Read Zeme Naga 1 SAMUEL 1 Bible Online

1 SAMUEL 1 - Zeme Naga bible

1 SAMUEL 1

¹Ephraimram lungge hangkat, Ramathaim-zophim’mpeu, Ephraimme zat Zupbe na, Tohube na, Elihube na, Jerohambe na pe ji Elkanabe kacheupeu bam lei.

²Pa pe nâu kena bam lei, hangkatpui ji ze Hannale, zai kêdapui ji ze Peninnale lei. Zai Peninnale ze â pe na bam lei, kane Hannale â pe na ga lei.

³Zai aipaupeu ze kum’nsangne pe gu namdi gene baudime gu Tingwang je kellum zai herâtew ra Elibe na kena Hophnibe benai Phinehabe ne Tingwang gu tingku chang ze tâtewbe bâm Shilo ’mbe tatka’nsui lei.

⁴Elkanabe herâtew tâne pe nâu Peninnale benai pe na rehangme ramme benai heleume ramme je hedam ramme pei pei lei;

⁵zai Hannale je pa hung leusedu hedam kat runne pei pei lei, Tingwang ne hena deî’nsau ’ndi dadegeu.

⁶Zai pechu kahemiapui ne pe lung tew’nsia-desang ze pe lumpum ra tew gai ka’nzie lei. Tingwang ne pe gu henarak deî’nam ’ndi dadegeu.

⁷Chigum ze tingkum ’nsangne tat-hang de lei; Tingwang ki lam’mbe pa hang tâne, pa ne pe lumpum tew gai ka’nsui lei, chidadege Hannale â hap ze mâ-teumeu bam lei.

⁸Zai pe napeu Elkanabe ne pechu rang ze, “Hannale gau, ’ndaitew ze nang hap lau? Zai ’ndaitew ze mâ-teu mak ra lau? Zai ’ndaitew ze ning lungsui sia lau? Ning hangge I ze ’mpeumi napoine hangkereu suane yi mak semei?” ze kacheu de lei.

⁹Shilo ge penui mâ-teu ze sak lu dege â, Hannale zuachu de lei, chuna tingkupeu Elibe â, Tingwang gu kellumki kemuikung taige ’ntau bam de lei.

¹⁰Pa pe lung hereu-desang ze, happuai ze Tingwang dage kakellum de lei.

¹¹Zai pa samhat ze acheu sa ze, “Hei baudime gu Tingwang gau, nang ne ning guâ ka’ngguapui kahereube pie gai, zai achu chî bam, zai ning guâ ka’ngguapui je ’ngngaî mak ze, kane ning guâ ka’ngguapui je ’mpeumi napoine pei gai gu lei zai â, pechu pe gu kering ting tâluî Tingwang dage pei gai gu lei, zai pe peî ge ’nseîne ze deîtau ra mak lei,” ze kacheu de lei.

¹²Pa sau mak ze Tingwang dage, kellum lage, Elibe â penui je pie bam lei.

¹³Hannale â pe lung gene sam sa bam de lei; pe muitai runne ’ngngai ze pe kuâ â seu mak lei; chidadege Elibe â pechu kameneupui hang ’nning gai ’ndi de lei.

¹⁴Zai Elibe ne pechu, “’Ndaitie ge nang meneu bam ra lau? Ning dagene ning gu wain tuâ ne du lau,” ze kacheu de lei.

¹⁵Kane Hannale ne kak ze, “Mak lei, a pau gau, I â lungkahereube kau ’mpuimi lei; I â wain du sak mak, zai hezau peranchibe du sak me lei, kane Tingwang suage a herêu peipat kai de lei.

¹⁶Ning guâ ka’ngguapui je peluîlapui hang riam gai se lau, aitiege a lungsui hereu-kadesangbe benai a lungsittewbe gene I ’nrung ze bam de lei,” ze kacheu de lei.

¹⁷Dadege Elibe ne kak ze, “Yi ze tatchu lau, zai Israelme Rapeu ne pechu nang ne gekiebe ze tew gai ’nde lei,” ze kacheu lei.

¹⁸Zai pa ne, “Peize ning guâ ka’ngguapui je ning mikngau ge ka’nggiabe ngau zu lau,” ze kacheu de lei. Dadege ’mpuimi ze pe gu ’mpuî ra’mbe tat lu mâ-teu di de lei, zai pe ma ge pe suisiabe ga di de lei.

¹⁹Penui hechuasûn chu lu Tingwang dage kakellum de lei; dadege Rama ge penui ki lam’mbe penui helattat dai di de lei. Zai Elkanabe ne pe nâu Hannale je ’nna gai bei de lei, zai Tingwang ne pechu chî gai bei de lei;

²⁰zai beting chang dadege Hannale ’mpung ze ’mpeumi napoine lungkeu de lei, zai pa ne pe ji Samuel ze ’ntak kai de lei, pa ne acheu sa ze, “Tingwang dagene pechu I ne kie lu de lei,” ze kacheube ziegeneu.

²¹Zai Elkanabe kacheupeu benai pe kibaume leine Tingwang dage tingkum gu herâtewbe peipat kai ra, zai samhatkaibe pei gai ra hang di de lei.

²²Kane Hannale â hang mak tai lei. Pa ne pe napeu je, “Napoine ze hebatak teuchi dezai pechu I nguahang gu lei, chidezai Tingwang suage pa saplia gai ze chige betingbeta bam le ra hangge zeu,” ze sa gai ’ndi dadegeu.

²³Pe napeu Elkanabe ne pechu acheu rang ze, “Ning dage yilangrabe tew zu lau, pechu tei’nchigaibe riâ kuâ zu lau, Tingwang ne peize pe sam tewpui gai zu lau,” kacheu de lei. Chidadege â ’mpuimi ze bam lu ze pe na ’mpeumi napoine je pa tei’nchi mak tâne ’mpâm ze bam di de lei.

²⁴Zai pa ne pechu tei’nchi gai lu dege â, pechu pa ne pe dage ngua lu getumsei kum chum kau tei lu, zai dekuîmeu Epha kat zai meigeibung kat wain tei lu Shilo ge Tingwang ki lam’mbe pa ne pechu nguahang de lei; zai napoine heluîbuane chang di de lei.

²⁵Dadege penui ne getumsei bichat kai lu, napoine je penui ne Elibe dage nguawang gai de lei.

²⁶Zai pa ne acheu ze, “Hei a wangpeu gau! Nang ringbe ziegene, a wangpeu gau, ning masuage sapbambe ’mpuimi ze I de lei, Tingwang dage kellum bambe zeu.

²⁷Aipau napoine hangge I kakellum de lei; Tingwang ne I gekiebe ze achu pei gai bei de lei.

²⁸Chidadege Tingwang dage pechu I peiruî gai de lei; pa ring tâne hang Tingwang hangge pechu peipat kai ’nde lei,” ze kacheu de lei. Zai Tingwang je chige penui kakellum de lei.