Read Zeme Naga RUTH 3 Bible Online

RUTH 3 - Zeme Naga bible

RUTH 3

¹Chidadege â pe nai Naomile ne pechu, “A na gau, ning hang yi ze bam de ra, ning ki hangge I peu gai mak ta ra semei?

²Chunage Boazbe pe guâ ka’ngguame ’mpuimi ramme dage nang nguatatew ze bambe ’mpaupeu ze anai kiduî’mpeu mak semei? Pie le lau, kechaîpung ge nemai tingmuî ge pa barli kelap ku de lei.

³Chidaze dui pia lu ze taudui ’nnuk le lau, zai ning puâ yibe ramme kai lu ze kechaîpung ’mbe wangkeu zu lau; kane pa teu ze sak kam le mak tâne chipaupeu zene ningchu peize chî se lau.

⁴Kane pa jeikau gai dezai pa jeibe ’nchui ze ’nchet le lau; dezai wang ze pe pî ’mbia paî gâupat lu jeikau gai zu lau; zai ’ndaikau tew ra mei be â pa ne ningchu rang gai gu lei,” ze kacheu de lei.

⁵Dadege pa ne kak ze, “Nang rangbe leine I tew gu lei,” ze kacheu de lei.

⁶Chidadege â kechaîpung ’mbe pa wangkeu lu ze pe nai ne ranggaibe luigum ze tew de lei.

⁷Zai Boazbe teu ze sak kai lu dege, pe lungsui’ntaza ze chêutum hiage wang ze jei di de lei. Dadege reine ze pa wang lu pe pî ’mbia paî gâuchu lu jeikau gai de lei.

⁸Muisum hî dege Boazbe ’nraklep chu de lei, zai jeikedatwang gai de lei, zai pie le lau, pe pî ’mbe ’mpuimi jeilaleu de lei!

⁹Pa ne, “Nang châu lau?” kacheu de lei. Zai Ruthle ne kak ze, “I â ning guâ ka’ngguapui Ruthle lei; ning guâ ka’ngguapui peireige ning nî tap kai lau, nang â mi sikina ’nchutlangbe kau daseu,” acheu bei de lei.

¹⁰Zai pa ne, “A na heleu’mpui gau, Tingwang ne peize ningchu ’nnam gai be lau, aipau ka’nggiabe tâ tewnâlangbe zene keraîbe suadu nang ne tew’ndi gai bei de lei, lungsia mei nu lungyi mei sede, rehangme je nang hegua mak tâdegeu.

¹¹Zai chunage a na gau, hing se lau, nang kiebe leine ning hang I tew gai gu lei, nang â ’mpuimi pemîhungbe kau lei be namdi ge a kanghiâme leine ne du chî daseu.

¹²Zai chunage I ze kahechut kau de lei be ze gesang de lei, sede mi kiduî’mpeu I suadu kahechutbe kau larei lei.

¹³Nemai mui â aige bam du lau, zai hechua dezai hechutlangpeu ne tewrabe ngeu ze ning hangge pa tew gai bei zai â yi de lei; peize chize pa ne tew gai zu lau; kane ’nchutlangpeu ne tewrabe ngeu ze ning hangge pa ne tew gai nei makchai â, Tingwang ring ze bambe luigum ze, kahechutbe tâ ze ning hangge I ne tew gai ra de lei. Hechua bapat mak tâne aige jei du lau,” ze acheu bei de lei.

¹⁴Dadege hechua bapat mak tâne pe pî hiage pa jei de lei, kane kat-kat luî piepatlakbe riâ ge chu dai di de lei; zai Boazbe ne, “Kechaîpung ge ’mpuimi wang de lei be peize chî se lau,” ze kacheu de lei.

¹⁵Zai pa ne sa dai ze, “Nang kaibe mechuatiebe lupat lu ze ’ndualie le lau,” kacheu de lei. Chidadege pa ne chize teilîam gai bei ze pa ne barli ka’ndeube seruk riâ ’ndeu gai bei de lei, zai pechu pe put tua gai bei de lei, chidadege â namdi ’mbe pa gut ti de lei.

¹⁶Zai pe nai dage pa wangchang dadege, pa ne, “A na gau, ning ma ’ndaigum lau?” ze ka’nneu de lei. Chidadege pa ne pechu, chipaupeu zene pe hangge tewgaibe leine rasam salia kam gai bei de lei,

¹⁷acheu sa ze, “Aipau barli ka’ndeube seruk pa ne achu pei de lei, pa ne, ‘’Ning nai dage ning barua helatwang dai mak ra lei,’ kacheu dadegeu,” ze kacheu de lei.

¹⁸Pa ne kak ze, “Mak kerei lei, a na gau, aipau deu ge ’ndaikau wangchang mei be nang chî mak tâne kuârî lau, ’mpeumi â sau dai ra mak te lei, kane nemai ge chipau deu ge teleu gu de lei,” ze kacheu de lei.