Read Zeme Naga RUTH 4 Bible Online

RUTH 4 - Zeme Naga bible

RUTH 4

¹Zai Boazbe â keriekemui ’mbe hang lu chige ’ntau bam de lei; zai pie le lau, mi kiria’mpeu Boazbe ne saliapeu chi pe kiduî’mpeu ze wang de lei. Dadege Boazbe ne rang ze, “A kangpeu gau, ailia pat ze ’ntau gai lau,” ze acheu bei de lei. Zai pa zuapat ze ’ntau bam de lei.

²Zai pa ne namdi ge gechîngme hangkereu je ngua lu, acheu sa ze, “Aige ’ntau gai lau,” acheu bei de lei; chigum ze penui ’ntaukeu gai de lei.

³Dadege pe kiduîme ruage ’nchutlangbe je, “Moabram gene wangkadaipui Naomile ne anai kiduî’mpeu Elimelekbe gu kedei bâm zua gu de lei.

⁴Chidadege ningchu aipau deu ze salia ra I ’nning gai de lei, zai acheu sa ze, ‘Aige ’ntau ze bamme gechîbe gene, zai a gu gechîngme mikngau gene chize lui le lau. Nang ne chize ’nri ra, zai â ’nri le lau; kane nang ne changlak lei zai â, achu rang lau, dezai I chî le ra hangge zeu, ningchu sâu ze chize ’nrirabe kau ga daseu. Zai ning chângge â I ze daseu,” ze acheu bei de lei. Zai pa ne kak ze, “I ne ’nri gu lei,” ze kacheu de lei.

⁵Chidadege Boazbe ne, “Naomile ba gene kedei ze nang lube mai gene Moab’mpui, zai kemîpui Ruthle je du nang lui de lei, chidezai kechaime ji gene pe heurâ ze bam-bamchi le ra hangge zeu,” ze acheu bei de lei.

⁶Chidadege pe kiduîme ruage ’nchutlangpeu zene, “Chize a hangge I ’nrichi lak te lei, a heurâ ze tew’nsia mak ra hangge zeu. A gu ’nrirabe rezie ze nang ne tei le lau, I â chize ’nrichi lak ti daseu,” ze kacheu de lei.

⁷Chunage aize ka’nribe benai hiakbe deu ge Israelme ruage ’ndâge tewtatbambe sie de lei: helîkahedetbe tew’ntip kai ra, hangkatpeu ne pe pîchûp luakpat lu kêdapeu je peibe zeu, zai aize Israelme ruage tew’ntipkaibe ’mpuî ze de lei.

⁸Chidadege pe kiria ’nchutlangpeu zene Boazbe je, “Ning hangge lui le lau,” ze kacheube luage pa pe pîchûp luakpat te lei.

⁹Chidadege Boazbe gechîngme benai baudime leine je, “Elimelekbe gu leine benai Kilionbe benai Malonbe gu leine Naomile ba gene I ne lui de lei be nemai ge ningnui ne sakki de lei.

¹⁰Moab’mpui Ruthle, Malonbe mîpui je du a nâu hangge I ne lui de lei, pe kiria ge kechaime ji ze tei’nduâtat ze bamchi le ra, dezai pe puiname ruagene zai pechu lungkeugaibe bâm gu keriekemui gene kechaime ji ze tew’ngga mak bam ra hangge zeu; nemai ge ningnui ne sakki ramme de lei,” acheu bei de lei.

¹¹Chidadege keriekemui ge baudime bamme leine benai gechîngme ne, “Anui ne sakkime de lei. Tingwang ne peize ning ki ge zuagutrapui je, Israelbe ki tei’nsapchube kena Rakelle benai Leale je gum ze pechu du tew gai be lau. Peize nang Ephratha ge lungyipeu chang zai Bethlehem ge hejidipeu chang lau;

¹²zai aipau heleu’mpui dagene napoine lungkeu ra Tingwang ne peigairabe ziegene ning ki ze Tamarle benai Judabe ne lungkeupeu Perezbe ki gum ze peize chang lau,” ze kacheu de lei.

¹³Chigum ze Boazbe ne Ruthle je lu de lei, zai pa ze pe nâu chang di de lei; pechu pa ’nna gai lu de lei, zai Tingwang ne pechu pe pumrit ra pei bei de lei; zai pa ’mpeumi napoine lungkeu de lei.

¹⁴Chidadege ’mpuimi ramme ne Naomile je, “Ning kiria ga ze lung ra nemai ge ningchu saugaimakpeu, Tingwang je peize toa lau; zai peize pe ji ze Israelme ruage sasuang ze bam lau!

¹⁵Pa zene ning hangge keringbe teiwangkadaibe zai nang chîngkeu dezai ningchu kateleupeu chang gu lei; ning mupui, ningchu hungpui, ’mpeumi napoine, ’mpeumime hangsena sua â ning hangge pemîhung-kadesangpui zene pechu lungkeu daseu,” ze kacheu de lei.

¹⁶Chidadege Naomile ne chi napoine je teichu lu pe ga gene pechu tuipua de lei, zai pa ne hena ka’nsipui chang di de lei.

¹⁷Zai pehuâzie ge bamme ’mpuimi ramme ne pe ji hangge ’ntak kai de lei, acheu sa ze, “Naomile dage ’Mpeumi napoine lungkeu gai la de lei,” ze kacheu de lei. Penui ne pe ji hangge, Obedbe ’ntak kai de lei; pa ze Dabidbe peu Jessibe peu de lei.

¹⁸Chunage aime ze Perezbe chaname de lei: Perezbe ze Hezronbe peu de lei,

¹⁹Hezronbe ze Rambe peu de lei, Rambe ze Amminadabbe peu de lei,

²⁰Amminadabbe ze Nahshonbe peu de lei, Nahshonbe ze Salmonbe peu de lei.

²¹Salmonbe ze Boazbe peu de lei, Boazbe ze Obedbe peu de lei,

²²Obedbe ze Jessibe peu de lei, zai Jessibe ze Dabidbe peu de lei.