anui kiduîme de lei, mi kiduîme ruage ’nchutlangbe kau mi hangkat te lei,” acheu zeu.

²¹Zai Moabme leu’mpui Ruthle ne rang ze, “Chipau peireige du pa ne achu rang gai ze, ‘A gu helu gat kam mak tâne a guâ ka’ngguame taige nang bam bam lau,’ ze kacheu de lei,” ze acheu bei de lei.

²²Zai Naomile ne Ruthle pe mupui je, “Chize yi de lei, a na gau, kêdabe lu ge ningchu tew’ngngam gai mak ra hangge pe guâ ka’ngguapui ramme dage nguatatewdibe ze ning hangge yi ra de lei,” ze kacheu de lei.

²³Dadege Boazbe guâ ka’ngguapui ramme dage pa bam ze, barli benai dekuîmeu gatkamgaibe riâ chang ze chige pa tâtew bam de lei; zai penai je pa ngualung ze bam de lei.